बाढीपहिरोको क्षतिबारे मुख्यमन्त्रीद्वारा प्रधानमन्त्रीलाई ब्रिफिङ

A+ A A-

मुख्यमन्त्री लालबाबु राउतले बाढीबाट प्रदेश २ मा भएको क्षतिबारे प्रधानमन्त्री केपी शर्मा ओलीलाई जानकारी गराएका छन् ।

२७ असारमा आएको भीषण बाढीबाट प्रदेश २ मा भएको क्षतिबारे सम्बन्धित पक्षलाई जानकारी गराउनुका साथै सहयोग जुटाउने उद्देश्यले काठमाडौं पुगेको मुख्यमन्त्री राउतसहितको सर्वदलीय टोलीले आज प्रधानमन्त्री ओलीसँग भेट गरेकाे हाे ।

प्रधानमन्त्री निवास बालुवाटारमा भएको भेटघाटमा मुख्यमन्त्री राउतले बाढीबाट प्रदेश २ मा सार्वजनिक र निजी गरी अर्बौं रुपैयाँ बराबरको क्षति भएको, ३७ जनाभन्दा बढीको मृत्यु भएको तथा हजारौं परिवार घरबारविहीन भएको जानकारी गराए ।

बाढीबाट भएको क्षतिको परिपूर्ति प्रदेश सरकारको बुताभन्दा बाहिर रहेको उल्लेख गर्दै उनले विस्थापितको पुनर्वास र पुनर्निर्माणका लागि संघीय सरकारलाई सहयोग गर्न आग्रहसमेत गरे ।

भेटमा मुख्यमन्त्री राउतले विस्थापित परिवारको पुनर्वास, नदी नियन्त्रण र सडक मर्मतमाथि विशेष जोड दिएका थिए ।

जवाफमा प्रधानमन्त्री ओलीले केही दिनभित्रै आफूले बाढीप्रभावित क्षेत्रको भ्रमण गर्ने र आवश्यक सहयोग गर्ने आश्वासन दिएका छन् ।

भेटमा पूर्वप्रधानमन्त्री पुष्पकमल दाहाल, उद्योग वाणिज्य तथा आपूर्तिमन्त्री मातृकाप्रसाद यादवसमेतको उपस्थिति थियो भने प्रदेश २ को सर्बदलीय टोलीमा मुख्यमन्त्री राउतसहित भौतिक पूर्वाधार विकासमन्त्री जितेन्द्र सोनल, आन्तरिक मामिला तथा कानूनमन्त्री ज्ञानेन्द्रकुमार यादव, नेकपा संसदीय दलका नेता सत्यनारायण मण्डल, नेपाली कांग्रेस संसदीय दलका नेता रामसरोज यादवलगायत सहभागी थिए ।

प्रकाशित मिति: आइतबार, साउन १२, २०७६ २२:१८