नौबुँदे काठमाडौं घोषणापत्र जारी गर्दै सम्पन्न भयो सातौँ राष्ट्रिय युवा सम्मेलन

नौबुँदे काठमाडौं घोषणापत्र जारी गर्दै सम्पन्न भयो सातौँ राष्ट्रिय युवा सम्मेलन

A+ A A-

'अन्तरपुस्ता ऐक्यबद्धता : सबै उमेर समूहमैत्री विश्व निर्माणमा साझा प्रतिबद्धता' भन्ने मुख्य नाराका साथ अन्तर्राष्ट्रिय युवा दिवस २०२२ को अवसरमा आयोजित सातौँ राष्ट्रिय युवा सम्मेलन नौबुँदे काठमाडौं घोषणापत्र जारी गर्दै सम्पन्न भएको छ ।

कार्यक्रममा प्रमुख अतिथि एवं राष्ट्रिय युवा परिषद्का उपाध्यक्ष सुरेन्द्र बस्नेतले वैशाखमा सम्पन्न स्थानीय तहको निर्वाचनमा ४० प्रतिशतभन्दा धेरै युवाहरू निर्वाचित भएर आएकाले आमयुवाहरूमा नयाँ आशा पलाएको बताए । यसैगरी, अधिकारको आन्दोलमा मात्र अगाडि बढ्ने युवावर्गले आफ्नो जिम्मेवारी बोध गर्दै ऊर्जाशील शक्ति देश निर्माणमा लगाउनुपर्ने उनको भनाइ थियो ।

कार्यक्रममा आफ्नो मन्तव्य राख्दै संस्थाका सल्लाहकार तथा वातावरणविद् श्यामकृष्ण श्रेष्ठले आफ्नो ज्यान नै जोखिममा राखेर वैदेशिक रोजगारीमा जानुपर्ने अवस्थाको अन्त्य गर्दै देशलाई युवा बस्न र टिकाउन लायक बनाउनुपर्ने बताए ।

टीडीएच जर्मनीका नेपालका प्रतिनिधि मोनी श्रेष्ठले युवा सरोकारका विभिन्न पक्षमा सरकारी निकाय, सामाजिक संघसंस्था, युवाक्लब/सञ्जाल तथा सबै सरोकारवालाहरूसँगको हातेमालोबाट मात्र युवा अभियानले सफलता प्राप्त गर्न सक्ने बताए ।

इन्सेक नेपालका निर्देशक श्रीराम बजगाईं, हुरेन्डेक नेपालका अध्यक्ष जजराज शाही, आयोनका महासचिव खिमानन्द देवकोटा, सिबिस नेपालका प्रतिनिधिलगायतले युवा अधिकार र अभियानका विषयमा आ–आफ्नो धारणा राखेका थिए ।

दुई दिनसम्म काठमाडौंमा सञ्चालन भएको सम्मेलनको उद्घाटन राष्ट्रियसभाका अध्यक्ष गणेशप्रसाद तिमिल्सिनाले गरेका थिए । यसैगरी, पहिलो दिन २८ गते दिगो विकासको स्थानीयकरण, पर्यटनमा युवाको सम्भावना, राजनीति र युवा नेतृत्व गरी तीन सत्र सञ्चालन भएको थियो ।

गैरसरकारी संस्था महासंघ नेपालका महासचिव अर्जुन भट्टराईले सञ्चालन गरेको पहिलो सत्रमा राष्ट्रिय योजना आयोगका उपसचिव यदुनाथ गौतम अतिथि वक्ताका रूपमा रहेका थिए ।

यसैगरी, राजनीति र युवा नेतृत्वसम्बन्धी समूहगत छलफलमा अतिथि वक्ताहरू नेपाली काङ्ग्रेस केन्द्रीय कमिटी सदस्य नैनसिंह महर, नेकपा एमाले केन्द्रीय कमिटी सदस्य माधव ढुङ्गेल, नेकपा माओवादी केन्द्र पोलिटब्युरो सदस्य रामदीप आचार्य, नेकपा एकीकृत समाजवादीका केन्द्रीय कमिटी सदस्य रमा आलेमगरले वर्तमान नेपाली राजनीतिमा देखिएका चुनौती, अवसर तथा सम्भावना विषयमा आफ्नो विचार व्यक्त गरेका थिए । 'युवा र पर्यटन' विषयक सत्रमा नेपाल पर्यटन बोर्डका व्यवस्थापक सूर्य थपलियाले पर्यटनका विविध आयाम तथा युवाको भूमिकाबारे प्रस्ट्याए ।

