मनपरी व्ययको यस्तो नमूना, वुहानबाट नेपाली ल्याउँदा प्रति व्यक्ति सात लाख खर्च

मनपरी व्ययको यस्तो नमूना, वुहानबाट नेपाली ल्याउँदा प्रति व्यक्ति सात लाख खर्च

A+ A A-

सरकारले कोभिड-१९ रोकथाम उपचार तथा नियन्त्रणको नाममा मनपरी खर्च गरेको पाइएको छ ।

महालेखा परीक्षकको कार्यालयको ५८औं लेखा परीक्षण प्रतिवेदन अनुसार आर्थिक वर्ष २०७६/७७ को चार महिनामा संघीय कोरोना कोष, संघीय सरकार, प्रदेश सरकार र स्थानीय तहबाटसमेत गरी सो शीर्षकमा १३ अर्ब ५४ करोड ३९ लाख रुपैयाँ खर्च गरेको छ । जुन खर्च अपारदर्शी ढंगले भएको देखिएको छ ।

प्रतिवेदनअनुसार चीनको वुहानमा रहेका एक सय ८७ जना नेपाली नागरिकलाई नेपाल ल्याउँदा १३ करोड ८७ लाख रुपैयाँ रकम निकासा गरिएको छ ।

संस्कृति पर्यटन तथा नागरिक उड्डयन मन्त्रालयको नाममा हवाई उडान उद्धार तथा स्थानीय यातायात बापत चार करोड ४९ लाख ७९ हजार खर्च गरिएको छ । त्यस्तै उनीहरुलाई आवश्यक पर्ने सामग्री खरिद, खाना, औषधिलगायतमा समेत गरी १३ करोड २८ लाख ४७ हजार खर्च गरिएको प्रतिवेदनमा उल्लेख गरिएको छ । यो हिसाबले एक जना बराबर ७ लाख १० हजार रुपैयाँ खर्च भएको हो ।

यस्तै खरिद गरेको सामग्रीको व्यवस्थापनमा समेत कमजोरी रहेको भेटिएको छ। कोभिड-१९ को परीक्षणका लागि स्वास्थ्य सेवा विभागले दुई आपूर्तिकर्तासँग २७ करोड ८१ लाख ८३ हजारमा तीन लाख ९६ हजार चार सय ४५ थान किट खरिद गरेकोमा तीन लाख १२ हजार चार सय दुई थान किट प्रयोग भएको छ ।

८४ हजार ४३ किट प्रयोगविहीन हुँदा पाँच करोड २९ लाख रकम नोक्सानी भएको छ । किटको आवश्यकता र प्रयोगको औचित्यका बारेमा विस्तृत अध्ययन र विश्लेषण नै नगरी खरिद गरिएकोमा महालेखा परीक्षकको कार्यालयले प्रश्न उठाएको छ ।

प्रकाशित मिति: शुक्रबार, भदौ ४, २०७८ २०:१४