नियमावली लत्याउँदै प्रहरी हेडक्वार्टर, प्रहरी जवानलाई कहिल्यै समयमा दिइँदैन जाडोको लुगा

नियमावली लत्याउँदै प्रहरी हेडक्वार्टर, प्रहरी जवानलाई कहिल्यै समयमा दिइँदैन जाडोको लुगा

फाइल तस्वीर ।

A+ A A-

गृहमन्त्री बालकृष्ण खाँणले सोमबार बिहान विभिन्न १२ जिल्लाका प्रहरी प्रमुखसँग टेलिफोन गर्दै जिल्लाको समग्र शान्ति सुरक्षाको अवस्थाबारे बुझे ।

त्योबाहेक गृहमन्त्री खाँणको विशेष चासो प्रहरीको रासनभत्ता र जाडोमा न्यानो कपडाबारे थियो । गृहमन्त्रीको सचिवालयका अनुसार गृहमन्त्री खाँणले झापा, इलाम, पाँचथर, ताप्लेजुङ, त्यसैगरी धनुषा, सप्तरी, सिराहा, सर्लाही, अछाम, पर्सा, मकवानपुर र रौतहटका प्रहरी प्रमुखसँग टेलिफोन संवाद गरेका थिए ।

तर, गृहमन्त्रीको चासो भने औपचारिक मात्रै भएको केही जिल्लाकै प्रहरी प्रमुखको गुनासो छ ।

‘गृहमन्त्रीज्यूले चासो त शान्तिसुरक्षादेखि कोभिडको प्रभाव र रासन भत्तादेखि जाडोको लत्ताकपडासम्म नै गर्नुभयो । तर, तालुकदार मन्त्रालयले म यसो गर्छु भनेर खास केही भनेन, त्यो औपचारिकताका लागिजस्तै हो,’ तराईका जिल्लाका एक प्रहरी प्रमुखले भने ।

गृहमन्त्री खाँणले चासो राख्नुको पछाडि भने कारण छ- गत आर्थिक वर्षमा प्रहरी कर्मचारीले जाडाेकाे समय नयाँ लुगा नै लगाउन पाएका थिएनन् । याे पालिसमेत केही प्रहरी कर्मचारीले अझै जाडोको लुगा लगाउन पाएका छैनन् ।

प्रहरी प्रधान कार्यालयमा कार्यरत केही अधिकारीबाहेक कसैले पनि जाडोको लुगा नपाएको प्रहरी अधिकारीहरू नै बताउँछन् । प्रहरी नियमावलीअनुसार प्रहरी कर्मचारीलाई जाडोमा तीन वर्षको अन्तरालमा दुईवटा ऊनीका कमिज, एउटा ऊनीको पाइन्ट, चार वर्षमा एउटा ऊनीको ज्याकेट, एउटा क्याम्प कम्फोर्ट, दुई वर्षमा एउटा ऊनीको क्याप, एक जोर मोजा, तीन वर्षमा एउटा ऊनीको जर्सी, त्यसरी नै दुई वर्षमा ऊनीको पञ्जा, दुई वर्षमा दुई सेट ऊनीका अण्डरवेयर र दुईवटा ऊनीका गन्जी उपलब्ध गराउने व्यवस्था गरिएको छ ।

तर, नियमावलीमा भएअनुसार अहिलेसम्म आफूहरूले ज्याकेटबाहेक केही लुगा नपाएकाे अधिकांश प्रहरी जवानहरूकाे भनाइ छ । ललितपुर प्रहरी परिसरमा कार्यरत एक प्रहरी जवानले त २०६७ सालमा भर्नादेखि एक जाडाेमा एक थान सुत्ने स्लिपिङ ब्यागसमेत नपाएकाे गुनासाे गरे ।

‘लत्ताकपडामा प्रहरीमा सबैभन्दा बढी विभेद हुन्छ । यो कुरा धेरै बाहिर नआउने भएर पनि होला । हामी २०६७ सालमा दिपालयबाट भर्ना भएका टोलीले अझै जाडोमा स्लिपिङ ब्याग त पाएका छैनौँ । नियमावलीमा भएकाको त के कुरा,’ ती प्रहरी जवानले दुखेसो पोखे ।

प्रहरी प्रवक्ता एसएसपी विष्णु केसीले भने गत आर्थिक वर्षमा जाडोको कपडा नपाए पनि यो वर्ष भने अधिकांश प्रहरी कर्मचारीले पाएको दाबी गरे ।

‘यो वर्ष अधिकांश प्रहरी कर्मचारीले जाडोको कपडा पाएका छन् । एक आर्थिक वर्षमा सबै प्रहरी कर्मचारीहरूलाई कपडा खरिद गर्नसमेत बजेटको अभाव हुन्छ । हामीले कपडा पाउनुपर्ने अवधि पुगेका अधिकांश प्रहरी कर्मचारीलाई अहिले पनि वितरण गरिनै राखेका छौँ । केही प्रहरी कर्मचारी छुटेका होलान् । उनीहरूले पनि पाउँछन् नै,’ एसएसपी केसीले भने ।

तालिमेहरूले लगाउने नीलो डाङ्ग्रीको भने गत वर्ष खरिद प्रक्रियामा समस्या हुँदा अभाव भएको उनले स्वीकार गरे । प्रहरी प्रधान कार्यालयमै कार्यरत एक प्रहरी जवानले भने अझै कतिपय प्रहरी जवानले पाउनुपर्ने जाडोको लुगा नपाएको बताए ।

‘मैलेचाहिँ यसपालि पाँच वर्षपछि दोस्रो पटक जाडोको ज्याकेट पाएँ । तर, मसँगै पाउनुपर्ने साथीहरूले अझै पाएका छैनन् । प्रहरी प्रधान कार्यालयमा कार्यरत प्रहरीहरूले समयमै पाउने रहेछन् । अरुले त जाडोको लुगा गर्मी, गर्मीको लुगा जाडोमा पाउँछन् । मैले नौ वर्षको अवधिमा यो दोस्रो पटक जाडोको एउटा ज्याकेट मात्रै पाएकाे छु । जाडाेमा लगाउने अरू कपडा त अहिलेसम्म पाएका छैनाैँ । लत्ताकपडाको त भर नै हुँदैन,’ ती जवानले भने ।

जुनियर प्रहरीबाहेक उपल्ला प्रहरी अधिकारी र प्रहरी प्रधान कार्यालयमा खटिने प्रहरीले भने भनसुनकै भरमा आवश्यकताभन्दा बढी लत्ताकपडा प्रयोग गर्ने गरेको केही प्रहरी अधिकारी नै बताउँछन् ।

प्रहरी प्रधान कार्यालयले यो वर्ष पनि जाडोको एउटा ज्याकेटबाहेक अन्य लुगा उपलब्ध गराउन सकेको छैन । प्रहरी कर्मचारीलाई लत्ताकपडाबाहेक चाहिने अन्य बन्दोबस्तीका सामानसमेत प्रहरी प्रधान कार्यालयमा पर्याप्त छैन ।

प्रहरी प्रमुख आईजीपी शैलेश थापा क्षेत्रीले आफू विवादमा परिन्छ भन्ने डरका कारण आवश्यक सामग्री खरिद प्रक्रिया नबढाउँदा प्रहरी कार्यालयहरूलाई चाहिने सवारीसाधनदेखि भिड, दंगा, हुलहुज्जत नियन्त्रणमा गर्न चाहिने साधनको अभाव देेखिएकाे केही प्रहरी अधिकारी स्वीकार गर्छन् ।

प्रकाशित मिति: बुधबार, माघ १९, २०७८ १६:३५