यसैगरी, दोस्रो दिन २९ गते युवा र उद्यमशीलता तथा युवा, जलवायु र जैविक विविधता संरक्षण गरी दुई सत्रमा समूहगत छलफल भयो । पत्रकार तथा युवा अभियन्ता सोबिता गौतमले सञ्चालन गरेको युवा र उद्यमशीलतासम्बन्धी सत्रमा श्रम, रोजगार तथा सामाजिक सुरक्षा मन्त्रालयका उपसचिव कविराज उप्रेती तथा युवा उद्यमी प्रकृति मैनाली अतिथि वक्ताको रूपमा रहेका थिए ।

कार्यक्रममा वातावरणीय अधिकारलाई युवा तथा बालबालिकाको मानवीय अधिकारका रूपमा अगाडि बढाउन स्थानीय तहदेखि राष्ट्रियस्तरमा बहस तथा पैरवी गर्न राष्ट्रिय संयन्त्र आवश्यक रहेको कार्यक्रम संयोजक अमृत देवकोटाले बताए ।

इन्सेकका निर्देशक श्रीराम चौलागाईंले सञ्चालन गरेको यस सत्रमा राष्ट्रिय बालअधिकार परिषद्का पूर्वकार्यकारी निर्देशक तथा बालअधिकारविज्ञ मिलनराज धरेल, एनएसीजीका सह–अध्यक्ष किरण थापा, बालअधिकारविज्ञ विष्णु खत्रीलगायतले बालबालिका तथा युवाको वातावरणीय अधिकारसम्बन्धी विषयमा आ–आफ्नो धारणा राखेका थिए ।

दिगो विकासका लागि राष्ट्रिय युवा सञ्जाल, नेपालका आयोजना, राष्ट्रिय युवा परिषद्, नेपाल पर्यटन बोर्ड र गैरसरकारी संस्था महासंघसँगको समन्वय तथा टीडीएच जर्मनी, एआईएन स्ट्रोम फाउन्डेसन, गुड सेफर्ड, हुरेन्डेक नेपाल, ग्रामीण विकास संस्था काभ्रेलगायत २० भन्दा धेरै राष्ट्रिय तथा अन्तर्राष्ट्रिय संघसंस्थाहरूसँगको समन्वयमा उक्त कार्यक्रम सञ्चालन भएको हो । कार्यक्रममा देशैभरिबाट १०० भन्दा धेरै युवाहरूको सहभागिता रहेको थियो ।

दुईदिने राष्ट्रिय युवा सम्मेलनले युवामैत्री शासकीय प्रणाली स्थापना गर्न माग गर्ने, आगामी संसदीय चुनावमा ५० प्रतिशत युवा उम्मेदवारी कायम गर्न राजनीतिक दल, संसद् तथा सरकारसँग पहल गर्ने, सीप प्रवर्द्धन र उद्धमशीलतामैत्री नीति र संरचना स्थानीय तहसम्म विस्तार गर्न माग गर्नेलगायत नौबुँदे काठमाडौं घोषणापत्र जारी गर्दै राष्ट्रिय युवा परिषद्लाई हस्तान्तरणसमेत गरेको छ ।

साथै, आगामी दिनहरूमा दिगो विकास र युवाको क्षेत्रमा सरोकारवाला राष्ट्रिय तथा अन्तर्राष्ट्रिय निकाय संघसंस्था सहकार्य गर्दै अगाडि बढ्ने र निकट भविष्यमै दक्षिण एसियायी युवा सम्मेलनको तयारीमा संस्था लागेको महासचिव सञ्जीव न्यौपानेले जानकारी दिए । दुईदिने सम्मेलनको अध्यक्षता केन्द्रीय अध्यक्ष अमृत देवकोटाले गरेका थिए ।

प्रकाशित मिति: सोमबार, साउन ३०, २०७९ १२:१५