अन्तर्राष्ट्रिय बजारमा लाेकप्रिय हुँदैछन्- वाइवाइ, गाेल्डस्टार र खुकुरी रम

अन्तर्राष्ट्रिय बजारमा लाेकप्रिय हुँदैछन्- वाइवाइ, गाेल्डस्टार र खुकुरी रम

A+ A A-

नेपाली बजारका केही उत्पादनहरू छन्, जो स्वदेशसँगै अन्तर्राष्ट्रिय बजारका ठूला कम्पनीहरूसँग प्रतिस्पर्धामा गरिरहेका छन् । नेपालबाटै सुरु भएर विश्वबजारमा लोकप्रिय बन्ने नेपाली ब्रान्डहरूमा सीजी ग्रुपको वाइवाइ चाउचाउदेखि विदुषी राणाको गोल्डस्टार जुत्तासम्म छ । नेपाली महिलाले बोराबाट बनाएको झोला शक्तिदेखि खुकुरी रम, यार्सा, गोर्खालगायतका मदिरा र कफीले विदेशी बजारमा ख्याती कमाएका छन् ।

नेपालमा नेपाली ब्रान्ड खासै खोजीको विषय बनेको पाइँदैन । अझ विदेशबाट आयातित वस्तुलाई इज्जत र प्रतिष्ठाको मापकको रूपमा लिने मानसिकता नेपाली उपभोक्तामा व्याप्त छ । जसले गर्दा बर्सेनि नेपालमा निर्यातभन्दा आयातको दर बढ्दै गएको यर्थाथ हामीमाझ छँदै छ । नेपालमा नेपाली उपभोक्ताले नै स्वदेशी उत्पादनलाई हेयको दृश्टिकोणले हेरिरहँदा तिनै नेपाली उत्पादनले विदेशमा भने तहल्का पिटिरहेको पाइन्छ ।

कमलाको कमाल : समुद्रबाट होइन, सानो पोखरीबाटै मोती उत्पादन

यसरी विश्वव्यापी रूपमा नेपाली ब्रान्डलाई पुर्‍याउने व्यवसायीहरू नेपालमा झण्डै एक दर्जनको हाराहारीमा छन् । रोचकको कुरा त, तिनै व्यवसायीको उत्पादन नेपालमा भए पनि खपत भने नेपालमा भन्दा बढी विकसित मुलुकहरूमा हुने गरेका छन् ।

चाउचाउ ब्राण्ड- वाइवाइ

नेपालमा उत्पादन भएर विदेशमा चर्चा पाउने उत्पादनको सूचीमा अग्रपङ्तिमा आउँछ, वाइवाइ चाउचाउ । सामान्यतया नेपाल शब्द नभएकैले पनि कतिपयलाई थाहा नहुन सक्छ, विश्वव्यापी रूपमा चर्चा कमाएको वाइवाइ चाउचाउ नेपाली उत्पादन हो भनेर ।

उद्योगी विनोद चौधरीको सीजी ग्रुपबाट उत्पादित वाइवाइ चाउचाउ अहिले १ सय ५० भन्दा बढी देशमा खपत हुँदै आएको छ । नेपालमा भन्दा ५०औँ गुणा बढी खपत विदेशमा हुने गरेको बताएको कम्पनीले अहिले भारत र युरोपको सर्बिया र दक्षिण कोरियालगायतका देशमा समेत उत्पादन सुरु गरिसकेको छ । योबाहेक बंगलादेश र साउदी अरबलगायतका मुलुकमा पनि उत्पादन सुरु गर्दै छ ।

नेपाली जुत्ता गोल्डस्टार

जुत्ता भनेकै गोल्डस्टार । यो थेगो नेपालमा निकै प्रयोग गरिन्छ । नेपालमा टिकाउ र राम्रो गुणस्तरको रूपमा मानिने गोल्डस्टार कम्पनीको उत्पादन गोल्डस्टार जुत्ताको चर्चा नेपालमा मात्र नभएर विदेशमा पनि उस्तै लोभलाग्दो छ । नेपालमा उत्पादन भएर विश्वका २० भन्दा धेरै देशहरूमा बिक्रीवितरण हुँदै आएको यस ब्रान्डको उत्पादन सबैभन्दा धेरै भारतमा निर्यात हुँदै आएको छ ।

नेपालमा भन्दा विदेशमा धेरै माग रहेको यो जुत्ता सबैभन्दा धेरै भारतमा बिक्री हुँदै आएको छ । योसँगै अस्ट्रेलिया, युरोप, चीन, बंगलादेश, श्रीलंका, पाकिस्तान, बहराइन, साउदी अरबलगायतका देशमा गोल्डस्टार ब्रान्ड चर्चित ब्रान्डको रूपमा फस्टाएको पाइन्छ ।

पारखीले रूचाएकाे खुकुरी रम

मदिराप्रेमीमाझ निकै लोकप्रिय रहेको खुकुरी रम पछिल्लो समय विदेशीहरूको पनि लोकप्रिय बन्दै आएको छ । द नेपाल डिस्टिलरी प्रालिले उत्पादन गरेको खुकुरी रम नेपालबाहेक १३ वटा देशमा बिक्रीवितरण हुँदै आएको छ । अझ रोचक कुरा त के छ भने ती देशहरूका मदिरामध्ये उत्कृष्ट मदिराहरूमा प्रतिस्पर्धी रूपमा उत्रेको खकुरी रम आफैँ एउटा गतिलो ब्रान्डसमेत बन्न पुगेको छ ।

