देउखुरीमा वैज्ञानिक वन व्यवस्थापन सुरु

A+ A A-

दाङको देउखुरीमा वन डिभिजन कार्यालय लमहीले वनको संरक्षण तथा प्रवर्धनका लागि वैज्ञानिक वन व्यवस्थापन सुरु गरेको छ । देउखुरीका चार पालिका क्षेत्रमा रहेका १४८ सामुदायिक वनमध्ये १७ सामुदायिक वनमा वैज्ञानिक वन व्यवस्थापनको कार्ययोजना सुरु भएको डिभिजन वन कार्यालय लमहीले जनाएको छ ।

डिभिजन वन कार्यालयका सहायक वन अधिकृत लालबाबु यादवका अनुसार १५ सामुदायिक वनमा वैज्ञानिक वन व्यवस्थापनको काम लागू पनि भइसकेको छ । वैज्ञानिक वन व्यवस्थापनको मुख्य उद्देश्य सामुदायिक वनमा रहेका बूढा, पुराना र ढलेका रुख हटाएर नयाँ बिरुवा उत्पादन गर्नु रहेको छ । पुराना रुखभित्र कीरा लाग्ने र धोद्रिँदा ती रुखको काठ काम नलाग्ने हुँदा समयमै त्यसको उपयोग गरी नयाँ बिरुवा उत्पादन गर्ने तयारीमा वन कार्यालय लागेको छ ।

देउखुरीको राजपुर गाउँपालिकास्थित प्रतापपुरमा त्रिशक्ति सामुदायिक वन, शिव सामुदायिक वन र गढवा गाउँपालिकामा रहेको सूर्य सामुदायिक वनलगायतमा वैज्ञानिक वन व्यवस्थापनअन्तगर्तका काम भएका छन् । सामुदायिक वन उपभोक्ताबाट पनि वैज्ञानिक वन व्यवस्थापनको विषयमा चासो देखाउँदै सक्रिय सहभागिता रहँदै आएको छ ।

वैज्ञानिक वन व्यवस्थापनको विषयमा कानूनी स्पष्टता नभएकै कारण समस्या हुने गरेको त्रिशक्ति सामुदायिक वन उपभोक्ता समूहका अध्यक्ष हरिबहादुर विकले जानकारी गराए । ‘सालका बूढा रुख सबै भित्रभित्रै कुहिएका छन्, राखेर फाइदा छैन, समयमै यसलाई व्यवस्थापन गर्न सकियो भने नयाँ बिरुवा हुर्कन पाउँछन्,‘ उनले भने, ‘उक्त सामुदायिक वनको ५०० हेक्टरमध्ये प्रत्येक वर्ष पाँच हेक्टर क्षेत्रमा वन व्यवस्थापनको काम गर्ने योजना रहेको छ ।‘

त्यसो त सोही वनसँगैको शिव सामुदायिक वनमा पनि पुरानो रुखको संख्या अत्यधिक भएको र चरीचरन नरोकिँदा नयाँ सालको बोटबिरुवा उत्पादन हुन छाडेपछि जंगलमै जोतेर नयाँ सालको बिरुवा उत्पादनको काम सुरु गरिएको छ । पुनःउत्पादन प्रवर्धन कार्यक्रमअन्तर्गत २० हेक्टर क्षेत्रमा नयाँ सालको बिरुवा उत्पादनको कामको थालनी गरिएको हो ।

प्रकाशित मिति: शुक्रबार, जेठ ३१, २०७६ १६:४७