‘रअ’ काे सुपारी लिएर अन्सारीलाई गोली हान्ने मनमित जेलमा के गर्दैछन् ?

A+ A A-

भारतीय गुप्तचर निकाय ‘रअ’ ले सुपारी दिएर हत्याका लागि प्रयोग गरेकाे कुख्यात अपराधी जसजित सिंह भनिने मनमित सिंह भाटिया अर्काे वर्षकाे फागुनमा जेल मुक्त हुँदैछन् । उत्तर प्रदेश लखनउका भाटिया कैद सजाय भुक्तान गरेर जेल मुक्त हुन लागेका हुन् । उनी हाल डिल्लीबजार कारागार भित्र राखिएको छ ।

उनलाई काठमाडौं जिल्ला अदालतले ज्यान मार्ने उद्योग र हातहतियार खरजना मुद्दामा २०६७ मा १२ वर्ष जेल सजाय सुनाएको थियो ।

सजाय अवधि पूरा गरेर भाटिया २६ फागुन २०७९ मा जेल मुक्त हुँदैछन् । उनलाई हालसम्म जेलभित्र भेट्न उनका कुनै पनि आफन्त नआएकाे जेलर बसन्त पुरीले जानकारी दिए । हक्की स्वभावका भाटिया जेलभित्र कसैसँग पनि धेरै बाेलचाल नगर्ने उनकाे भनाइ छ ।

भाटियाले २६ फागुन २०६७ मा सुन्धारा कारागारभित्र कैद जीवन भुक्तान गरिरहेका बाराका युनुष अन्सारीमाथि ६ राउण्ड गोली प्रहार गरेका थिए । निधार ताकेर हानेको ५ राउण्ड गोली नलागे पनि १ गोली भने अन्सारीको हातको कुहिनोमा लागेको थियो । त्यो घटनामा अन्सारी भाग्यबस बाँचेका थिए ।

अन्सारीमाथि गोली प्रहार गर्दा फ्रान्सेली नागरिक 'विकिनी किलर'को नामबाट चर्चित चार्ल्स शोभराजलाई भेट्ने बहाना बनाएर भाटिया कारागार पुगेका थिए ।

अन्सारीलाई गोली नलागेपछि भने भाटियाले प्रयोग गरेको जर्मन रिभल्वर सडकमै फालेर प्रहरीलाई गिरफ्तारी दिएका थिए । उनी १९ असाेज २०६६ मा नेपालगञ्जका अब्दुलमजिद मनिहार हत्यामासमेत संलग्न आरोपी हुन् ।

मनिहारलाई भारतीय नक्कली नोटको कारोबारी रहेको भन्दै उनले गोली हानी हत्या गरेको प्रहरीकै दाबी छ । अन्सारी पनि भारतीय नक्कली नोटको कारोबारी रहेको भन्दै उनले हत्या प्रयास गरेका थिए ।

अन्सारी १८ पुस २०६६ मा २५ लाख ४४ हजार भारतीय रुपैयाँसहित पक्राउ गरेका थिए । सोही अभियोगमा पुर्पक्षका लागि थुनामा रहेका अन्सारीलाई भटियाले कारागारभित्रै गोली हानेका हुन् ।

अन्सारीले अझै भारतीय नक्कली नोटको कारोबार भने छोडेका छैनन् । पहिलो पटक २०६६ सालमा पक्राउ परेर १८ भदौ २०७० मा छुटेका अन्सारी त्यसको ५ महिनापछि पुनः १० माघ २०७० मा ३५ लाख भारतीय रुपैयाँसहित पक्राउ परेका थिए । उक्त अभियोगमा जेल भुक्तान गरेका अन्सारी २ फागुन २०७४ मा छुटेका थिए । त्यसको २ वर्षपछि गत १० जेठ २०७६ मा फेरि ७ करोड भारतीय रुपैयाँसहित त्रिभुवन अन्तर्राष्ट्रिय विमानस्थलबाट पक्राउ परेका थिए ।

उनी पनि सुन्धारा कारागार भित्र छन् । उसाे त उनी बाँच्नकै लागि जेल जान खाेज्ने गरेकाे पनि प्रहरीकाे दाबी छ । जेल बाहीर बसे भारतले कुनै पनि बेला सिध्याउन सक्ने भय उनमा छ । अन्सारीलाई पाकिस्ताले प्रयाेग गर्ने गरेकाे दाबी ‘रअ’ काे छ ।

अन्सारी बाराका तक्कालीन (नेकपा) एमाले नेता तथा पूर्वमन्त्री सलिम मियाँ अन्सारीका छोरा हुन् ।

यसरी भारतीय जाली नोटको कारोबार गर्नेलाई एकपछि अर्काे गोली प्रहार गर्ने भाटिया भारतीय गुप्तचर निकाय ‘रअ’ को निर्देशनमा भारतविरोधी गतिविधमा लागेकाहरूलाई गोली हान्ने ‘सुटर’ रहेको अनुसन्धानमा संलग्न प्रहरी अधिकारीको भनाइ छ ।

अन्सारीलाई गोली हान्न भाटियाले १५ लाख भारतीय रुपैयाँको सुपारी लिएको जनाइको छ ।

अन्सारीलाई पहिले भारतीय प्रहरीको मोस्ट वान्टेडको सूचीमा रहेका अन्तर्राष्ट्रिय अपराधी दाउद इब्राहिम निकट व्यक्ति रहेको आरोप पनि भारतीय सञ्चार माध्यमहरुले लगाउने गरेका थिए । तर, पछि उनै भाटियालाई ‘रअ’ले भारत विरोधी क्रियाकलापमा संलग्नहरूको हत्यामा प्रयोग गरेको प्रहरी अधिकारीको दाबी छ ।

प्रकाशित मिति: शुक्रबार, माघ १४, २०७८ १३:२८