वायुसेवा निगमले सिध्याउँछ मनोरञ्जन भत्तामै वार्षिक १८ लाख

A+ A A-

सरकारी निकाय र संस्थानका कर्मचारीले भत्ता के-के शीर्षकमा पाउँछन् होला ? यसबारे धेरैलाई थाहा नहुन सक्छ ।

सरकारले पछिल्लो पटक महँगी, पोशाक र स्थानीय भत्ता मात्रै भत्ताको सूचीमा राखेको छ । आर्थिक वर्ष २०७५-७६ को बजेट मार्गदर्शनमा यी बाहेकका भत्ता हटाउन र कानुन अनुसार दिनुपर्ने अन्य भत्ता छन् भने तीन महिनाभित्र कानुन संशोधन गरी खारेज गरिनुपर्ने उल्लेख छ ।

तर अधिकांश सरकारी निकायले अन्य भत्ताहरू खारेज गरेको पाइँदैन । ऋण लिएर जहाज किनेर घाटामा चलिरहेको राष्ट्रिय ध्वजाबाहक नेपाल वायुसेवा निगममा कर्मचारीलाई दिइने भत्ताका अनेक शीर्षक भेटिन्छ । कर्मचारी सञ्चय कोष र नागरिक लगानी कोषको मासिक किस्ता तिर्न कठिन भइरहेको निगमले भने आफ्ना कर्मचारीलाई मासिक १ लाख ५० हजार ६ सय रुपैयाँका दरले वार्षिक १८ लाख ५० हजार भत्ता वितरण गरेको पाइएको छ ।

आर्थिक वर्ष २०७६/७७ मा मात्रै छैठौँ र सातौँ तहका कर्मचारीलाई चार सय २८ कर्मचारीको लागि १० लाख २७ हजार रुपैयाँ मनोरञ्जन भत्ता वितरण गरिएको हो । त्यस्तै आठौँ र नवौँ तहका एक सय ५२ जना कर्मचारीलाई ७ लाख २९ हजार वितरण गरिएको छ भने १० औँ र ११ ‍औँ तहका सात जना कर्मचारीलाई ५० हजार चार सय रुपैयाँ वितरण गरिएको वायुसेवा निगमको वित्तीय विवरणमा उल्लेख छ ।

निगमले मनोरञ्जन भत्ता शीर्षकमा छैठौँ र सातौँ तहका कर्मचारीलाई दुई सय, आठौँ र नवौँ तहका कर्मचारीलाई चार सय र १० र ११ औँ तहका कर्मचारीलाई ६ सय रुपैयाँ मनोरञ्जन भत्ता उपलब्ध गराएको पाइएको छ । कर्मचारीलाई यसरी अनावश्यक भत्ता उपलब्ध गराए पनि कर गणनामा भने यो रकम लुकाइएको छ ।

वायुसेवा निगमले ३० वर्ष पुरानो बोइङ जहाजको नाममा आठ जना कर्मचारीलाई मासिक तीन लाख १६ हजार रुपैयाँ र वार्षिक ३९ लाख बढी रकम भत्ताका नाममा दिएको छ ।

त्यस्तै भत्ता लिनको लागि एउटै निर्णय टुक्राएर एकै दिनमा ६ पटक बैठक राखेर १ लाख ६८ हजार रुपैयाँसम्म भत्ता दिएको पाइएको छ । यस्तै पदपूर्ति समितिको बैठक पनि एकै दिनमा तीन पटकसम्म बोलाएर एकै जना सदस्यलाई १० हजारसम्म भत्ता दिएको विवरणमा उल्लेख भएको छ ।