सय जनाकाे जम्बाे टाेलीसहित २७ भदाैमा काठमाडाैं उत्रिँदैछन् चिनियाँ राष्ट्रिय जनकंग्रेसका अध्यक्ष ली

सय जनाकाे जम्बाे टाेलीसहित २७ भदाैमा काठमाडाैं उत्रिँदैछन् चिनियाँ राष्ट्रिय जनकंग्रेसका अध्यक्ष ली

A+ A A-

चिनियाँ राष्ट्रिय जनकंग्रेसका अध्यक्ष ली चान्सु चार दिने नेपाल भ्रमणका लागि २७ भदौमा काठमाडौं ओर्लिदैछन् । रुस र मंगोलियाको भ्रमण सकेर काठमाडौं आउन लागेका लीको साथमा करिब १ सय जनाको टोली रहनेछ ।

चिनियाँ संसदको सभामुख लीको भ्रमण टोलीमा चिनियाँ कम्याुनिष्ट पार्टी मन्त्रीस्तरका ६ जना, राज्यमन्त्रीस्तरका दुई जना नेता र विदेश मन्त्रालयका उच्च अधिकारीहरू रहनेछन् । त्यसबाहेक चिनियाँ कम्युनिष्ट पार्टीको विदेश विभागका सदस्यहरू पनि रहने बताइएको छ ।

नेपालका सभामुख अग्निप्रसाद सापकोटाको निम्तामा आउन लागेका ली चिनियाँ कम्युनिष्ट पार्टीका वरिष्ठ नेतासमेत हुन् । सवैधानिक रूपमा राष्टपति सी चिनफिङपछि दोस्रो वरियतामा रहेका ली पार्टीको प्रभावशाली राजनीतिक ब्युरोका सात सदस्यमध्ये एक हुन् ।

२७ भदौमा सभामुख सापकोटा र लीवीच द्विपक्षीय भेटवार्ता हुनेछ र सोही राति सापकोटाले रात्रिभोजको आयोजना गरेका छन् । परराष्ट मन्त्रालय र संसद सचिवालयले भ्रमणको तयारी तीव्र पारेका भए पनि ठोस एजेन्डा भने तय भइसकेको छैन तर दुई देशको संसदबीच सहकार्य र अनुभव आदानप्रदानका लागि एक समझदारीमा हस्ताक्षर गर्ने तयारी भने भएको छ ।

नेपालको संसदीय अनुभव र सहकार्यको सन्दर्भ चीन टाढै रहने भएकाले आउने दिनमा दुई देशका संसदबीचको सम्बन्ध विस्तार गर्ने चीनको चाहना रहेको छ । भारत, अमेरिका लागयतका देशसँग नेपालको संसदको अन्तर्क्रिया बाक्लो रहेको छ ।

त्यस्तै कपितय युरोपेली देशका सांसदहरू पनि नेपाल भ्रमणमा आउने र नेपाली सांसदहरू ती देशको भ्रमणमा जाने गरेका छन् । तर चीन र नेपालको सन्दर्भमा त्यस्तो व्यवस्था रहेको छैन । त्यही सम्बन्ध विस्तारका लागि लीले नेपाल भ्रमण गर्न लागेको पनि बताइएको छ ।

नेपाल र चीनका शासन र सुशासनका अनुभव, सांसदबीच भ्रमण आदानप्रदान, जलवायु परिवर्तन, द्विपक्षीय राजनीतिक तथा आर्थिक सम्बन्ध, विगतमा भएका सहमति कार्यान्वयन र अन्तर्राष्ट्रिय परिस्थिति लगायत मुद्दामा सापकोटा र लीबीच छलफल सापकोटानिकट स्रोतको भनाइ छ ।

सम्बन्धित सामग्री: