परराष्ट्र मन्त्रालयमा नायब सुब्बा संघर्ष समिति गठन

A+ A A-

परराष्ट्र मन्त्रालयका नायब सुब्बाहरूले संघर्ष समिति गठन गरेका छन् । नायब सुब्बा बचाउ आन्दोलनमा ऐक्यबद्धता स्वरुप मंगलबार मन्त्रालय परिसरमा भेलाको आयोजना गरी नायब सुब्बाहरूले संघर्ष समिति गठन गरेका हुन् ।

परराष्ट्र मन्त्रालय आधिकारिक ट्रेड युनियनका अध्यक्ष रमेश गैह्रेको संयोजकत्वमा गठित सात सदस्यीय संघर्ष समितिमा मन्त्रालय, राहदानी विभाग तथा कन्सुलर सेवा विभागमा कार्यरत नायब सुब्बाहरू सदस्य रहेका छन् । सदस्यहरूमा कुलचन्द्र अर्याल, भोजकुमार भट्टराई, गीता घिमिरे, दिपक शर्मा, सुरज अम्गाइँ र दिपराज जोशी छन् ।

संघर्ष समितिले नायब सुब्बा बचाउ आन्दोलनमा परराष्ट्र मन्त्रालयका नायब सुब्बाहरूको तर्फबाट समन्वय गर्नेछ । परराष्ट्र सेवामा कार्यरत नायब सुब्बा तहका कर्मचारीहरूको वृत्ति विकासको अवस्था अत्यन्तै दयनीय हुँदा नायब सुब्बाबाटै अवकाश पाउने अवस्था रहेको, वैदेशिक तालिम तथा भ्रमणमा नायब सुब्बा तहका कर्मचारीहरूमाथि विभेद हुने गरेको, नियोग तथा मन्त्रालयमा रहेका दरबन्दीको अनुपात नमिल्दा सुब्बाहरूलाई नियोग सरुवामा लामो समय लाग्ने गरेको, नायब सुब्बाहरूको वैदेशिक भत्ता अन्यन्त न्यून हुनुका साथै सन्ततीहरूको शैक्षिक भत्तामा समेत असमानता रहेकाले आफ्ना हकहित र वृत्ति विकासका मागहरू पूरा गराउन संघर्ष समिति गठन गरिएको संयोजक गैह्रेले बताए ।

संघर्ष समितिले आफ्ना मागहरू पूरा गराउन परराष्ट्रमन्त्री तथा परराष्ट्र सचिवलाई ज्ञापन पत्र बुझाउनुका साथै आधिकारिक ट्रेड युनियन र अन्य पेसागत संगठनका पदाधिकारीसँग भेटघाट गर्ने कार्यक्रम समेत तय गरेको छ । असमान तलब वृद्धि खारेज गरी समान रूपमा सबै दर्जाको तलब वृद्धि गर्नुपर्ने, राजपत्र अनंकित कर्मचारीहरूको समेत वृत्ति विकासको अवसर सुनिश्चित गरी संघीय निजामती सेवा ऐन जारी गर्नुपर्ने, निजामती सेवामा तहगत प्रणाली लागू गर्नुपर्ने लगायतका माग राखी देशभरका नायब सुब्बा तथा खरिदार तहका कर्मचारीहरू सोमबारदेखि आन्दोलनमा छन् ।

आन्दोलन स्वरुप देशभरका नायब सुब्बाहरूले आज सामूहिक बिदा लिएका छन् । परराष्ट्र मन्त्रालयका नायब सुब्बाहरू पनि आज हाजिर नगरी मन्त्रालयमा भेला भई नायब सुब्बा बचाउ आन्दोलनमा सहभागी भएका हुन् ।