सरकारसँग छैन विदेशिएका विद्यार्थी फर्काउने योजना

A+ A A-

बर्सेनि कति विद्यार्थी उच्च शिक्षाका लागि विदेश जान्छन् भन्ने यकिन तथ्यांक शिक्षा, विज्ञान तथा प्रविधि मन्त्रालयसँग छैन । यद्यपि अध्ययन अनुमतिपत्र लिएको आधारलाई विदेशिएका विद्यार्थीको संख्या मापन गर्ने गरिएको छ ।

मन्त्रालयका अनुसार आर्थिक वर्ष २०७७/०७८ मा २७ हजार ९ सय ७८ जनाले एनओसी लिएका छन् । अघिल्लो आर्थिक वर्ष ३४ हजार ९४ जनाले एनओसी लिएका थिए ।

विद्यार्थीसँगै अर्बौं रकम पनि विदेशिएको छ । नेपाल राष्ट्र बैंकको अभिलेखमा ०७७/७८ मा शिक्षाक्षेत्रबाट २४ अर्ब ९६ करोड रकम बाहिरिँदा नेपालमा भने १ अर्ब ४ करोड मात्र भित्रिएको छ । तर, विद्यार्थी र पैसा विदेशिनबाट रोक्न सरकारसँग कुनै ठोस योजना नै छैन ।

‘राज्यले छात्रवृत्तिमा पढ्न पठाएको छ भने ल्याउनुपर्छ । फर्काउने वातावरण राज्यले बनाउने हो,’ शिक्षा मन्त्रालयका प्रवक्ता दीपक शर्मा भन्छन्, ‘यो शिक्षाले मात्र बनाउने होइन । शिक्षाले रोजगार दिने होइन । शिक्षाले अवसरका लागि योग्य बनाउने हो । राज्य संयन्त्रले अवसर दिने हो ।

विदेशिएका विद्यार्थीलाई फर्काउने योजना के छ त भन्ने प्रश्नमा प्रवक्ता शर्मा भन्छन्, ‘खास कार्यक्रमले भन्दा पनि साइकोलोजीमा परिवर्तन गर्नुपर्छ । हाम्रो गाउँ हामी नै बनाऊँ । यहाँबाट बाहिर नजाऊँ भन्ने बनाउने हो ।’ सरकारले नेपाललाई शैक्षिक पर्यटनको हब बनाउने नीति लिएको छ । तर, अहिलेसम्म कार्यान्वयन भएको छैन । ‘हब बनाउने नीति हो । यसलाई अगाडि बढाउन सकिएको छैन,’ उनी भन्छन् ।

सरकारले शिक्षा तथा विज्ञान, प्रविधिक्षेत्रमा चालु आर्थिक वर्षका लागि १ खर्ब ७८ अर्ब २० करोड बजेट छुट्याइएको छ । सरोकारवालाहरू शिक्षामा लगानी नपुगेको बताउँछन् । ‘विश्वविद्यालय खोलेको छ । तर, कसरी चलेको छ ? खर्च पुगेको छ कि छैन ? शिक्षामा लगानी गर्नुपर्‍यो,’ शिक्षाविद् केदारभक्त माथेमा भन्छन् ।

सम्बन्धित समाचार :

उच्च शिक्षामा विद्यार्थीसँगै विदेशिन्छ अर्बौं रकम