राहत शिक्षकलाई मापदण्ड बनाएर स्थायी : शिक्षामन्त्री

A+ A A-

शिक्षा, विज्ञान तथा प्रविधिमन्त्री गिरिराजमणि पोखरेलले विद्यालय जागिर खाने ठाउँ नभई देश बनाउने ठाउँ भएको बताएका छन् । कतिपय शिक्षक विद्यालयलाई जागिर खाने थलोको रूपमा मात्र लिएर विद्यार्थीको भविष्यमाथि खेलबाड गर्ने गरेको भन्दै उनले सिकाइ केन्द्रित भएर विद्यालयमा काम गर्न शिक्षकलाई निर्देशन दिए ।

खोटाङको रावाबेंसी गाउँपालिका–२ खार्पास्थित शारदा माध्यमिक विद्यालयको ६७औं वार्षिकोत्सवको उद्घाटन कार्यक्रममा सोमबार उनले विद्यार्थीमा भएको प्रतिभा प्रस्फुटित गराउने काम शिक्षकको भएको बताए । ‘सबैभन्दा राम्रा मान्छे शिक्षण पेसामा आउने हो,‘ उनले भने, ‘सक्नुहुन्छ भने शिक्षण पेसा गर्नुहोस्, यदि सक्नुहुन्न भने शिक्षण पेसा छाडेर अन्य पेसा अपनाउनुहोस् ।‘

विभिन्न कार्यक्रमका लागि आफ्नो गृह जिल्ला खोटाङ आएका शिक्षामन्त्री पोखरेलले शिक्षकले विद्यार्थीको भविष्यमाथि खेलबाड गर्नु भनेको देशमाथि नै खेलबाड गर्नु भएकाले सबै शिक्षकले ध्यान दिनुपर्ने बताए । ‘अबको शिक्षा सीपयुक्त शिक्षा हुनेछ,‘ उनले भने, ‘१२ कक्षा उत्तीर्ण गरेका विद्यार्थीले कम्तीमा एउटा पेसा अँगाल्न सक्ने गरी सीप हासिल गराउने योजनामा सरकार लागिपरेको छ ।‘

शिक्षामन्त्री पोखरेलले परम्परागत शिक्षाले देशमा बेरोजगार मात्र उत्पादन गरेको भन्दै सरकारले पछिल्लो समय प्राविधिक शिक्षामा जोड दिएको बताए । ‘पारस खड्काहरु क्रिकेट खेलेर पनि आफ्नो भविष्य बनाउन सफल भएका छन्,‘ उनले भने, ‘आगामी दिनमा विद्यार्थीको इच्छा, चाहना र क्षमताको आधारमा अध्ययन गराउने गरी शिक्षा योजना बनाउने काम भइरहेको छ ।‘

आफ्नो क्षेत्रमा सञ्चालित विद्यालयमा रिक्त रहेका शिक्षक पदपूर्ति गर्दा शिक्षक सेवा आयोग उत्तीर्ण गरेका व्यक्तिलाई मात्र भर्ना गर्न उनले स्थानीय सरकारलाई आग्रह गरे । ‘सरकारले दक्ष शिक्षक उत्पादन गर्न शिक्षक सेवा आयोगमार्फत विज्ञापन आह्वान गरेको छ,‘ उनले भने, ‘भोट र नातागोताका आधारमा शिक्षक भर्ना नगर्नुहोला, त्यसरी भर्ना गरिएका शिक्षकबाट गुणस्तरीय शिक्षा सम्भव छैन ।‘

देशमा राहत शिक्षकको पनि महत्त्वपूर्ण योगदान रहेको उल्लेख गर्दै उनले राहत शिक्षकका लागि निश्चित मापदण्ड बनाएर स्थायी गर्ने प्रक्रियामा लाने तयारी गरिएको बताए ।