एक प्रहरी जवान जसलाई अदालतले २७ वर्ष जेल सजाय तोक्यो

A+ A A-

प्रहरी जवान केशव नाथ हाल डिल्लीबजार कारागारभित्र जेलजीवन भोगिरहेका छन् । बैतडीको साविक गोकुलेश्वर गाविसका केशव सुर्खेत इलाका प्रहरी कार्यालय बाबियाचौरमा कार्यरत हुँदा पक्राउ परेका थिए ।

त्यसयताको १३ वर्षदेखि नाथ जेलजीवन भोगिरहेका छन् । एउटै मुद्दामा उनीसँगै जेलजीवन भोगिरहने अर्का पात्र गोकुलेश्वरकै ५५ वर्षीय गंगादत्त नाथ छन् ।

जिल्ला अदालत बैतडीले केशवलाई २७ वर्ष र गंगादत्तलाई २० वर्ष कैद सजायको फैसला सुनाएको थियो । १३ फागुन २०६५ मा जिल्ला अदातल बैतडीका न्यायाधीश स्वीकृत पराजुलीले उनीहरूमाथि सो फैसला गरेका हुन् ।

जिल्ला अदालतले गरेको सोही फैसला पुनरावेदन अदालत हुँदै सर्वोच्च अदालतले समेत सदर गरेको छ । प्रहरी जवान केशवको अपराध कर्म भने रोचक छ ।

उता गंगादत्त नाथ भने कानुनी अज्ञानताका कारण जेलजीवन भोग्न बाध्य भएका हुन् । नाथद्वयको अपराध कर्मबारे जान्न भने २०६५ सालतिर फर्कनुपर्ने हुन्छ ।

केशव नाथ प्रहरीमा भर्ती हुनुभन्दा पहिला नै गोकुलेश्वरकी २० वर्षीया कलावती गिरी (नाम परिर्वतन) सँग विवाहबन्धनमा बाँधिएका थिए । यसबीचमा नाथको परिवार गोकुश्वरबाट कञ्चनपुरको महेन्द्रनगर झरे । केशव प्रहरीमा भर्ती भए ।

प्रहरीमा भर्ती हुनुपूर्व कलावती र केशवको वैवाहिक सम्बन्ध ठीकठाक थियो । उनीहरूले सन्तानका रूपमा एक छोरासमेत पाएका थिए । केशव प्रहरीमा भर्ती भएपछि भने उनीहरूको वैवाहिक सम्बन्धमा खटपट सुरु हुन थाल्यो ।

जिल्ला प्रहरी कार्यालय नेपालगञ्जमा कार्यरत हुँदा केशवले दोस्रो बिहे गरे । केशव विस्तारै घर जानसमेत छोडिसकेका थिए । उता कलावती भने छोराको हेरचाह गर्दै केशवकै घरमा बसेकी थिइन् ।

यहीबीच केशव एक्कासि १४ साउन २०६५ मा महेन्द्रनगर घर पुगे । १५ साउनमा केशवले आफू बाजुरा प्रहरी कार्यालयमा कार्यरत रहेको र कलावतीलाई समेत बाजुरा नै जाऊँ भनेर छोरासहित उनलाई घरबाट बिदा गरेर ल्याए ।

बाजुरा जाने भनेर घरबाट हिँडेकी कलावतीले बस चढ्दा केशवका काका मानसिंह नाथलाई समेत बसमै देखिन् । कलावतीलाई त्यही बेला शंका लागेको थियो- आफूमाथि केही षड्यन्त्र गर्दैछन् भन्ने ।

तर, त्यो बेला केशवले कान्छी श्रीमतीलाई काकाले लिएर घर फर्किने भनेर कलावतीलाई विश्वस्त पारेका थिए । उनीहरू तीनै जना महेन्द्रनगरबाट जब बैतडीको सिल्लेगाडा पुगे, तब कलावतीको शंका वास्तविकतामा बदलियो ।

