मिर्गौला प्रत्यारोपण गरेर स्वदेश फर्किँदै पूर्वप्रधानमन्त्री खनाल, मिर्गौला दिने मेरिना को हुन् ?

मिर्गौला प्रत्यारोपण गरेर स्वदेश फर्किँदै पूर्वप्रधानमन्त्री खनाल, मिर्गौला दिने मेरिना को हुन् ?

A+ A A-

नेकपा एकीकृत समाजवादीका वरिष्ठ नेता झलनाथ खनाल भारतको एपोलो अस्पतालमा मिर्गौला प्रत्यारोपण गरेर दुई महिनापछि स्वदेश फर्किन लागेका छन् । उनी अस्पतालबाट डिस्चार्ज भएर आज ३ बजेर ४५ मिनेटमा स्वदेश आइपुग्ने एकीकृत समाजवादीकी केन्द्रीय सदस्य दिलु पन्तले जानकारी दिइन् ।

गत माघमै उनको मिर्गौलाले काम नगरेको चिकित्सकहरूले बताएका थिए । नियमित डायलाइसिस गरिरहेका नेता खनाल २ असारमा उपचारका लागि भारत गएका आएका थिए । डायलाइसिसले नभएपछि उनको मिर्गौला प्रत्यारोपण नै गर्नुपर्‍यो ।

कसले दियो मिर्गौला ?

नेपालको कानुनले मिर्गौला दिने व्यक्ति नातेदार हुनुपर्छ । नातेदारले दिन चाहेर मात्र हुँदैन । मेडिकल्ली पनि फिट हुनुपर्छ । मिर्गौला दिने र लिने दुवैको ब्लड ग्रुप मिल्नुपर्छ । दाता व्यक्तिलाई कुनै पनि रोग लागेको हुनु हुँदैन ।

नेता खनालले आफूलाई उनकी श्रीमती रविलक्ष्मी चित्रकारकी दिदीकी छोरी मेरिना चित्रकारले मिर्गौला दिएको बताएका छन् । कान्तिपुरसँगको अन्तर्वार्तामा नेता खनालले भनेका छन्, ‘चिकित्सकले किड्नी ट्रान्सप्लान्ट गर्नुपर्ने भनेपछि म दाता खोज्दै थिएँ, अलिअलि सूचना प्रवाह गरिरहेको थिएँ । त्यही बेला मेरी श्रीमतीकी दिदीकी छोरी मेरिना चित्रकारले आफैँ सम्पर्क गरिन् । यस्ता दाता असाध्यै दुर्लभ हुन्छन् । मेरिनाले मलाई नयाँ जीवन दिएकी छन् ।’

मिर्गौलाले १० प्रतिशतभन्दा कम काम गर्न थालेपछि डायलाइसिस वा प्रत्यारोपण गर्नुपर्ने चिकित्कसहरूले बताउँदै आएका छन् ।

प्रत्यारोपण गरेको मिर्गौलाले कति वर्ष काम गर्छ ?

प्रत्यारोपण गरेको मिर्गौलाले १० देखि ३० वर्षसम्म काम गर्ने बताउँछन्, मिर्गौला रोग विशेषज्ञ डा. ऋषि काफ्ले । ‘प्रत्यारोपण गरेको मिर्गौलाले यति नै वर्ष काम गर्छ भन्ने छैन । प्रत्यारोपण गरेको ५ वर्षमै काम नगर्ने पनि हुनसक्छ । १० देखि ३० वर्षसम्म पनि काम गर्न सक्छ । आफूले आफ्नो स्वास्थ्यलाई कति केयर गरेको छ, त्यति नै मिर्गौलाले काम गर्छ,’ उनले भने ।