वायुसेवा निगममा बेथिति: उडान बन्द भएका बेला बाँडियो अतिरिक्त ४ करोड ६८ लाख भत्ता (सूचीसहित)

वायुसेवा निगममा बेथिति: उडान बन्द भएका बेला बाँडियो अतिरिक्त ४ करोड ६८ लाख भत्ता (सूचीसहित)

A+ A A-

सरकारले कोरोना संक्रमण बढेको भन्दै ११ चैत २०७६ मा देशभर लकडाउन गर्‍यो । लकडाउनका कारण सबैभन्दा बढी यातायात र हवाई क्षेत्र प्रभावित भएका थिए । चैतमा फ्याट्फुट्ट उडान भए पनि वैशाख र जेठमा भने उडान ठप्प नै भयो । औषधि बोक्न तथा अत्यावश्यक कामका लागि चार्टर्ड उडान गरिए पनि नियमित उडान भने बन्द नै रहे ।

उडान बन्द भए पनि निजीक्षेत्रका सेवा प्रदायकहरूले कर्मचारीलाई दिने सबै किसिमका भत्ता कटौती गरे । कतिपय कर्मचारीलाई त बेतलबी बिदामा पनि राखियो । तर, राष्ट्रिय ध्वजाबाहक नेपाल वायुसेवा निगमले भने त्यो समयमा आफ्ना कर्मचारीलाई ४ करोड ६८ लाख रुपैयाँ भत्ता बाड्यो । नियमित तलबभत्ताबाहेकको रकम निगमले कर्मचारीलाई दिएको हो ।

निगमले २०७६ चैत, २०७७ को वैशाख र जेठमा ४ करोड ६८ लाख १९ हजार ११८ रुपैयाँ भत्ता वितरण गरेको पाइएको छ ।२०७६ चैतमा १५ शीर्षकमा १ करोड १७ लाख ३३ हजार ४ सय ६५ रुपैयाँ कमर्चारीलाई भत्ता स्वरुप उपलब्ध गराइएको छ ।

चैत महिनामा अतिरिक्त समय काम गरेबापत भत्ता नपाए पनि वैशाखमा ४४० कर्मचारीले ४१ लाख ८७ हजार ६६९ रुपैयाँको अतरिक्त कामबापतको रकम लिएका छन् भने अन्य १९ शीर्षकमा १ करोड ६० लाख बढी रकम गरी २ करोड २ लाख रुपैयाँ भत्ता लिएका छन् ।

त्यस्तै जेठ महिनामा १८३ कर्मचारीले अतिरिक्त समयमा काम गरेको भन्दै १० लाख रुपैयाँसहित ४४ लाख ५५ हजार रुपैयाँ अतिरिक्त भत्ता लिएका छन् । २० शीर्षकमध्ये सबै शीर्षकमा गरेर चैतमा ३२ सय ४७, वैशाखमा ४३ सय ८ र जेठमा ४२ सय ३६ कर्मचारीले यस्तो भत्ता लिएका छन् । कर्मचारीले न्यूनतम १० देखि २० शीर्षकमा भत्ता लिएको प्रमाण भेटिएको छ ।

सार्वजनिक खर्चमा मितव्ययिता र प्रभावकारिता कायम गर्ने सम्बन्धी नीतिगत मार्गदर्शन, २०७५ ले तीन किसिमकाबाहेक भत्ता दिनु नपर्ने व्यवस्था मिलाउन भनेको थियो ।

‘महँगी भत्ता, पोशाक भत्ता र स्थानीय भत्ताबाहेक अरु सबै भत्ता खारेज गर्ने र कानुनमा नै व्यवस्था गरी दिइएका भत्ता हटाउन ती कानुनमा तीन महिनाभित्र आवश्यक संशोधन प्रस्ताव गरी सक्नुपर्ने’ बजेट मार्गदर्शन २०७५ मा भनिएको छ ।