रेल नचल्दै जनकपुर–जयनगर रेल्वेको लिक बाढीले भाँच्याे

A+ A A-

अविरल वर्षाको कारण जनकपुर–जयनगर रेल्वेको लिक टुटेको छ । धनुषाको जनकनन्दनी गाउँपालिकास्थित इनरुवामा रहेको रेल्वे लिकमाथि ५ फिटसम्म पानी जमेपछि रेल्वेको लिक टुटेको रेल्वे विभाग जनकपुरधामका साइट इन्जिनीयर बिनोद प्रसाद ओझाले जानकारी दिए ।

रेल्वेको करिब ६० देखि ७० मिटर सम्मको लिक टुटेको अनुगमनमा गएका प्राविधिकहरुले जनाएका छन् । इन्जिनियर ओझाका अनुसार सो स्थानमा अहिले पनि पानी जमेको छ ।

जयनगरदेखि बर्दिबाससम्म ६९ किमी रेलमार्गमा आठ स्टेशन र ६ हल्ट गरी १४ विश्रामस्थल तोकिएको छ । विभागको साइट कार्यालय जनकपुरका अनुसार जयनगर, खजुरी, इनरुवा, खजुरी, वैदेही, कुर्था, महोत्तरीको खुट्टापिराडी र बर्दिबास गरी आठ स्टेशन छन । महिनाथपुर, देउरी परवाहा, जनकपुर, महोत्तरीको लोहारपट्टी, सिंग्याही र रामनगर गरी ६ स्थानमा हल्ट छन् । पहिलो चरणमा कूल ३५ किलोमिटर लामो उक्त रेलमार्गमा रेल चलाउने तयारी भएको छ । रेलमार्गमा एक चरणको परीक्षण सम्पन्न भइसकेको छ । बर्दिवास–जनकपुर–जयनगर–कुर्था–विजयपुराको कूल लम्बाइ ६९ किलोमिटर छ । त्यसमा पनि ३५ किलोमिटर रेलमार्ग निर्माण भइसकेर हस्तान्तरण गर्ने अवस्थामा पुगेको छ ।

इन्जिन र बोगी किन्न नेपाल सरकार कार्य गाडी बढाइसकेको छ । इन्जिन र बोगी आउने बित्तिकै रेल चालु हुने थियो । भारत सरकारको १० अर्ब रूपैयाँ सहयोगमा उक्त रेलमार्ग निर्माण भएको हो । निर्माण भएको रेलमार्ग ब्रोडगेज हो ।