बन्दसूची पेस गर्ने आज अन्तिम दिन, प्रमुख दलहरू आयोग जाँदै

A+ A A-

४ मंसिरमा हुने प्रतिनिधि र प्रदेशसभा सदस्य निर्वाचनको समानुपातिकतर्फको बन्दसूची पेस गर्ने आज अन्तिम दिन प्रमुख दलरूले बुझाउँदै छन् । आयोगले हिजो र आज दुई दिन बन्दसूची पेस गर्न दलहरूलाई समय दिएको हो ।

हिजो पेस नगरेका दलहरूले आज पेस गर्दै छन् । सूची पेस गर्ने हिजो पहिलो दिन प्रतिनधिसभाको समानुपातिकतर्फ दुईवटा दलले मात्र बन्दसूची बुझाएका छन् । आयोग प्रवक्ता शालिग्राम शर्मा पौडेका अनुसार पहिलो दिन प्रतिनिधिसभातर्फ नेपाल समावेशी पार्टीले ४६ जना र तराई मधेस लोकतान्त्रिक पार्टीले ११ जनाको नाम बन्दसूचीमा पेस गरेको छ ।

प्रतिनिधिसभाको समानुपातिकतर्फका लागि ६८ वटा निवेदन परेको थियो । एउटा दलले ११० जनासम्मको नाम बन्दसूचीमा राख्न पाउनेछन् । बन्दसूचीतर्फ सम्भावित उम्मेदवारको संख्या ७ हजार ४ सय ८० रहेको छ । तर समानुपातिकका लागि निवेदन दिएका सबै दलले ११० जनाकै नाम बुझाउँछन् भन्ने छैन ।

आइतबार बन्दसूची बुझाएका दलले पनि ११० जनाको नाम बुझाएका छैनन् । पहिलो दिन प्रदेशको समानुपातिकतर्फ भने तीनवटा प्रदेशमा १–१ वटा दलले मात्र बन्दसूची पेस गरेका छन् । प्रदेशतर्फ प्रदेश १ मा किराँत खुम्बुवान साझा पार्टीले ११, मधेस प्रदेशमा तराई मधेस लोकतान्त्रिक पार्टीले १५ र बागमती प्रदेशमा तामङसालिङ लोकतान्त्रिक पार्टीले १६ जनाको बन्दसूची पेस गरेको छ ।

आयोग प्रवक्ता पौडेलका अनुसार अन्य प्रदेशमा कुनै पनि दलले बन्दसूची पेस गरेका छैनन् । समानुपातिक निर्वाचन प्रणालीतर्फ प्रदेश नम्बर १ मा विभिन्न ६३ वटा दलबाट ५५ वटा निवेदन, मधेस प्रदेशमा ६७ वटा दलबाट ५९ वटा निवेदन, बागमती प्रदेशमा ६६ वटा दलबाट ५८ वटा निवेदन, गण्डकी प्रदेशमा ६० वटा दलबाट ५२ वटा निवेदन, लुम्बिनी प्रदेशमा ६२ वटा दलबाट ५४ वटा निवेदन, कर्णाली प्रदेशमा ५७ वटा दलबाट ४९ वटा निवेदन र सुदूरपश्चिम प्रदेशमा ५८ वटा दलबाट ५० वटा निवेदन परेको छ ।

प्रदेश १ मा ३७, मधेस प्रदेशमा ४३, बागमती प्रदेशमा ४४, गण्डकी प्रदेशमा २४, लुम्बिनी प्रदेशमा ३५, कर्णाली प्रदेशमा १६ र सुदूरपश्चिम प्रदेशमा २१ गरी एउटा दलले ३३० उम्मेदवार बन्दसूचीमा पेस गर्न सक्छन् । प्रतिनिधि र प्रशेसभा गरी एउटा पार्टीले ३३० जना उम्मेदवार बन्दसूचीमा राख्न पाउँछन् । जसमा सम्भावित उम्मेदवारको संख्या १९ हजार ५ सय ७६ हुन्छ ।

बन्दसूची पेस गरेपछि आयोगले उम्मेदवारको छानबिन गरी आवश्यकता अनुसार सच्याउन दललाई ४ गतेदेखि ९ गतेसम्मको समय दिएको छ । त्यस्तै आयोगले दलहरूले उम्मेदवारको बन्दसूची संशोधन गरी पेस गर्न १० देखि १६ गतेसम्मको अवधि दिएको छ । ४ मंसिरमा हुने चुनावबाट प्रतिनिधिसभातर्फ प्रत्यक्षमा १६५ र समानुपातिकमा ११० गरी २७५ सदस्य निर्वार्चित हुनेछन् ।

प्रदेशतर्फ प्रदेश १ मा प्रत्यक्षमा ५६ समानुपातिकमा ३७ गरी ९३ सदस्य निर्वाचित हुनेछन् । मधेस प्रदेशमा प्रत्यक्षमा ६४ समानुपातिकमा ४३ गरी १०७ सदस्य निर्वाचित हुनेछन् । बागमती प्रदेशमा प्रत्यक्षमा ६६ समानुपातिकमा ४४ गरी ११० सदस्य निर्वाचित हुनेछन् ।

गण्डकी प्रदेशमा प्रत्यक्षमा ३६ र समानुपातिकमा २४ गरी ६० सदस्य निर्वाचित हुनेछन् । लुम्बिनी प्रदेशमा प्रत्यक्षमा ५२ र समानुपातिकमा ३५ गरी ८७ सदस्य निर्वाचित हुनेछन् । कर्णाली प्रदेशमा प्रत्यक्षमा २४ र समानुपातिकमा १६ गरी ४० सदस्य निर्वाचित हुनेछन् ।

सुदूरपश्चिम प्रदेशमा प्रत्यक्षमा ३२ र समानुपातिकमा २१ गरी ५३ सदस्य निर्वाचित हुनेछन् । यसरी प्रतिनिधि र प्रदेशसभाको प्रत्यक्षबाट ४९५ सदस्य र प्रतिनिधि र प्रदेशको समानुपातिकमा ३३० गरी कुल ८२५ सदस्य निर्वाचित हुनेछन् । ८२५ सदस्यका लागि १ करोड ७९ लाख ८८ हजार ५ सय ७० मतदाताले मतदान गर्न पाउने छन् ।

प्रकाशित मिति: सोमबार, असोज ३, २०७९ ०८:३७