वायुसेवा निगमबाट रकम असुल्‍ने काइदा : ५ घण्टामा ६ पटक बैठक, दिनकै २४ हजार भत्ता

वायुसेवा निगमबाट रकम असुल्‍ने काइदा : ५ घण्टामा ६ पटक बैठक, दिनकै २४ हजार भत्ता

A+ A A-

सरकारी स्वामित्वको वायुसेवा निगम दिनानुदिन खस्कँदो अवस्थामा छ । निरन्तर आर्थिक भार बढ्दै गए पनि सञ्चालक समिति सदस्य तथा कर्मचारीहरूले भने निगमलाई चरम दोहोन गरिरहेका छन् ।

२०७६ असोज ७ गते वायु सेवा निगम निकै सक्रिय भएको देखिन्छ । त्यो दिन वायुसेवा निगमले एकै दिनमा ६ वटा बैठक राखेको छ । त्यो पनि बिहान ३ घण्टा र बेलुका २ घण्टाको अवधिमा । एकै प्रकारको निर्णय गर्न ६ पटक माइन्युट गरिएको छ ।

सामान्यतया पाँच घण्टासम्मको बैठक एकै माइन्युटमा सकिने भए पनि भत्ता पाउनको लागि नै निगमले एकै दिनमा ६ वटा बैठक राखेर माइन्युट गरेको तथ्य फेला परेका छ ।

निगमका कर्मचारीको दाबीलाई आधार मान्ने हो भने एकै दिनमा १० वटासम्म यस्ता बैठक बसेको पाइन्छ । 'कहाँ ६ वटा मात्रै हुनु यहाँ भत्ता लिनको लागि दिनको १० वटा पनि बैठक गरिन्छ,' एक उच्च कर्मचारीले भने ।

निगम सञ्चालक समितिको बैठक : २०७६ असोजन ७

बिहान ६:३०
बिहान ८:३०
बिहान ९:४५
बेलुका ५:१५
बेलुका ६:१५
बेलुका ७:००

बिहान साढे ७ बजेदेखि पौने १० बजेको अवधिमा अर्थात २ घण्टा १५ मिनेटको अवधिमा तीन पटक निगमको बैठक डाकिएको छ । त्यसै दिन बेलुका सवा ५ बजेदेखि ७ बजेसम्म एक घण्टा ४५ मिनेको अवधिमा थप तीन वटा बैठक बसेको छ ।

निगमका तत्कालीन अध्यक्ष मदन खरेल । उनलाई २०७५ भदौमा नियुक्त गरिएको थियो । २०७६ माघमा उनले राजीनामा दिएका थिए ।

निगम सञ्चालक समितिका ७ जनाको हुन्छ । निगम स्रोतका अनुसार एक जना सञ्चालक समिति सदस्‍यले एउटा बैठक बसेबापत ४ हजार भत्ता पाउँछ ।

यस हिसाबले एकै दिनमा १ लाख ६८ हजार बैठक भत्ता खर्च निस्कन्छ । एक जना सञ्चालक समिति सदस्यले २४ हजार रुपैयाँ भत्ता पाउँछ । यो सञ्चालक समितिको बैठकको अध्यक्षता तत्कालीन कार्यकारी अध्यक्ष मदन खरेलले गरेका छन् ।

सञ्चालक समितिको बैठक मात्रै होइन पदपूर्ति समितिको बैठक पनि यसै गरी बसेको छ । २०७६ माग २९ गते ४ पटक पदपूर्ति समितिको बैठक बसेको छ भने माग २ गते दुई पटक र पुस २८ गते २ पटक पदपूर्ति समसतिको बैठक बसेको छ ।

माग २९ गतेको बैठक बेलुका सवा ५ बजे, ६ र ७ बजे राखिएको छ । त्यसै दिन बिहान ८ बजे पनि पदपूर्ति समितिको बैठक राखिएको थियो ।

त्यस्तै २ माघको दिन पनि एक एक घण्टाको अवधिमा २ पटमा र २८ पुसमा पनि एक घण्टाको अवधिमा २ पटक बैठक राखिएको छ । पदपूर्ति समिति ५ जनाको हुन्छ । एक पटकको बैठक बराबर समिति सदस्यले २५ सय रुपैयाँ पाउने गर्छन् । यस हिसाबले एकै दिनमा १० हजारसम्म भत्ता पाएको देखिन्छ भने एकै दिन पदपूर्ति समितिको बैठक भत्ताबापत ५० हजार खर्च भएको छ ।

निगम सञ्चाल समिति, पदपूर्ति समिति तथा अन्य उपसिमतिको बैठक १५ मिनेट, आधा घण्टाको सयम फरक पार्ने तथा साँझ बिहानको फरक देखाई बैठक बसेर भत्ता लिने प्रवृत्तीले निगमको दोहोनको खेललाई देखाउँछ ।

बैठक भत्ता सम्बन्धी व्यवस्था

बैठक भत्ताको नाममा मनपरी भत्ता लिन थालेपछि अर्थ मन्त्रालयले नियन्त्रणको प्रयास गरेको थियो । अर्थ मन्त्रालयको सार्वजनिक खर्चमा मितव्ययीता र प्रभावकारीता कायम गर्नेसम्बन्धी नीतिगत मार्गदर्शन, २०७५ मा सबै प्रकारका संवैधानिक एवं सरकारी निकाय, सरकारको लगानीमा स्थापित सबै संस्था र स्थानीय निकाय तथा सार्वजनिक पद धारण गरेका व्यक्तिहरूले समेत अधिकतम मितव्ययी ढंगले कार्यसम्पादन गर्ने निर्देशन गरेको छ ।

कार्यालयमा कर्मचारी भर्ना छनौटका लागि विभिन्न समितिहरू जस्तै अन्तर्गत समिति, कर्मचारी छनौट समिति, पदपूर्ति समिति, सञ्चालक समिति आदि रहेको र उक्त समितिहरूले उस्तै प्रकृतिको कार्य तथा एउटै बैठकमा गर्न सकिने निर्णय उपर पनि एकै दिन पटक पटक बैठक बसी भत्ता खाने प्रयोजनका लागि मात्र निर्णय टुक्राएर गरेको निगम स्रोतले जनाएको छ । तर, नियन्त्रण गर्न तालुकदार निकाय भने चुकेका छन् ।

प्रकाशित मिति: मंगलबार, भदौ १, २०७८ ११:४४