माेफसलका पूर्वखेलाडी : काेही चिया पसले, काेही मजदुर

A+ A A-

सरकारी उदासीनताका कारण जनकपुरधाम क्षेत्रका खेलाडीहरु कष्टकर जीवन बिताउन बाध्य छन् । एकताका राष्ट्रिय स्तरमै नाम चलेका खेलाडीहरु अहिले खेल क्षेत्रबाट पलायन मात्र भएका छैनन्, खेल क्षेत्रमा लागेकाेमा पछुताइरहेका छन् । केही खेलाडी परिवारकाे गर्जाे टार्नकै लागि बिदेसिएका छन् । केही पुँजी हुने खेलाडी भने व्यापार व्यवसाय गरिरहेका छन् भने पुँजी नहुने कतिपय खेलाडी मजदुरी गर्न बाध्य छन् ।

जनकपुर उपमहानगरपालिका-७ का दिनेशसिंह जनकपुर क्षेत्रमा फुटबलका चर्चित खेलाडी थिए । खेल प्रतिभाकै कारण दिनेशलाई जनकपुर चुरोट कारखानामा जागिर दिइएको थियो । तर, दिनेश अहिले खाजा पसल खोलेर जीवन निर्वाह गरिरहेका छन् । दिनेशले भने, जचुकालीमा ११ वर्ष जति काम गरें, कारखाना कमजोर बनेपछि हामीलाई हटाइयो । त्यसपछि जीवन जिउन गाह्रो भएको छ ।

६१ वर्षीय दिनेश युवाहरुलाई प्रशिक्षण दिएर राष्ट्रिय स्तरको खेलाडी बनाउने धोको रहेको बताउँछन् । तर, पेटले खाजा पसलभन्दा बाहिर जान नदिएकाे उनकाे गुनासाे छ । एक समयमा जनकपुर चुरोट कारखानाको फुटबल टिम थियो, त्यो टिममा दिनेशका अतिरिक्त अभयकान्त झा, वीरेन्द्र लामा, राजु थापा, ठक्कन साहलगायतका खेलाडी थिए । जचुकालीको टिमसँग नेपालका कुनै पनि फुटबल टिम भिड्न डराउँथे । जचुकालीलाई नै राष्ट्रिय टिमसम्म भन्ने गरिन्थ्यो । विदेश जाँदा पनि यही टिमका खेलाडीहरु खेल्न जान्थे । आफू विदेश जान नसके पनि नेपालका अधिकांश ठाउँमा हुने प्रतियोगितामा सहभागी भएकाे दिनेशले बताए ।

राम युवा कमिटीका उपाध्यक्ष एवं खेलप्रेमी परमेश्वर साह दिनेश उनकाे जमानका अब्बल खेलाडी रहेकाे बताउँछन् । सामाजिक कार्यकर्ता सोहन ठाकुर पनि दिनेशको खेलसँग निकै प्रभावित रहेको बताउँछन् ।

कांग्रेस नेता रामएकवाल साहले युवाहरुलाई खेलतर्फ आकर्षित नगराएकै कारण युवाहरु लागूऔषध सेवनतर्फ आकर्षित भइरहेकाे बताए । उनले भने, युवाहरुलाई प्रशिक्षण दिई राम्रो खेलाडी बनाउने दर्जनौं प्रशिक्षकहरु त्यतिकै घुमिरहेका छन् । तर, त्यसको हामीले सदुपयोग गर्न सकिरहेका छैनौं, यसलाई विडम्बना नै भन्नुपर्छ ।