भ्रष्टाचारकाे उजुरी नटुङ्गिँदै प्राविधिकतर्फको दरबन्दी प्रशासनमा गाभेर पूजा सिंहकाे बढुवा

भ्रष्टाचारकाे उजुरी नटुङ्गिँदै प्राविधिकतर्फको दरबन्दी प्रशासनमा गाभेर पूजा सिंहकाे बढुवा

A+ A A-

गृह मन्त्रालयले शुक्रबार विवादास्पद पृष्ठभूमिकी प्रहरी वरिष्ठ उपरीक्षक (एसएसपी) पूजा सिंहलाई प्रहरी नायब महानिरीक्षक (डीआईजी) मा बढुवा गर्‍यो । उनलाई गृह मन्त्रालयले एकल बढुवा गरेको हो । एक महिनापछि अवकाशमा जाने सिंहको बढुवासँगै थप एक वर्ष जागिर अवधि पनि लम्बिएको छ ।

प्रहरी नियमावली, २०७१ मा एसएसपीको सेवा अवधि ५५ वर्ष उमेर तोकिएको छ । उमेर हदका कारण एक महिनापछि ६ फागुनमा उनले अवकाश पाउने थिइन् । बढुवा भएसँगै उनले ३० वर्षे सेवा अवधिको कारण मात्र अवकाश पाउनेछिन् ।

सिंहको बढुवा नाटकीय रूपमा भएको छ । सिंहलाई गृह मन्त्रालयले प्रहरीको प्राविधिक समूहतर्फको एउटा डीआईजी पद प्रशासनतर्फ गाभेर बढुवा गरेको हो ।

प्रहरीको प्रशासनतर्फ कुल १९ डीआईजी दरबन्दीमध्ये एउटै खाली थिएन । प्राविधिक तर्फको कुल ८ डीआईजी दरबन्दीमध्ये सञ्चारमा एउटा रिक्त थियो । डीआईजी राजीव सुब्बाले गत वर्ष राजीनामा दिएपछि उक्त पद खाली थियो । त्यही पद प्रशासनतर्फ ल्याएर सिंहलाई जागिर सकिने बेला बढुवा गरिएको हो ।

सिंहमाथि अख्तियार दुरुपयोग अनुसन्धान आयोगमा भ्रष्टारसम्बन्धी उजुरीसमेत टुंगोमा नपुग्दै गृह मन्त्रालयले बढुवा गरेको हो । जिल्ला प्रहरी कार्यालय काभ्रे प्रमुख छँदा प्रहरी कर्मचारीको राशनमा घोटाला गरेको उजुरीमा अख्तियारले छानबिन गरिरहेको छ ।

सिंहको बढुवाको निर्णय गृह मन्त्रालयले गरेको भन्दै प्रहरी केन्द्रीय प्रवक्ता एसएसपी वसन्तबहादुर कुँवरले प्रतिक्रिया दिन मानेनन् ।

सिंह हालका प्रहरी अतिरिक्त महानिरीक्षक (एआईजी) विश्वराज पोखरेल र सहकुलबहादुर थापाका ब्याची हुन् । १९ चैत ०४९ मा उनीहरूले प्रहरी निरीक्षकबाट सँगै सेवा सुरु गरेका थिए । उनीहरूसँगै सेवा सुरु गरेका एसएसपी हरिराज वाग्लेले भने एक साता अघि मात्रै १५ पुसमा ५५ वर्षे सेवा अवधिका कारण अवकाश पाए ।

यसरी नै वाग्लेभन्दा अघि २९ मंसिरमा विक्रमबहादुर चन्द र ६ पसुमा नरबहादुर केसीले पनि ५५ वर्षको उमेर हदका कारण अवकाश पाएका थिए । तर, सिंह भने प्राविधिक समूहतर्फको दरबन्दी नै प्रशासनतर्फ सारेर डीआईजीमा बढुवा हुने भइन् ।

सिंहको अस्वाभाविक बढुवाको नाभी गृहमन्त्री बालकृष्ण खाँणकी श्रीमती मञ्जु खाँणसँग जोडिएको प्रहरी स्रोतको भनाइ छ । सिंहकै ब्याची अवकाशप्राप्त एक प्रहरी अधिकारीका अनुसार सिंह र मञ्जु खाँणको निकटता एक अर्कोको ‘बेड रुम’सम्मै पुग्ने थियो । मञ्जु खाँण गृह प्रशासनमा पतिको बलमा हावी बन्दै गएको बताइन्छ ।

प्रकाशित मिति: आइतबार, पुस २५, २०७८ १४:०२