‘माता’ले त्रिशूलले डामेर गयाे राेशनीकाे ज्यान, राेकिएनन् बाेक्सीकाे आराेपका अमानवीय हर्कत

‘माता’ले त्रिशूलले डामेर गयाे राेशनीकाे ज्यान, राेकिएनन् बाेक्सीकाे आराेपका अमानवीय हर्कत

A+ A A-

सिन्धुपाल्चोक चौतारा साँगाचोकगढी नगरपालिका– २ की राधिका श्रेष्ठकी १४ वर्षीया छोरी रोशनी श्रेष्ठको शनिबार अस्वाभाविक तरिकाले हत्या भयो ।

केही समयदेखि बिरामी रहेकी रोशनीलाई उनको परिवारले पुस पहिलो साता झारफुक गर्न भन्दै काठमाडौं रानीवनस्थित टहरोमा ल्याए । त्यहाँ रहेकी ‘माता’ उमा शाही ठकुरीले उनलाई निकाे बनाउने विश्वास दिलाइन् ।

शाहीले आफूमा दैवीशक्ति प्राप्त भएको भन्दै अन्धविश्वास फैलाएकी थिइन् । राेशनीका परिवार त्यही अन्धविश्वासमा परेर रानीवन पुगे । सामान्य परिवारकी रोशनीका परिवारलाई शाहीले विभिन्न तान्त्रिक विधिबाट उपचार गर्ने र निको पार्ने विश्वास दिलाइन् ।

तान्त्रिक उपचारका लागि बिरामीलाई केही दिन आफू बस्ने टहरोमै राख्नुपर्ने सर्त शाहीले राखिन् । निकाे हुने आशामा रोशनीकी आमा राधिका शाहीले भनेअनुसार रोशनीलाई त्यहीँ राख्न राजी भइन् ।

तर, टहरोमा छाडेकाे तीन सातामै शनिबार रोशनीको मृत्यु भयो । प्रहरीले शाहीले झारफुकको नाममा तिघ्रा, खुट्टालगायत शरीरका विभिन्न भागमा त्रिशूलले डामेपछि बालिकाको मृत्यु भएको जनाएको छ ।

अन्धविश्वासमा पारेर बालिकाकाे ज्यान गएकाे भन्दै प्रहरीले शाहीलाई शनिबार नै पक्राउ गरेको छ । काठमाडौं प्रहरी परिसरका प्रवक्ता एसपी दिनेश मैनालीले शाहीलाई ज्यान मुद्दा चलाउन अदालतबाट म्याद थप भएर अनुसन्धान भइरहेको बताए ।

बालिकाका आफन्त दुर्गाबहादुर श्रेष्ठ रोशनीको ज्यान जानुमा 'माता' भनिने शाहीकै दाेष रहेकाे बताउँछन् । उपत्यकाभित्रै अन्धविश्वासका कारण बिरामी अस्पतालमा नगई तान्त्रिककहाँ जाँदा ज्यान गुमाएकाे घटनाले समाजकाे एउटा कुरूप तस्वीर बाहिर ल्याएकाे छ ।

राजधानीमा अन्धविश्वासका कारण भएकाे याे पहिलाे घटना भने हाेइन । दुई वर्षअघि १३ असार २०७६ मा समेत यहीँ शैलीमा एक 'माता' ले सार्वजनिक ठाउँ भद्रकाली मन्दिर परिसरमा एक युवतीलाई बोक्सी निकाल्ने भन्दै यातना दिएकी थिइन् । ‘धर्ती माता’ भन्ने बालाजुकी विष्णु कुँवरले ती युवतीलाई मन्दिर परिसरमै कुटपिट गरेकी थिइन् ।

पछि प्रहरीले उनलाई पक्राउ गरेर बोक्सी आराेप कसुरमा अनुसन्धान गरेर मुद्दा चलाएको थियो । यसअघि १७ फागुन २०७५ मा त्यसरी नै बोक्सीको आरोपमा कुटपिट गर्ने दोलखाकी कविता श्रेष्ठ पक्राउ परेकी थिइन् ।

काठमाडौंको भीमसेनस्थानमा बस्दै आएकी श्रेष्ठले पनि आफूलाई माता भन्दै झारफुकको काममा दोलखा तामाकोसी गाउँपालिका–४ की रश्मी उपरकोटीलाई बोक्सी भन्दै कुटपिट गरेकी थिइन् ।

रश्मी आफ्नी तीन महिनाको बच्चालाई सञ्चो नभएपछि भीमसेनस्थानमा रहेको माताको आश्रममा पुगेकी थिइन् । माता श्रेष्ठले बच्चाकी आमालाई नै बोक्सी भएको भन्दै पन्यु तताएर शरीरका विभिन्न भागमा डामेकी थिइन् । पछि रश्मी प्रहरीमा पुगेपछि श्रेष्ठ पक्राउ परेकी थिइन् ।

मुलुकी अपराध संहिताले बोक्सीको आरोपमा अपमानजन्य व्यवहार गर्नेलाई ५ वर्षसम्म कैद र ५० हजार रुपैयाँसम्म जरिवाना र क्षतिपूर्तिको व्यवस्था गरेको छ ।

प्रहरी प्रवक्ता एसएसपी वसन्तबहादुर कुँवरले राजधानीमै बोक्सीको आरोपमा महिलामाथि कुटपिट हुनु र ज्यान जानु दु:खद भएको बताए । 'यस्ता अन्धविश्वास हटाउन प्रहरी र सचेत नागरिकबीच जनचेतना अभियान चलाउन जरुरी छ,' उनले भने ।

प्रकाशित मिति: मंगलबार, पुस २७, २०७८ १६:१६