रुस र युक्रेनको युद्धले नेपालमा दोब्बरले मूल्यवृद्धि हुने खतरा बढ्यो : एमाले सचिव विष्ट

रुस र युक्रेनको युद्धले नेपालमा दोब्बरले मूल्यवृद्धि हुने खतरा बढ्यो : एमाले सचिव विष्ट

A+ A A-

नेकपा एमालेका केन्द्रीय सचिव गोकर्ण विष्टले नेपालमा दोब्बरले मूल्यवृद्धि हुने खतरा निरन्तर बढिरहेको बताएका छन् । गृह जिल्ला गुल्मीको मदाने गाउँपालिका वडा नम्बर ३ मा निर्माण गरिएको एकीकृत वस्तीमा पीडितहरूलाई घर हस्तान्तरण गर्दै विष्टले नेपालमा दोब्बरले मूल्यवृद्धि हुन सक्ने खतरा बढिरहेको बताएका हुन्।

‘पेट्रोलियम पदार्थको मूल्य प्रतिलिटर १ सय ५० रुपैयाँ पुगिसकेको छ’,उनले भने, ‘रुस र युक्रेनको युद्ध नरोकिएमा नेपालको मूल्यवृद्धि दोब्बरले वृद्धि हुन सक्छ ।’ निरन्तरको मूल्यवृद्धि र पछाडि धकेलिएको आर्थिक अवस्थामा वर्तमान सरकार गम्भीर बन्न नसकेको विष्टको आरोप छ ।

नेपालले अहिले निरन्तर ब्यापार घाटा बेहोरेको अवस्थाले गर्दा अहिले देश अप्ठ्यारो अवस्थामा रहेको उनले बताए । निरन्तर उपभोग गर्ने सबै समानहरू भारतबाट खरिद गर्नुपर्ने अवस्थामा नेपाल रहेका कारणले गर्दा आर्थिक हिसाबले देश पछाडि धकेलिएको बिष्टको भनाइ छ ।

वर्तमान गठबन्धनको सरकारले ८ महिना बित्दा पनि २० प्रतिशत पनि विकास खर्च नगर्नु लज्जास्पद भएको विष्टले बताएका छन् । सरकारले आर्थिक वर्ष सकिन लाग्दा पनि जम्मा १७–१८ प्रतिशत बजेटमात्र खर्च गरेको भन्दै उनले वर्तमान सरकारले देशको अर्थतन्त्र लथालिङ्ग बनाएको समेत बताए ।

फरक प्रसंगमा विष्टले पहाडी क्षेत्रको ग्रामीण भेगमा सोचेजस्तो विकास गर्न लामो समय लाग्ने बताए । सिर्सेनीमा सालझण्डी–ढोरपाटन राजमार्ग विस्तारको क्रममा क्षति पुगेका र भूकम्पले क्षति गरेका १७ घरपरिवार पीडितलाई एकीकृत नमुना वस्ती बनाएर घर हस्तान्तरण गरिएको हो ।