सिल्लेगाडामा श्रीमान् केशव, कलावती र मानसिंहलाई भेट्न गोकुलेश्वरबाट ५५ वर्षीय गंगादत्त नाथ र वीरबहादुर गिरीसमेत आएका थिए । त्यसमा उनीहरूले केही लेखापढीसमेत गरे ।

कागजमा लेखिएको थियो- 'म राजीखुसीले गंगादत्त नाथसँग विवाह गरेर गएकी हुँ ।' त्यही कागजमा केशवले आफ्नी श्रीमती कलावतीलाई हस्ताक्षर गर्न लगाए । त्यहाँबाट केशवले आफ्नी श्रीमती कलावतीलाई बाजुरा होइन, आफूभन्दा ३० वर्ष जेठा गंगादत्तको जिम्मा लगाएर आफू महेन्द्रनगर फर्किए ।

सात छोरीपछि छोरा पाउने आसमा कलावतीसँग बिहे

५५ वर्षीय गंगादत्तकी श्रीमती हुन् कल्पुरी नाथ । उनीहरूले सन्तानका रूपमा सात जना छोरी पाएका छन् । तर, गंगादत्तलाई जसरी भए पनि छोरा जन्माउने रहर थियो । उसो त गंगादत्तलाई गाउँका कैयौँ मानिसले छोरा नभएको ‘अपुताली’ भन्दै खिसीटिउरीसमेत गर्थे ।

त्यही पीडा सहन नसकेर गंगादत्तले जेठी श्रीमती कल्पुरीलाई 'तिमीबाट छोरा भएन, सबैले खिसीटिउरी पनि गरे अपुताली भनेर, अर्को बिहे गरेर भए पनि वंश धान्ने छोरा जन्माऊँ' भन्दै अर्को बिहे गर्ने अनुमति मागे । कल्पुरीले मन भारी बनाएरै भए पनि गंगादत्तको कुरा काट्न सकिनन् र उनलाई सौता हाल्ने अनुमति दिइन् ।

त्यसैका लागि गंगादत्तले प्रहरी जवान केशवका काका मानसिंह नाथसँग दुःख पाएकी कुनै महिला आफूसँग विवाह गर्न खोजिदिन अनुरोध गरेका थिए । सोहीअनुसार नै मानसिंहले आफ्नै भतिजा केशवकी जेठी श्रीमती कलावती नाथलाई गंगादत्तको जिम्मा लगाउन सिल्लेगाडा लिएर गएका थिए । कलावतीलाई लिएर गंगादत्तले एक साता घरमा समेत राखेका थिए । त्यस बीचमा गंगादत्तले आफूमाथि जबर्जस्ती करणीसमेत गरेको भन्दै प्रहरीमा उजुरी दिएपछि घटनाले अर्को मोड लिएको हो ।

उता गंगादत्तले कलावतीलाई घरमा लिएर गएको बेला घरकी जेठी श्रीमती र छोरीहरूलाई समेत बिहे गरेर नै ल्याएको भनेर बताएका थिए । केशवले गंगादत्तलाई श्रीमती बुझाए पनि रकमको काराबोर भने गरेका थिएनन् ।

केशवले आफूले दोस्रो विवाह गरेको र जेठी श्रीमती कलावतीले सधैँ दु:ख दिने भयले उनलाई गंगादत्तको जिम्मा लगाउन खोजेको अदालती कागजातबाट देखिएको छ । अदालतले भने केशव नाथ र गंगादत्तमाथि मानव बेचबिखन तथा ओसारपसार नियन्त्रण ऐन, २०६४ को दफा १५ अनुसार २० वर्ष कैद सजाय सुनाएको थियो ।

केशवको हकमा भने सार्वजनिक पद धारणा गरेकै अवस्थामा सो कार्य गरेको भन्दै सजायको २५ प्रतिशत थप तथा आफैँले अभिभावकत्व गरेको अवस्थामा श्रीमतीलाई बेचबिखन गरेको भन्दै थप १० प्रतिशत गरेर २७ वर्ष जेल सजाय सुनाएको थियो ।

प्रकाशित मिति: बुधबार, माघ ५, २०७८ १७:०८