बोक्सी आरोप लगाउने माताविरुद्ध उजुरी

A+ A A-

झापाको मेचीनगर–९ की ८१ वर्षीया गंगामाया बस्नेतलाई बोक्सीको आरोप लगाउने दुई महिलाविरुद्ध प्रहरीमा उजुरी परेको छ ।

इलाका प्रहरी कार्यालय धुलाबारीका प्रमुख प्रहरी निरीक्षक टीका कार्कीले वृद्धा बस्नेतलाई बोक्सीको आरोप लगाउने मेचीनगर–९ की कुमारी चम्लागाईं र आफूलाई बूढीबजै भनेर चिनाउँदै फारफुक गर्ने माता सावित्री शिवाकोटीविरुद्ध उजुरी परेको बताए ।

बिरामी भएर झारफुकका लागि गत ७ जेठमा माताको मन्दिरमा पुगेकी चम्लागाईंले बक्ने क्रममा साँध जोडिएको छिमेकी वृद्धा बस्नेतलाई बोक्सीको आरोप लगाएकी थिइन् । झारफुकको क्रममा चम्लागाईंलाई गालामा चड्कन लगाउँदै र कपाल भुत्ल्याउँदै माता शिवाकोटीले बोक्सी बक्न लगाएको भिडियो सार्वजनिक भएको थियो । भिडियो रेकर्डमा माताले पिटेपछि वृद्धा बस्नेतलाई चम्लागाईंले बोक्सीको आरोप लगाएको देख्न र सुन्न सकिन्छ ।

बोक्सीको आरोप लगाएपछि वृद्धा बस्नेतले आपत्ति जनाउँदै आएकी थिइन् । तर, गाउँमै मुद्दा मिलाउन स्थानीय वडाका अध्यक्ष गोपाल खड्कालगायत गाउँकै केही महिला अगुवाले दबाब दिएको वृद्धा बताउँछिन् ।

जनप्रतिनिधि र केही गाउँले माता र बोक्सी आरोप लगाउनेहरुकै पक्षमा लागेपछि असह्य अनुभूति गरेकी पीडित वृद्धा बस्नेतले १८ जेठमा इलाका प्रहरी कार्यालय धुलाबारीमा आरोप लगाउने चम्लागाईंविरुद्ध कानूनी कारबाहीको माग गर्दै उजुरी दिएकी थिइन् । माता शिवाकोटीविरुद्ध बिहीबार उजुरी परेको प्रहरीले जनाएको छ ।

प्रहरी निरीक्षक कार्कीले पीडितको उजुरीबमोजिम आरोपीलाई नियन्त्रणमा लिने प्रयास गरिरहेको बताए । आरोपी चम्लागाईं घरमा नभेटिएको हुँदा खोजी कार्य भइरहेको प्रहरीले जनाएको छ ।

मेचीनगरका प्रमुख विमल आचार्य र उपप्रमुख मीना उप्रेतीले पीडित वृद्धा बस्नेतको घरैमा पुगेर न्याय दिलाउन मद्दत गर्ने आश्वासन दिएका छन् ।

प्रकाशित मिति: शुक्रबार, जेठ ३१, २०७६ १९:२७