नेपाल, अमेरिका, बंगलादेशलगायत युरोपियन देशहरूमा बढी खपत हुने खुकुरी रमले वर्षमा १ अर्ब ११ करोड ८० लाख रुपैयाँको कारोबार गर्छ । द नेपाल डिस्टिलरी प्रालिले चालु वर्षमा नै कारोबार बढाएर १ अर्ब ५५ करोड ६० लाख रुपैयाँको व्यापार गर्ने लक्ष्य पनि राखेको छ ।

६२ वर्ष पुरानो यो कम्पनीमा शरद टिवडेवालको ८० प्रतिशत र वसन्त चौधरीको २० प्रतिशत स्वामित्व छ।

हिमालयन जाभा

नेपालमा कफी पिउने चलन विकसित देशको तुलना निकै पछाडि छ । तर, पछिल्लो समय उपभोक्तामा कफी पिउने प्रचलन बढेसँगै नेपालमा कफी किङको उपमा पाएको हिमालयन जाभाले आक्रामक रूपमा कफी सपहरू खोलिरहेको छ । गुणस्तरकै कारण चर्चित बनेको हिमालयन जाभाको चर्चा नेपालमा मात्र भने सीमित छैन । १८ वर्षअगाडि ठमेलको एउटा सटरबाट सुरु भएको हिमालयन जाभा अहिले नेपालमा मात्रै नभएर विदेशमा पनि ब्रान्डको रूपमा स्थापित हुँदै गएको छ ।

अमेरिकास्थित हिमालयन जाभा । स्रोत : हिमालयन जाभा

व्यवसायी गगन प्रधानले सन् १९९९ मा ठमेलबाट सुरु गरेको हिमालयन जाभा काठमाडौंमा मात्रै ३६ भन्दा धेरै स्थानमा फैलिइसकेको छ भने पोखरा, जोमसोम, चितवन, नाम्चेलगायत स्थानमा विस्तारित छ । कम्पनीको चर्चा नेपालमा मात्रै सीमित छैन । अमेरिका, क्यानाडा, थाइल्याण्ड, भुटान, भारत र चीनमा पनि यसले आफ्नो शाखा विस्तार गरिसकेको छ । विदेशीको जिब्रोमा नेपाली स्वाद पुर्‍याउँदै आएको हिमालयन जाभा अन्तर्राष्ट्रिय बजारमा प्रतिस्पर्धी मानिन्छ ।

शक्ति मिलन नेपालका नेपाली ब्याग

शक्ति मिलन नेपालमा बनेको झोला बोक्दै विदेशी बालिका ।

नेपालमा प्रयोगपछि फाल्ने गरिएका बोरा तथा प्लास्टिकहरू संकलन गरेर त्यसलाई विभिन्न आकारमा ढालेर मनग्य आम्दानी गरिरहेकी छिन् शक्ति मिलन नेपाल प्रालिकी सञ्चालक प्रकृति मैनाली ।

चामलको बोराबाटै आकर्षक झोला, ह्याण्डब्यागलगायतका सामान उत्पादन गरेर विदेशमा बिक्रीवितरण गर्दै आएको शक्ति मिलनले बोरा र प्लास्टिकबाट झोला, ह्याण्डब्याग, पर्सलगायतका सामान बनाउँदै आएको छ । यी उत्पादन अहिले विदेशी अनलाइन सपिङ कम्पनी अमेजनमार्फत अस्ट्रेलिया, जर्मनी, अमेरिका, बेलायतजस्ता विकसित देशमा निर्यात भइरहेको छ । सानो लगानी र सानो जनशक्तिबाट सुरु भएको शक्ति नेपाल वर्षमा ३० हजारभन्दा बढी ब्याग झोला, पर्सजस्ता उत्पादन विदेशमा बिक्रीवितरण गर्दै आएको छ ।

सञ्चालक मैनाली प्लास्टिक र बोराबाट बनेका झोलाहरू अरुभन्दा बलियो र टिकाउ हुने, थरीथरीका चित्र र रङहरूले आकर्षक देखिने हुँदा विदेशीहरूमा यस्ता झोलाप्रतिको आकर्षण बढ्दो रहेको बताउँछिन् ।

नेपालमा खासै बिक्रीवितरण नभए पनि विदेशमा भने यस प्रकारको ब्याग ४० देखि ५० युरोसम्म बिक्री हुँदै आएको छ भने माग पनि बर्सेनि बढ्दो छ ।

सम्बन्धित समाचार

अमेजन पुग्यो नेपाली प्लास्टिक ब्याग

योबाहेक नेपालमै उत्पादित एनडीएच मसाला, बाजेको सेकुवा पनि अन्तर्राष्ट्रिय बजारमा हात हाल्दै गरेका नेपाली उत्पादन हुन् । यी उत्पादनबाहेक नेपालमा अन्य धेरै उत्पादन पनि विदेशिने गर्छन् । विशेषगरी हातबाट बनेका उत्पादनहरू, उनबाट बनेका उत्पादन तथा नेपाली गलैँचाहरू पनि नेपालबाट सर्वाधिक निर्यात हुनेमा पर्दछन् ।

सम्बन्धित समाचार

प्रकाशित मिति: आइतबार, मंसिर १९, २०७८ १३:५७