१८ वर्षे जेल सजाय भोगिरहेका गुड्डुको प्रहरीलाई नै चकित पार्ने लागुऔषध धन्दा

१८ वर्षे जेल सजाय भोगिरहेका गुड्डुको प्रहरीलाई नै चकित पार्ने लागुऔषध धन्दा

A+ A A-

प्रहरीको लागुऔषध नियन्त्रण ब्युरोको टोलीले मंगलबार ठूलो मात्रामा लागुऔषध डाइजेपाम, एम्पुल, फेनारगन, नर्फिनसहित १७ जनालाई पक्राउ गरेर सार्वजनिक गरेको छ । ब्युरोले पक्राउ परेकाहरूलाई पत्रकार सम्मेलन गरेर सार्वजनिक गरेको हो ।

पक्राउ परेकाहरूमध्ये धेरैजसो लागुऔषध कारोबारमै यसअघि पक्राउ परेर जेलबाट छुटेकाहरू छन् ।

पक्राउ पर्नेहरूमा भारतीय नागरिक गुड्डु गुप्ता, सिन्धुलीका संग्राम मोक्तान, सोही ठाउँका पञ्चसिंह स्याङ्तान, मोरङका सुरजसिंह ठकुरी, काठमाडौं बालाजुका दीपक महर्जन, सन्तोष तामाङ रम्मा देवी दासलगायत छन् ।

उनीहरूको साथबाट ब्युरोको टोलीले २ हजार ३ सय १६ थान डाइजेपाम, २ हजार २ सय ५० थान फेनारगन र २ हजार ३ सय ३४ थान नुर्फिन बरामद गरेको छ ।

ब्युरोका प्रहरी प्रमुम एसएसपी हृदय थापाका अनुसार पक्राउ परेका १७ जनामध्ये गुड्डु गुप्ता र रम्मा देवी दास लागुऔषध कारोबारका मुख्य नाइके हुन् । उनीहरू दुवै जनाले छुट्टाछुट्टै समूह खडा गरेर लागुऔषधको काराबार गर्ने गरेका थिए ।

रम्मादेवी भारतीय नागरिक हुन् । उनले धादिङकी नानीमैया लामा मिजार, विष्णुकुमारी देउला र भक्तपुरका कृष्णराम धुकुछमार्फत लागुऔषधको कारोबार गर्दै आएका थिए ।

अर्को समूहका नाइके भने गुड्डु गुप्ता हुन् । गुड्डु गुप्ताको लागुऔषध कारोबारको धन्दा देखेर प्रहरी नै चकित परेको छ । गुड्डुले जेलभित्रैबाट लागुऔषधको कारोबारको धन्दा चलाएको खुलेको ब्युरोका एससपी थापाले बताए ।

‘गुप्ताले कारागारभित्रबाट नै लागुऔषधको कारोबार गर्ने गरेको खुलेको छ,’ ब्युरोका एसएसपी थापाले भने, ‘बाहिर लागुऔषध ओसारपसार गर्न उनले तीन जनालाई मासिक तलब दिएरै खटाएका रहेछन् ।’ थापाका अनुसार पक्राउ परेका संग्राम मोक्तान, पञ्च स्याङ्तान र सुरज ठकुरीलाई मासिक १५ हजार रुपैयाँ तलब दिएर लागुऔषध कारोबारमा लगाएका थिए ।

गुप्ताले जेलभित्रबाट यसरी गर्थे लागुऔषधको कारोबार

भारत विहारका हुन् गुड्डु गुप्ता । उनी १० वर्षअघि २०६८ सालमा लागुऔषध खैरो हिरोइन ७ सय ग्रामसहित ब्युरोको टोलीले नै पक्राउ गरेको थियो । सो अभियोगमा उनलाई काठमाडौं जिल्ला अदालतले १८ वर्ष कैद सजायको फैसला गर्‍यो ।

उक्त फैसलापछि उनी विभिन्न जेलहुँदै पछिल्लो तीन वर्षदेखि सिन्धुली कारागारमा थिए । उनी १८ वर्ष कैद सजाय भोग्दा पनि लागुऔषध कारोबारको नसाबाट उम्किन सकेनन् ।

