गोंगबु सामूहिक बलात्कार प्रकरण: प्रहरीले होटल सञ्चालकलाई किन बनायो प्रतिवादी ?

गोंगबु सामूहिक बलात्कार प्रकरण: प्रहरीले होटल सञ्चालकलाई किन बनायो प्रतिवादी ?

A+ A A-

गोंगबुमा ‘सामूहिक बलात्कार’ भएको एक घटनाको थुनछेक बहस सुरु भएको छ । जिल्ला अदालत काठमाडौंका न्यायाधीश रामचन्द्र पौडेलको इजलासमा थुनचेक बहस सोमबारदेखि सुरु भएको हो ।

गत १२ पुसमा सुर्खेतकी ३२ वर्षीया एक महिलालाई बलात्कार गरेकाे आरोपमा प्रहरीले नौ जनालाई पक्राउ गरेको थियो । ती महिला काम खोज्न काठमाडौं आएकै दिन बलात्कृत भएकी थिइन् ।

बलात्कारकाे अभियाेगमा मुगु छायानाथ रारा नगरपालिकाका सात जना पक्राउ परेका थिए ।

आरोपितले १२ पुसमा ती महिलालाई नयाँ बसपार्कस्थित मित्रनगरको एक होटल र अर्को दिन थप दुईवटा होटलमा पुर्‍याएर बलात्कार गरेको प्रहरीले दाबी गरेको छ ।

बलात्कार आरोपमा पक्राउ परेका सबै वैदेशिक रोजगारीका लागि काठमाडौं आएर बसेका युवाहरू हुन् । पक्राउ पर्नेमा मुगु छायानाथ रारा नगरपालिकाका २४ वर्षीय युवराज बडुवाल, २३ वर्षीय हिक्मत नेपाली, १९ वर्षीय दीपक नेपाली, २३ वर्षीय शिवहरि बुढा, २५ वर्षीय हस्त नेपाली, २१ वर्षीय सुरेश सेजुवाल र मुगु रारा नगरपालिका–११ का २४ वर्षीय चन्द्र साउद र कपिलवस्तु बुद्धभूमिका गोपालकुमार शिरीष छन् ।

प्रहरीले गरेको अनुसन्धान प्रतिवेदनमा बडुवाल र नेपाली नै मुख्य अभियुक्त बनाइएको छ । उनीहरूबाहेक प्रहरीले तीनवटै होटलका सञ्चालकलाई समेत प्रतिवादी बनाएकाे छ । पूजा गेष्ट हाउस, आयुष गेष्ट हाउस र पाँचथर सप्तकोशी गेष्ट हाउसका सञ्चालकहरूलाई बलात्कार घटनाका मतियार बनाइएको हो ।

सम्भवतः एउटा बलात्कारकाे घटनामा यति धेरै प्रतिवादी बनाएर मुद्दा अदालत पुगेको पहिलो घटना हो ।

प्रहरीको अनुसन्धानमा १२ गते राति महिलाले सहमतिमै मदिरा पिएर बडुवाल र नेपालीसँग यौनसम्बन्ध राखेको खुलेको थियो । त्यसको भोलिपल्ट नेपालीले आफ्नै अन्य साथीलाई प्रतिव्यक्ति ३ सय रुपैयाँको हिसाबले महिलाले यौनसम्बन्ध राख्न दिने भन्दै पैसा उठाएर यौनसम्बन्ध राख्न लगाएका थिए ।

त्यसका लागि नेपाली आफैँले अन्य छ जना साथीबाट रकमसमेत उठाएको प्रहरीसँग साबिती बयान दिएका छन् । तर, साथीहरूबाट उठाएको रकम भने ती महिलालाई बुझाएका थिएनन् ।

त्यसपछि भने महिलासँग उनीहरू छुट्टिइसकेका थिए । मुगुका सबै युवासँग छुट्टिएपछि भने ती महिला गोपालकुमार शिरीषसँग पनि पैसाकै लागि यौनसम्बन्ध राख्न अर्को होटल पुगेकी थिइन् ।

तर, गोपालले यौनसम्बन्धपछि रकम नदिई भागेपछि ती महिला प्रहरीमा उजुरी गर्न पुगेकी थिइन् । गोपाल पनि वैदेशिक रोजगारीकै लागि काठमाडौं आएका थिए । उनसँग १४ पुसमा ओमान उड्ने भिसा र टिकट थियाे ।

किन बनाइयो होटल सञ्चालकलाई मतियार ?

प्रहरीले मित्रनगरका तीनवटै होटल सञ्चालकलाई मतियार बनाएर अनुसन्धान प्रतिवेदन जिल्ला सरकारी वकिलको कार्यालय काठमाडाैंमा बुझाएको थियो । उनीहरू प्रतिवेदन बुझाउनुभन्दा एक साताअघि पक्राउ परेका थिए ।

महानगरीय प्रहरी वृत्त महाराजगञ्जका प्रमुख प्रहरी नायब उपरीक्षक ‍‍‌‍(डीएसपी) प्रमेश विष्टका अनुसार सरकारी वकिलको कार्यालयको निर्देशनअनुसार होटल सञ्चालकहरूलाई प्रतिवादी बनाइएको हो ।

‘हामीले सुरुमा होटल सञ्चालकलाई प्रतिवादी बनाएका थिएनौँ । पछि सरकारी वकिलको कार्यालयको निर्देशनअनुसार नै उनीहरूलाई प्रतिवादी बनाएका हौँ,’ डीएसपी विष्टले भने ।

होटल सञ्चालकले बलात्कारको घटना हुँदा प्रहरीलाई खबर नगरेको र होटलमा बस्ने मानिसको विवरण पनि नराखेको पाइएपछि मतियार बनाइको डीएसपी विष्टको तर्क छ । तर, होटल सञ्चालहरूले होटलमा हुँदा बलात्कारमा परेकी महिलाले कुनै प्रतिकार र आफूहरूलाई जानकारी नगराएको दाबी गर्दै आएका छन् ।

नेपाल प्रहरीका पूर्वप्रहरी नायब महानिरीक्षक (डीआईजी) हेमन्त मल्ल भने बलात्कारजस्तो जघन्य अपराधमा कुनै संलग्नता नै नदेखिएका व्यक्तिलाई मतियार बनाउनु प्रहरीको गम्भीर कमजोरी भएको बताउँछन् ।

‘होटल सञ्चालकहरू बलात्कार घटनामा संलग्न छैनन् । उनीहरूले सीसीटीभी नराखेको, विवरण नराखेको देखिए त्यहीअनुसारको कसुरमा पो कारबाही गर्नुपर्छ । बलात्कारसँग उनीहरूको के सम्बन्ध हुन्छ ? यदि त्यस्तो गरिएको हो भने अदालतबाट कुनै प्रमाणित नहुने र प्रहरीको अनुसन्धान नै कमजोरी देखिन्छ,’ डीआईजी मल्लले भने ।

बलात्कार घटनामा ७ देखि १० वर्षसम्म कैद सजाय हुने व्यवस्था छ । सामूहिक भए थप ५ वर्षसम्म कैद सजाय हुन्छ ।

प्रकाशित मिति: मंगलबार, माघ ११, २०७८ १७:२८