बीपी प्रतिष्ठानका पदाधिकारीको कार्यकक्षमा तालाबन्दी, माग पूरा गर्न सातदिने अल्टिमेटम

बीपी प्रतिष्ठानका पदाधिकारीको कार्यकक्षमा तालाबन्दी, माग पूरा गर्न सातदिने अल्टिमेटम

तस्वीर - पदम नेपालीको ट्विटरबाट

A+ A A-

सुनसरीको धरानस्थित बीपी कोइराला स्वास्थ्य विज्ञान प्रतिष्ठानको बेथितिविरुद्ध आन्दोलनरत संयुक्त संघर्ष समितिले आफ्ना माग पूरा गर्न सातदिने अल्टिमेटम दिएको छ । संयुक्त संघर्ष समितिले २३ असारभित्र आफ्ना माग पूरा गर्न अल्टिमेटम दिएको हो ।

संघर्ष समितिले उक्त समयभित्र माग पूरा नभए प्रतिष्ठानका सम्पूर्ण फ्याकल्टी, कर्मचारी, आवासीय चिकित्सक र विद्यार्थीसहित सामूहिक राजीनामा दिएर प्रधानमन्त्री कार्यालय घेराउ गर्ने चेतावनी दिएको छ । प्रतिष्ठानका चारै जना पदाधिकारीको कार्यकक्षमा तालाबन्दीसमेत गरिएकाे छ ।

१ असारदेखि प्रतिष्ठानमा कार्यरत चिकित्सक, कर्मचारी र विद्यार्थी आन्दोलित छन् । मंगलबार पदाधिकारीसितको वार्तामा उपकुलपति प्राडा ज्ञानेन्द्र गिरी रक्सी खाएर उपस्थित भएकाे भन्दै वार्ता भाँडिएको थियो । बुधबारदेखि सातदिने अल्टिमेटमसहित पदाधिकारीको कार्यकक्षमा तालाबन्दी गरेर आन्दोलन अघि बढाएको संघर्ष समितिले जनाएको छ ।

तस्वीर स्रोत : पदम नेपालीको ट्विटरबाट

प्रतिष्ठानको साख र प्रतिष्ठा पुनः स्थापित गर्दै शुद्धीकरणको अभिप्रायले विगत १६ दिनदेखि आन्दोलन गरिरहेकाे संयुक्त संघर्ष समितिले कुलपति एवं प्रधानमन्त्रीलाई जानकारी गराउँदा पनि यसको समाधान नभएकाले सोमबारदेखि आन्दोलनको स्वरूप परिवर्तन गरेर रिले अनशन सुरु गरेको थियो ।

आन्दोलनकारीकाे माग सम्बोधन गर्न पदाधिकारीहरूको शून्य तयारीले स्तब्ध तुल्याएको भन्दै समितिले विज्ञप्ति जारी गरेको छ । मंगलबार आन्दोलनका क्रममा बाहिरबाट असम्बन्धित व्यक्ति प्रवेश गरी अराजक गतिविधि गरेर संघर्ष समितिको आन्दोलनलाई तुहाउने प्रयास भएको समितिका सदस्य डा. पदम नेपालीले बताए ।

अक्षम सम्पूर्ण पदाधिकारीहरूको राजीनामा एवं बहिर्गमन हुनुपर्ने, प्रधानमन्त्रीकै पहलमा उच्चस्तरीय वार्ता टोली गठन गरिनुपर्ने, अबका दिनमा पदाधिकारीहरू चयन गर्दा विभिन्न आयोग एवं विज्ञहरूले दिएको सुझावअनुसार गर्नुपर्नेलगायत माग पनि आन्दाेलनकारीले अघि सारेका छन् ।

प्रकाशित मिति: बुधबार, असार १६, २०७८ १७:२६