चिनियाँ जनकंग्रेस स्थायी कमिटी अध्यक्ष लु चान्सु सेप्टेम्बरमा नेपाल आउँदै

चिनियाँ जनकंग्रेस स्थायी कमिटी अध्यक्ष लु चान्सु सेप्टेम्बरमा नेपाल आउँदै

A+ A A-

आउँदो सेप्टेम्बरमा चिनियाँ उच्च प्रतिनिधिहरू नेपाल भ्रमणमा आउने भएका छन् । उच्चस्तरीय कूटनीतिक र सुरक्षा स्रोतले शिलापत्रलाई दिएको जानकारीअनुसार सेप्टेम्बरमा चिनियाँ उच्च प्रतिनिधिले नेपाल भ्रमण गर्ने तयारी भइरहे पनि मिति भने टुंगो लाग्न बाँकी छ ।

स्रोतका अनुसार चिनियाँ जनकंग्रेसका स्थायी कमिटी अध्यक्ष लु चान्सुको नेपाल आउन लागेका हुन् । भ्रमणको विस्तृत विवरण भने प्राप्त भइनसकेको स्रोतले जनाएकाे छ । उनको भ्रमणकाे वातावरण बनाउने प्रयास दुवै देशबाट भइरहेको छ ।

असार अन्तिम साता नेपाल भ्रमणमा आएका चिनियाँ कम्युनिस्ट पार्टीका विदेश विभाग प्रमुख लि जिआनचाओकोपछि लु आउन लागेका हुन् । राष्ट्रपति सी चिनफिङपछि अहिलेसम्म भएका भ्रमणहरूमध्ये लुको भ्रमण उच्चस्तरीय हुनेछ । लु १७ मार्च २०१८ मा जनकंग्रेसको स्थायी कमिटी अध्यक्ष भएका हुन् । अध्यक्षको कार्यकाल ५ वर्षको हुन्छ ।

कूटनीतिक स्रोतका अनुसार जनकंग्रेसको स्थायी कमिटी अध्यक्ष लु वा चिनियाँ प्रधानमन्त्री ली खछ्याङमध्ये एकले सेप्टेम्बरमा भ्रमण गर्ने तयारी छ । अहिलेसम्म अध्यक्ष लुको भ्रमण नै पहिला हुने बताइएको छ । परिस्थिति अनुकूल भएको अवस्थामा भने लुको भ्रमणपछि प्रधानमन्त्री ली नेपाल आउनसक्ने बताइएको छ ।

पछिल्ला दिनमा अमेरिकी प्रतिनिधिहरूको भ्रमण बाक्लो भएपछि चिनियाँ उच्च अधिकारीले पनि नेपाल भ्रमणलाई तीव्रता दिएका छन् । १३ साउनमा अचानक अमेरिकी उपसहायक मन्त्री डोनाल्ड लु नेपाल आएका थिए । त्यसको १५ दिनअघि मात्रै चिनियाँ कम्युनिस्ट पार्टीका विदेश विभाग प्रमुख लिउ जियानचाओले नेपाल भ्रमण गरेका थिए ।

उनको प्रतिनिधि मण्डल फर्केपछि अमेरिकी प्रतिनिधिले नेपाल भ्रमणको तयारी गरेका थिए । त्यहीक्रममा लिउपछि अमेरिकी प्रतिनिधि लु नेपाल भ्रमणमा आएका थिए ।

नेपाल चुनावको सम्मुखमा रहेका बेला शक्ति राष्ट्रका उच्च प्रतिनिधिहरूले नेपाल भ्रमणलाई तीव्रता दिएका छन् । ४ मंसिरमा नेपालमा प्रतिनिधिसभा र प्रदेशसभाको चुनाव हुँदैछ । अमेरिका अहिलेको सत्ता गठबन्धनलाई निरन्तरता दिएर आउँदो चुनावपछि अमेरिकी सुरक्षा रणनीतिअनुसार काम गर्ने वातावरण बनाउने प्रयासमा लागेको छ । चिनियाँ पक्ष भने वाम गठबन्धन गराई अहिलेको सत्ता गठबन्धनको विकल्प खोजिरहेको देखिन्छ । शक्ति राष्ट्रको दोहोरो रणनीतिका कारण नेपालको आन्तरिक राजनीति पनि गिजोलिन थालेको छ ।

प्रकाशित मिति: शनिबार, भदौ ११, २०७९ ११:३७