गुप्ताले सिन्धुली कारागारबाटै लागुऔषधको धन्दा चलाए । उनलाई कारागारबाट लागुऔषधको धन्दा चलाउन सहज भने थिएन । त्यसका लागि उनले कारागारका टेलिफोन नाइके सन्तोष स्याङ्तानलाई हात लिए । स्याङ्तान पनि लागुऔषध गाँजा ५५ किलोसहित २०७६ सालमा सिन्धुली प्रहरीले पक्राउ गरेर जेल पुगेका कैदी हुन् । उनलाई जिल्ला अदालत सिन्धुलीले ५ वर्ष कैद सजायको फैसला गरेको थियो ।

प्रहरीका अनुसार स्याङ्तान आफू कैदी भए पनि उनले कारागार प्रशासनको मन जिते । उनलाई कारागार प्रशासनले छोटो समयमै कारागारका कैदीहरूलाई उनीहरूका आफन्तलाई फोन गर्ने सेवा दिने 'टेलिफोन नाइके’ बनायो । अन्य कैदीहरूले आफन्तलाई फोन गर्दा स्याङ्तानमार्फत नै गर्नुपर्ने हुन्थ्यो । त्यसैका लागि गुप्ताले स्याङ्तानलाई हातमा लिए र उनले बाहिरका युवाहरूको सञ्जाल खडा गरी टेलिफोनमार्फत नै लागुऔषधको कारोबार सुरु गर्न सफल भए ।

प्रहरीका अनुसार सन्तोषमार्फत गुप्ताले उनकै सहोदर भाइ पञ्चसिंह स्याङ्तानलाई समेत हात लिएका थिए । गुप्ताको लागुऔषधको बाहिरी कारोबारको जिम्मा पञ्चसिंहले लिएका थिए । उनकै निर्देशनमा भारतहुँदै नेपाल भित्रिएको लागुऔषध संग्राम मोक्तान र सुरज ठकुरीले बिक्रीवितरण गर्दै आएका थिए । भारतमा प्रतिथान ८० रुपैयाँमा खरिद गरेर नेपाल भित्र्याएको लागुऔषध नेपालमा १ हजार रुपैयाँसम्ममा बिक्रीवितरण गर्ने गरेको खुलेको छ ।

उनीहरूले बिक्री गरेको लागुऔषधको रकम सिन्धुली कारागारकै कार्यालय सहयोगी रिता सारु मगरबाट बुझ्ने गरेको खुलेको छ । रितालाई समेत प्रहरीले पक्राउ गरिसकेको छ । गुप्ताले कारागारबाट वर्षौंअघिदेखि लागुऔषधको कारोबार गर्ने गरेको खुलेको प्रहरीको दाबी छ ।

रातारात कारागारबाट सरुवा

गुप्ताको अर्को रोचक तथ्य के छ भने उनीमाथि प्रहरीले लागुऔषध मुद्दामा अनुसन्धान गरिरहेकै बेला पनि उनी एकाएक सिन्धुली कारागारबाट रौतहट कारागार सरुवा भएका छन् । उनीसँगै कारागारका टेलिफोन नाइके सन्तोष स्याङ्तानलाई पनि उनीसँगै रौतहट नै सरुवा गरिएको खुलेको छ ।

अनुसन्धानमा संलग्न प्रहरी अधिकारीका अनुसार उनीमाथि लागुऔषध मुद्दामा अनुसन्धान गरेकै अवस्थामा सरुवा हुनु आश्चर्यको कुरा हो । ‘हामीले अनुसन्धान गरेकै अवस्थामा कारागारबाट एकाएक गुप्ता र स्याङ्तान सरुवा हुनु आश्चर्यकै विषय हो । हामी पनि चकित परेका छौँ,’ ती अधिकारीले भने ।

सिन्धुली कारागार प्रमुख जेलर मातृका पहाडीले भने गुप्ताको क्रियाकलाप शंकास्पद लागेर नै आफूहरूले कारागारबाट सरुवा गरेको बताए ।

‘मैले गुप्ताको व्यवहार आन्तरिक प्रशासनबाट ठीक छैन भन्ने सुनेर नै सरुवा गरेको हुँ । प्रहरीले उनीमाथि अनुसन्धान गर्दैछौँ भन्ने जानकारी मलाई दिएको थिएन । त्यही कारण सरुवा भएको हो,’ पहाडीले भने, ‘जेलभित्र पनि कोड भाषा प्रयोग गरेर लागुऔषधको कारोबार गर्दो रहेछ ।’

प्रकाशित मिति: मंगलबार, पुस २०, २०७८ १८:०९