अपराधका कुख्यात विकास पुन, जसकाे कनेक्सन रिगलदेखि दिवंगत डन घैँटेसम्म

A+ A A-

गुण्डागर्दी पृष्ठभूमिका दाङका विकास पुनलाई प्रहरीले सोमबार पक्राउ गर्‍यो । प्रहरीको केन्द्रीय अनुसन्धान ब्युरो (सीआईबी) ले पुनलाई काठमाडौंको सुन्धाराबाट पक्राउ गरेको हो ।

पुनलाई सोमबार नै सीआईबीले जिल्ला प्रहरी कार्यालय दाङमा बुझाएको छ । घोराही उप–महानगरपालिका–१५ का पुनलाई ठगी मुद्दामा पक्राउ गरेको सीआईबीका प्रवक्ता एसपी श्यामकुमार महतोले जानकारी दिए ।

प्रहरीले पुनले चढ्दै आएको प्रदेश ३ ०१ ०२२ च ०११८ नम्बरको रातो रङको हुन्डाई कम्पनीको क्रेटा कारसमेत बरामद गरेको छ । पुनमाथि कपिलवस्तुको बाणगंगा ४ का तिलक थापाले ४९ लाख ५० हजार ठगी गरेको भन्दै दाङ प्रहरीमा उजुरी दिएका थिए ।

सोही कसुरमा दाङ प्रहरीले ठगी मुद्दामा अदालतबाट पक्राउ गर्ने अनुमति पाएपछि उनी भागेर काठमाडौं आएका थिए ।

प्रहरीका अनुसार पुनले मध्यपश्चिम क्षेत्र दाङ, नेपालगञ्जलगायतका क्षेत्रलाई आधार बनाएर आपराधिक गतिविधि सञ्चालन गर्दै आएका थिए ।

यस्तो छ पुनको आपराधिक शृंखला

पुनले आपराधिक गतिविधि २०६२ सालबाट सञ्चालन गर्दै आएको प्रहरीको दाबी छ । तर, प्रहरीमा भने उनीविरुद्धको उजुरी २०६४ बाट आउन थालेको थियो ।

१३ चैत २०६४ मा पुनविरुद्ध पहिलो पटक दाङ घोराहीका किशोर केसी र प्रविण केसीलाई खुकुरी प्रहार गरेको उजुरी दर्ता भएको रेकर्ड प्रहरीमा छ ।

उक्त मुद्दामा जिल्ला अदालतबाट धरौटीमा छुटेका पुनको आपराधिक मनोबल अझ उच्च भयो । उनले लगत्तै ५ असोज २०६५ मा दाङस्थित भ्याली होटलमा हातहतियार देखाएर लुटपाट गरे ।

त्यस्तै, ७ माघ २०६८ मा दाङकै यामबहादुर थापालाई कुटपिट गरेर घाइते बनाएका थिए । त्यो बेलासम्म पुनले आफ्नो आपराधिक गिरोह नै बनाइसकेकाे प्रहरीको दाबी छ ।

उनले १२ चैत २०७० मा रोल्पा इरिवाड–५ का पदम चन्दलाई गोली प्रहार गरेका थिए । ६ फागुन २०७३ मा समेत पुन समूहले दाङकै लोकबहादुर केसीलाई खुकुरी प्रहार गरेकाे थियाे ।

दाङ प्रहरीमा पुनविरुद्ध दर्जनाैँ ज्यान मार्ने उद्योगका उजुरी रहेको दाङ प्रहरीको भनाइ छ । दाङ प्रहरीका अनुसार नेपालगन्जलाई आधार बनाएर आपराधिक गतिविधि सञ्चालन गर्दै आएका अर्का गुण्डा नाइके रिगल भनिने योग ढकालसँग समेत पुनको निकटता देखिएकाे छ ।

रिगल पक्राउ पर्नुभन्दा पहिला उनीहरूले एक अर्को समूहलाई सहयोग गर्थे । दाङमा आपराधिक गतिविधि गरेर उनी सेल्टरका लागि नेपालगञ्ज पुग्ने गरेको एक प्रहरी अधिकारीको भनाइ छ ।

त्यस्तै, रिगल नेपालगञ्जमा आपराधिक घटना गराएर दाङमा सेल्टरका लागि पुग्थे । रिगल २०७२ मा नेपालगञ्जका २९ वर्षीय चेतन मानन्धरको हत्या अभियोगमा पक्राउ परेर अहिले दाङ कारागारमा सजाय भुक्तान गरिरहेका छन् ।

कारागारभित्रसमेत आपराधिक गतिविधि गर्न नछोडेपछि कारागार प्रशासनले रिगललाई विभिन्न कारागार सार्दै आएको छ । रिगल नेपाली कांग्रेसनिकट नेपाल तरुण दल बाँकेको क्षेत्र नम्बर ३ का क्षेत्रीय अध्यक्षसमेत थिए ।

प्रहरीले २०७१ सालमा पहिलोचोटि गुन्डा नाइके दिनेश अधिकारी चरी र ०७२ मा अर्का गुण्डा नाइके कुमार घैँटेलाई इन्काउन्टर गरेर मारेपछि भने मोफसलमा गुण्डागर्दी गर्नेहरू भाग्न थालेका थिए ।

तर पुनले भने दाङ क्षेत्रलाई आधार बनाएर गुण्डागर्दीलाई निरन्तरता दिएकाे प्रहरी दाबी छ । पुनले कुमार घैँटेनिकट भएर काम गरेको समेत प्रहरी अधिकारी बताउँछन् ।

प्रकाशित मिति: सोमबार, माघ ३, २०७८ २०:०५