प्रहरी र तालिमप्राप्त कुकुरले समेत 'क्लु' नभेट्ने गरी घरमै पत्नीको शव गाडेर भारत पुगेका थिए सीताकुमार

प्रहरी र तालिमप्राप्त कुकुरले समेत 'क्लु' नभेट्ने गरी घरमै पत्नीको शव गाडेर भारत पुगेका थिए सीताकुमार

A+ A A-

धनकुटा नगरपालिका–४ छारागाँउकी ५२ वर्षीया सीता श्रेष्ठ १६ पुसदेखि नै कसैको सम्पर्कमा थिइनन् । उनका श्रीमान सीताकुमार श्रेष्ठसमेत कहिले घर त कहिले मोरङ, कहिले सुनसरी र कहिले धनकुटा घर पुग्थे । उनको छटपटाहट शंकास्पद थियो ।

१९ पुससम्म पनि सीता कसैको सम्पर्कमा नआएपछि छरछिमेकले चासो राख्न थाले । त्यहीबीचमा उनका श्रीमान सीताकुमार समेत एकाएक सम्पर्क बिहीन भइदिए । घरमा १२ वर्षीया सुस्त मनिस्थितिका छोरामात्रै थिए । सीताकुमार पनि सम्पर्कबिहीन भएपछि गाउँभर झन् ठूलो हल्ला फैलियो- सीता श्रेष्ठका श्रीमान श्रीमती नै बेपत्ता छन् । उनीहरूले खोजीका लागि आफन्त प्रहरीमै पुगे ।

सीताकी आफन्त अरुण श्रेष्ठले प्रहरीलाई फुपु र फुपाजुको खोजीका लागि हुलियासहितको निवेदन २१ पुसमा जिल्ला प्रहरी कार्यालय धनकुटालाई दिए । प्रहरीमा निवेदन परेपछि प्रहरी टोली सीताको घरमै पुग्यो । अन्य छरछिमिकीलाई समेत सोधपुछ गर्‍यो । तर, केही ‘क्लु’ फेला पारेन । बरु सीताको घरभित्र प्रहरीले शंकास्पद केही रगतका टाटा फेला पार्‍यो ।

सीताको घरमा पुगेका प्रहरीलाई घटना रहस्यमय लागेपछि तालिमप्राप्त कुकुरको प्रयोग गरियो । तर, कुकुरले समेत घरभित्रको कुनै शंकास्पद ‘मुमेन्ट’ देखाउन सकेन । प्रहरी टोली रित्तो हात फर्कियो । उता सीताकुमार श्रेष्ठको मोबाइल लोकसन भने शंकास्पद देखिन्थ्यो ।

कहिले मोबाइलको ‘स्वीच अन’ हुन्थ्यो केहीले ‘अफ’ प्रहरीलाई नै उनको भूमिका शंकास्पद लाग्यो । पछिल्लो समय भने सीताकुमारको मोबाइलको लोकेसन ललितपुरको बाँडेगाउँ पुगेर ‘अफ’ गरेको देखिएको थियो ।

त्यही लोकेसनका आधारमा धनकुटा प्रहरीले लालितपुर इलाका प्रहरी कार्यालय बाँडेगाउँको सहयोगमा २२ दिनपछि आइतबार नियन्त्रण लिएको हो । उनी बाँडेगाउँ छोरीको घर पुगेका थिए । धनकुटा प्रहरीलाई उनीसँगै उनकी श्रीमतीसमेत फेला पर्छिन् कि भन्ने अनुमान गरेको थियो ।

तर, जब सीताकुमारले आफूले श्रीमतीको हत्या गरेको बयान प्रहरीमा दिए प्रहरी नै चकित पर्‍यो । सीताकुमारले कुटपिट गरेर श्रीमतीको हत्या गरेको बयान प्रहरीलाई दिएका छन् । हत्यापछि सीताको शव उनले भुइँतलामा पुरेर फरार भएका थिए । प्रहरीले सोमबार शव सडेको अवस्था निकालेको छ ।

जिल्ला प्रहरी कार्यालय धनकुटाका प्रहरी नायब उपरीक्षक (डीएसपी) सुरज कार्कीकाअनुसार, सीताकुमारले १६ पुसमै श्रीमतीको हत्या गरेको खुलेको छ । मादक पदार्थ सेवन गरेका सीताकुमारले १६ पुसमा कुटपिट गरेर सुतेको र १७ पुसमा मात्रै श्रीमतीको मृत्यु भएको चाल पाएको डीएसपी कार्कीले बताए ।

‘घरायसी विषयमै विवाद हुँदा सीताकुमारले श्रीमतीलाई कुटपिट गरेको देखिन्छ । त्यहीँ आगेबका कारण कुटपिट भएपछि शवलाई घरभित्रकै भुइँतलामा गाडेका रहेछन्,’ डीएसपी कार्कीले भने । श्रीमतीलाई गाडेपछि उनी भारतसमेत पुगेको खुलेको छ । तर, ललितपुर पुगेपछि भने उनी प्रहरी फन्दामा परेका हुन् । घरभित्र भुइँतलामा शव गाडेको र बाख्रासमेत राख्ने गरेकाले प्रहरीले पत्ता लगाउन नसकेको डीएसपी कार्कीले बताए ।

प्रहरीको तालिमप्राप्त कुकुरले समेत सीताकुमारको घरभित्र घरेलु रक्सी निर्माण गर्ने र घटनालगत्तै अन्य गन्ध बढी भएकाले पत्ता नलाउन नसकिएको प्रहरीको दाबी छ । उनीमाथि ज्यान मुद्दमा प्रहरीले अनुसन्धान जारी राखेको छ ।

प्रकाशित मिति: बुधबार, माघ १२, २०७८ १३:४०