अरुण दासका हत्यारा खोज्न दिल्लीहुँदै मुम्बई पुग्यो नेपाल प्रहरी

दासको शव जंगलबाट निकाल्दै प्रहरी ।

A+ A A-

कैलालीका अरुण दासको बीभत्स हत्या भएको एक महिना बिते पनि प्रहरीले हत्याका आरोपितलाई पक्राउ गर्न सकेको छैन ।

जानकी गाउँपालिका- ९ का २५ वर्षीय दासको ३ पुसमा सोही गाउँपालिकाको अमरावती सामुदायिक वनमा रुखमा बाँधेर टाउको छिनालेको अवस्थामा शव फेला परेको थियो । जिल्ला प्रहरी कार्यालय कैलालीले दास हत्याका आरोपितहरू चार-पाँच जना भएको र सबैको पहिचान भइसकेको बताए पनि पक्राउ गर्न भने सकेको छैन ।

हत्यामा संलग्नहरू भारत भागेका कारण पक्राउ गर्न नसकेको प्रहरीले बताएको छ । दासको हत्या साथीहरूले नै गरेको समेत प्रहरीले दाबी गरेको छ ।

हत्यामा संलग्नहरू लागुऔषध प्रयोगकर्ता भएको प्रहरीको भनाइ छ । हत्यापछि दुई युवकबीच भएको मोबाइल फोन रेकर्डसमेत सामाजिक सञ्जालमार्फत सार्वजनिक भएको थियो । जसमा मनोज नाम गरेका एक युवाले भनेका थिए, ‘घाँटी अलग छ । शरीर अलग छ । एक–दुई दिनमा तपाईं थाहा पाउनुहुन्छ ।’ उनले आफू नेपालगञ्जको रुपैडिया नाकाहुँदै भारत भागिसकेको पनि बताएका थिए ।

जिल्ला प्रहरी कार्यालय कैलालीका प्रहरी प्रमुख प्रहरी उपरीक्षक (एसपी) विश्व अधिकारीले हत्या आरोपका सबै अभियुक्त भारतमा रहेका कारण पक्राउ गर्न केही कठिन भएको बताए । अभियुक्त खोज्न नेपाल प्रहरीले भारतीय प्रहरीसँग समन्वय गरिरहेको उनले बताए ।

‘अहिले उनीहरू मुम्बई पुगेको सूचना हामीले पाएका छौँ,’ एसपी अधिकारीले भने, ‘हामीले उनीहरूको खोजी भारतमा भए पनि जारी राखेका छौँ । प्राविधिक रूपमा केही कठिन भएको हो । केही दिनअघि उनीहरू दिल्लीमा देखिएका थिए ।’

कैलाली प्रहरीले एक जना प्रहरी नायब निरीक्षक (सई) को कमाण्डमा केही प्रहरी टोली दिल्लीहुँदै मुम्बई पठाएको छ । दास हत्याका सबै आरोपी सँगै रहेको पनि प्रहरीको दाबी छ । कैलाली प्रहरीका अनुसार भागेका अभियुक्तले छद्‌म नामबाट फेसबुक एकाउन्ट खोलेर चलाएको समेत देखिएको छ ।

प्रकाशित मिति: शुक्रबार, पुस ३०, २०७८ १४:५०