एनआरएनएका प्रमुख संरक्षक घलेले गठन गरे महाधिवेशन आयोजक समिति, निर्वाचन समिति पनि पुनर्गठन

एनआरएनएका प्रमुख संरक्षक घलेले गठन गरे महाधिवेशन आयोजक समिति, निर्वाचन समिति पनि पुनर्गठन

A+ A A-

गैरआवासीय नेपाली संघ (एनआरएनए) का प्रमुख संरक्षक शेष घलेले संघको केन्द्रीय समितिको निर्वाचन गराउन निर्वाचन समिति पुनर्गठन गरेका छन् ।

गैरआवासीय नेपाली संघको विधान २००३ (२०२१ संशोधनसहित) को धारा १६.१.४ अनुसार उनले निर्वाचन समिति पुनर्गठन गर्नुका साथै महाधिवेशन आयोजक समिति पनि गठन गरेका छन् ।

गत वर्ष निर्वाचित एनआरएनएका ६५ राष्ट्रिय समन्वय परिषद् (एनसीसी) हरूमध्ये ५० भन्दा बढी एनसीसीहरूले गत आइतबार एक बैठक गरी प्रमुख संरक्षक घलेलाई संस्थाको संरक्षण गर्न आवश्यक कदम चाल्न म्यान्डेट दिएका थिए ।

निर्वाचन समितिको प्रमुख निर्वाचन अधिकृतमा विश्व बराल (अमेरिका) तथा सदस्यहरूमा इन्द्रा बन (अस्ट्रेलिया), अधिवक्ता वासुदेव फुलारा (अमेरिका), मेजर (रिटायर्ड) डमर घले (युके), पुष्प थापा (जर्मनी), बिमल सुवेदी (कतार) तथा प्रकाश धमला (दक्षिण कोरिया) रहेका छन् ।

घलेले संघको १०औँ महाधिवेशन आयोजना गर्न एक महाधिवेशन आयोजक समिति पनि गठन गरेका छन् । संघका उपाध्यक्ष सोनाम लामाको संयोजकत्वमा गठित महाधिवेशन आयोजक समितिको सह-संयोजकमा अर्का उपाध्यक्ष मन केसी छन् । आयोजक समितिको सदस्यमा सबै एनसीसी अध्यक्षहरू, आईसीसीका पदाधिकारीहरू, क्षेत्रीय संयोजक तथा क्षेत्रीय उपसंयोजकलगायत रहनेछन् ।

१०औँ महाधिवेशन मार्च २२ देखि २५ तारिख (चैत ८ देखि ११) सम्म काठमाडौँमा आयोजना हुने बताइएको छ ।

गत अक्टोबर २०२१ मा हुनुपर्ने १०औँ महाधिवेशन निर्वाचन प्रतिनिधिलगायतका विवादका कारण हुन नसकेपछि आईसीसीले प्रमुख संरक्षक घलेको संयोजकत्वमा उच्चस्तरीय समिति गठन गरेको थियो । उच्चस्तरीय समितिले झण्डै २,६०० मतदाताहरू रहेको सूची तयार गरेको छ । सोही सूचीका आधारमा निर्वाचन गराइने जनाइएको छ ।

प्रमुख संरक्षक घलेले संघका सबै डेलिगेट्स तथा अभियन्ताहरूलाई सकभर छिटो काठमाडौं आउन आग्रह गरेका छन् । उनले संस्था जोगाउन र एकजुट पार्न विधानले दिएको अधिकार प्रयोग गरी आफूले उक्त निर्णय गरेको बताए । उनले नेपाल सरकारसँग सहकार्य गरी सभ्य र भव्य रूपमा १०औँ महाधिवेशन सम्पन्न गर्न सहयोग गर्न सबैलाई अपिल पनि गरेका छन् ।

प्रकाशित मिति: शुक्रबार, फागुन २७, २०७८ १५:३०