फिल्म 'प्रकाश'को 'जोर मैना' गीत : अर्ग्यानिक प्रेमको सुन्दर प्रस्तुति

A+ A A-

जिन्दगी अरुले बिताइदिँदैन आफैँले जिउने हो, जोर मैना
आफ्नो घाउ अरुले बाँडिदिँदैन आफैँले सहने हो, जोर मैना
हेर जोर मैना घामजून हाम्रै हो, हेर जोर मैना संसार हाम्रै हो ।

सुदूरपश्चिमको दुर्गम ठाउँमा सामान्य जीवन बिताइरहेका दुई पात्र छन् । उनीहरू प्रेममा छन् । केटा पात्र शिक्षक हो, ऊ आफैँले पढाउने विद्यार्थीसँग प्रेममा छ । कानुनको आँखाबाट त यो प्रेम ‘अवैध’ छ । तर, सुदूर गाउँ जहाँ त्यो कानुन पुगेकै छैन ।

उनीरूको प्रेम पवित्र छ । तर, राधालाई परिवारको छेकबार छ । उसलाई प्रेम गर्ने केटा परिवारको मूल्यांकनमा योग्य छैन, ऊसँग सीप जायजेथा केही छैन । मनमा अंकुराइरहेको प्रेमलाई दबाएर राधा प्रेमीबाट टाढिन खोज्छे । अचानक टाढा भएकी प्रेमिकाको पिछा गरिरहेको प्रेमीलाई भनिदिन्छे- तँ मलाई मन पर्न छाड्यो ।

तर, दुुवैले एकअर्कालाई छाड्न सजिलो कहाँ छ र । अनि सुरु हुन्छ दुवैको छटपटाहट र अन्तरद्वन्द्व । यो दृश्य, फिल्म ‘प्रकाश’को भर्खरै युट्युबमा रिलिज भएको गीतको हो । कुनै गीतको शब्द, संगीत र दृश्यले यसरी बाँध्छ कि त्यो पटकपटक सुन्न र हेर्न मन लागिरहन्छ । यो गीत त्यस्तै भइदियो ।

गीतका शब्दमा कविताका बिम्बहरू छन् । बिम्बहरूले प्रेम र जीवनका दर्शनबारे बोल्छन् । गीतमा बज्ने सारंगीले हृदय रेटिरहन्छ । संगीतले दृश्यसँग एकाकार मात्र गराउन्न, प्रेमथाका स-साना दृश्यसँग साक्षात्कार पनि गराउँछ ।

गीतमा देखिने दृश्यमा जुन प्रेमकथा छ, त्यहाँ शहरको अलिकति पनि गन्ध पाइन्न । शहरसँग साक्षात्कार नभएको, सडकसञ्जालसमेत नजोडिएको गाउँमा हुर्किएका युवायुवतीको हुर्किरहेको प्रेमकथा प्रस्तुत गरिएको छ । यो प्रेममा युवायुवतीले पछ्याउने पश्चिमाशैली भेटिन्न ।

प्रेमको ‘अर्ग्यानिक सौन्दर्य’लाई पस्किएको छ । दृश्यमा प्रेमको पर्खाल वर्ग हो । प्रेमलाई वर्गले विभाजन गर्न खोज्छ । शब्द, संगीत र दृश्यले सुुदूरपश्चिमको लवज र माटोलाई अनुभूत गराउँछन् ।

प्रेमीले आफ्नो छटपटाहट व्यक्त गर्दा एउटा सुन्दर बिम्बको प्रयोग गरिएको छ-

कर्णाली बरु क्या घुम्या छ र, यो मन त्यति घुम्या छ
दु:ख बरु क्या घुम्या छ र, जीवन त्यति घुम्या छ ।

गीतका दृश्यहरूको संयोजन सुन्दर छ । जस्तो कि ‘पछि नलाग’ भनेर प्रेमिका केही पाइला पर पुगेपछि फर्केर हेर्छिन् । उनी अडिएको ठाउँको भित्तामा ‘मुक्ति जिन्दावाद’ लेखिएको छ । ऊ परिबन्धबाट मुक्त चाहन्छे, तर उम्कन सकेकी छैन । यो बिम्बात्मक दृश्य छ ।

रात पर्नुअघि टल्किएको घामको दृश्य आकर्षक देखिन्छ । अन्तिम दृश्यमा प्रेमी डिलमा बसिरहेको छ । प्रेमीलाई भेट्न आएकी राधाको हातमा किताब च्यापिएको छ । ऊ प्रेमीलाई जिस्काउन मसिनो ढुंगा फाल्छे । प्रेमी फर्किएर जब राधालाई हेर्छ, त्यो भावभंगी निकै आकर्षक लाग्छ ।

प्रदीप खड्काले निभाएको प्रेमी पात्रले सुदूरपश्चिमको पात्रलाई प्रतिबिम्बित गरेको छ । चकलेटी अनुहारका प्रदीपले ‘प्रकाश’मा चरित्र अभिनेताका रूपमा काम गरेका छन् । उनको कठोर मिहिनेत गीतमा निभाएको चरित्रले झल्काउँछ । प्रेमिका अर्थात् युवतीको भूमिकामा देखिएकी रानु योगीको अभिनयले तानिरहन्छ । फिल्म ‘प्रकाश’को ‘जोर मैना’ गीतले फिल्ममाथि आसलाग्दो संकेत गरेको छ ।

गीतमा दीपक शर्माको शब्द/संगीत छ । ध्रुव बिस्कोले स्वर दिएका छन् । फिल्म ‘प्रकाश’लाई दिनेश राउतले निर्देशन गरेका छन् । फिल्मको पटकथा विकास सुवेदीले लेखेका छन् । भदौ १० गते ‘प्रकाश’ प्रदर्शनमा आउनेछ ।