कुमार पाैडेल प्रहरीसँगकाे मुठभेडमा मारिएका हाेइनन् : प्रतिवेदन

A+ A A-

प्रदेश २ अन्तर्गत रहेर मानवअधिकारको क्षेत्रमा सक्रिय विभिन्न संस्थाले विप्लव नेतृत्वकाे नेकपाका सर्लाही इन्चार्ज कुमार पौडेल प्रहरीसँगको मुठभेडमा मारिएका भन्ने कुरा गलत भएकाे दाबी गरेका छन् । अनौपचारिक क्षेत्र सेवा केन्द्र (इन्सेक), एडभोकेसी फोरम नेपाल, तराई मानवअधिकार रक्षक सञ्जाल, महिला मानवअधिकार रक्षा सञ्जाल, नेपाल मानवअधिकार संगठन र उन्नत नेपालले अध्ययनपश्चात् जनकपुरमा प्रतिवेदन सार्वजनिक गरेका हुन् ।

प्रतिवेदनमा पौडेलको दोहोरो भिडन्तमा मृत्यु भएको हो भन्ने विश्वसनीय आधार नदेखिएको निष्कर्ष प्रस्तुत छ । प्रतिवेदनमा प्रहरीले भिडन्तको नाममा नियन्त्रणमा लिएर पौडेलको हत्या गरेको घुमाउरो भाषा प्रयोग गरिएको छ ।

प्रतिवेदनमा भनिएको छ, ‘पौडेलको दोहोरो भिडन्तमा नभई नियन्त्रणमा लिएपश्चात् हत्या गरिएको हुन सक्ने यथेष्ट सम्भावना छ ।’

विगत केही वर्षदेखि मुठभेडका नाममा व्यक्तिको हत्याको शृंखला बढेको पनि प्रतिवेदनमा उल्लेख छ ।

इन्सेक प्रदेश २ का संयोजक राजु पासवानले घटनाको प्रकृति र विभिन्न दृष्टिले अध्ययन गर्दा पनि पौडेल समूह र प्रहरीबीच भिडन्त भएको नदेखिएको बताए । उनले भने, ‘घटना गम्भीर प्रकृतिको हो त्यसैले निष्पक्ष छानबिनका लागि उच्चस्तरीय न्यायिक छानबिन समिति गठन हुनुपर्छ । पोस्टमार्टम रिपोर्ट अस्पतालले दिन नमानेकाले घटना दबाउने प्रयास भइरहेको आशंका छ ।

प्रतिवेदन सार्वजनिक गरेका संस्थाले विभिन्न ६ बुँदे मागसमेत राखेका छन् । ती संस्थाले निष्पक्ष छानबिनका लागि उच्चस्तरीय समिति गठन, घटनामा संलग्नलाई कानूनी दायरामा ल्याउन तथा दण्डहीनता अन्त्य र कथित मुठभेडका नाममा व्यक्ति हत्याजस्तो जघन्य अपराधमा संलग्न संस्था वा व्यक्तिलाई उत्तरदायी बनाउन माग गरेका हुन् ।

प्रकाशित मिति: शुक्रबार, साउन १७, २०७६ ०५:४२