बाढी आएपछि महोत्तरीका व्यापारी खुसी

A+ A A-

बाढीले एकातिर नेपाली जनता समस्यामा परेका छन् भने अर्कोतर्फ महोत्तरीका व्यापारीमा खुसी छाएकाे छ । बाढीपछि नेपालमा उत्पादित तरकारी भारततर्फ निर्यात हुन थालेको छ ।

महोत्तरीको व्यापारिक केन्द्र गौशाला बजारबाट अहिले दैनिक २ सय क्विन्टल तरकारी भारत निर्यात भइरहेको व्यापारीहरु बताउँछन् ।

एकातिर बाढीका कारण भारतीयको विकल्प नेपाल बनेको छ भने उत्पादित तरकारी रसिलो, स्वादिलो र विषादीरहित भएकाले सीमापारिका बजारमा उच्च माग रहेको भारतीय व्यापारीको भनाइ छ ।

गौशाला बजारबाट परबल, बोडी, काउली, बन्दा कोभी, गोलभेंडा, धनियाँको पात, मुला, हरियो खोर्सानीलगायतका तरकारी भारतीय बजारमा निर्यात हुन्छ । यहाँबाट निर्यात हुनेमध्ये परबल र बोडी मात्र महोत्तरीमा उत्पादन हुन्छ ।

बाँकी सबै धनकुटाको हिले र मकवानपुरका हेटौंडा, टिस्टुङ पालुङलगायतका स्थानबाट आउने गरेको स्थानीय व्यापारी सरोज साहले बताए ।

‘अहिले हिले र मकवानपुरबाट दैनिक ६ देखि ७ पिकअप (२ सयदेखि २ सय ५० क्विन्टल) तरकारी गौशाला बजार आउने गरेको छ,’ तरकारी व्यापारी रामपुकार साहले भने, ‘यसमध्ये बढीमा १० प्रतिशत मात्र यहाँ खपत हुन्छ । बाँकी सबै भारतीय बजार पुग्ने गरेको छ ।’

यहाँका तरकारी बेच्न भारतीय बजार पुग्नु नपर्ने भएकाले पनि नेपाली किसान र व्यापारीलाई सजिलो छ ।

‘हामी पहाडी जिल्ला पुगेर तरकारी संकलन गरेर ल्याउँछौं,’ गौशालाका तरकारी व्यापारी प्रमोद साहले भने, ‘उताका व्यापारी आफैं गौशाला आउँछन् । नगद तिर्छन् र बोरामा भरेर लान्छन । हामीलाई भारत पुग्नुपर्ने झन्झट छैन ।’

विहारको सीतामढी जिल्लाका कनहमा, सुरसन्डलगायत सीतामढीसम्मबाटै दैनिक दर्जनभन्दा बढी भारतीय व्यापारी तरकारी खरिदका लागि गौशाला बजार आउने गरेको उनले बताए ।

बिहानै गौशालाको गुदरी बजार पुग्ने उनीहरूले मोटरसाइकलबाटै ५ क्विन्टलसम्म तरकारी ओर्साछन् । कसैले दिनको दुई–तीन पटकसम्म ओसार्ने गर्छन् ।

गौशाला बजार पुगेका भारत सुरसन्डका तरकारी व्यापारी सोनुका अनुसार भारतीय भान्सामा पहिलेदेखि नै नेपाली तरकारी पुग्दै आएको थियो । गत सातादेखि उत्तरी विहार वर्षा, बाढी र डुबानको चपेटामा परेदेखि नेपाली तरकारीको खपत झन् बढेको उनले बताए ।

‘यताका तरकारी स्वादिलो र रसिलो त छँदै छ । कीटनाशक पनि नभएकाले नेपाली तरकारी भारतीय ग्राहकको रोजाइमा परेको हो,’ सोनुले भने, ‘बाढी र डुबानका कारण यताको तरकारी नगए निस्तो खाना खानुपर्ने हुँदा अहिले झन् माग बढेको हो ।’

पूर्व–पश्चिम राजमार्गलाई भारतीय सीमामा जोड्ने माईस्थान–गौशाला–समसी सडक यसै वर्ष कालोपत्रे भएकाले पनि व्यापारीलाई नेपाली उत्पादन भारतीय बजार पुर्‍याउन सहज भएको छ ।

सडक कालोपत्रे भएदेखि कतिपय भारतीय व्यापारी किसानको खेतमै पुगेर तरकारी किन्ने गरेका छन् ।

भारतमा खपत बढ्न थालेपछि यहाँ थप रोजगारी सिर्जना हुनुका साथै व्यापार प्रवर्द्धनमा योगदान पुगेको व्यापारीको भनाइ छ । भारतमा नेपाली तरकारीको माग बढ्दै गएपछि स्थानीय ६–७ जना व्यापारीले हिले र मकवानपुरसम्म व्यापार विस्तार गर्ने अवसर पाएका छन् ।

तरकारीको कारोबार बढ्न थालेपछि हाट नलाग्ने दिन पनि गौशाला गुदरी बजारमा कारोबार बढेको छ । तर, वर्षा पछि पनि यो व्यापार कायमै रहने हो कि फेरि भारतीय व्यापारी भारततर्फ कारोबार बढाउँछन्, त्यो हेर्न बाँकी छ ।

प्रकाशित मिति: आइतबार, साउन १९, २०७६ २२:५९