विश्वासको मत लिन लागेका मुख्यमन्त्री कृष्णचन्द्र मनाङमै रोकिए, भोलि के हुन्छ ?

विश्वासको मत लिन लागेका मुख्यमन्त्री कृष्णचन्द्र मनाङमै रोकिए, भोलि के हुन्छ ?

A+ A A-

गण्डकी प्रदेशका मुख्यमन्त्री कृष्णचन्द्र नेपाली पोखरेल शुक्रबार संसदबाट विश्वासको मत लिने तयारीमा छन् ।

बिहीबार बाढी प्रभावितका लागि पोखराबाट राहत लिएर गएको उनीसहितको टोली मनाङमै रोकिएको छ ।

अपरान्ह चार बजे पोखरा फर्किने तयारी गरिरहँदा मौसम खराब भयो । साँझ साढे ६ बजे विस्थापितसहित २६ जनालाई लिएर पोखरातर्फ उडेको नेपाली सेनाको हेलिकोप्टर फेरि चामे फर्कनप¥यो ।

मुख्यमन्त्री पोखरेल, मन्त्री राजीव गुरुङ, सांसद चिन्तबहादुर घले र पोखराबाट गएका दुई जना पत्रकार आज जिल्ला सदरमुकाम चामेमा बस्ने भएको छ ।

मौसम खुलेमा मुख्यमन्त्री पोखरेलसहिको टोली शुक्रबार बिहान पोखरा फर्किने छ ।

शुक्रबार बिहान मौसम खुलेन र भोलि पनि पोखरा आउन सक्ने अवस्था नभए विश्वासको मत लिने कार्यसूची पछि धकेलिने भएको छ । सरकारका प्रवक्ता तथा मन्त्री कुमार खड्काले मुख्यमन्त्री आउन नसके अर्को दिनको कार्यसूचीमा राख्नेबारे संसद सचिवालयसँग कुरा भइसकेको जानकारी दिए ।

‘आउन नसक्नुभएमा अर्को दिनको कार्यसूचीमा राखिने छ । यसका बारेमा संसद सचिवालयमा कुरा भइसकेको छ,’ उनले फेसबुकमा लेखेका छन्, ‘विश्वास मत सम्बन्धी प्रस्ताव माननीय मुख्यमन्त्रीज्यूले नै टेबल गर्नुपर्ने भएकाले संसदमा उहाँको उपस्थिति अनिवार्य रहन्छ ।’

मुख्यमन्त्री नियुक्त भएको तीस दिनभित्र विश्वासको मत लिनुपर्ने व्यवस्था संविधानमा छ । गत २९ जेठमा मुख्यमन्त्री नियुक्त भएका उनले नियुक्तिको एक हप्ता नपुग्दै विश्वासको मत लिन लागेका हुन् ।

संविधानको धारा १६८ (५) अनुसार चार दल र एक स्वतन्त्र सांसदको समर्थनमा मुख्यमन्त्री बनेका पोखरेलले सोही उपधारा ६ बमोजिम विश्वासको मत लिन लागेका हुन् ।

उनले विश्वासको मत पाउने पक्का छ । ६० सदस्यीय गण्डकी प्रदेश सभाका एक सांसद पदमुक्त भएसँगै प्रदेशमा कायम सांसद संख्या ५९ छ ।

मुख्यमन्त्री पोखरेलले ३० सांसद आफ्नो पक्षमा पार्नुपर्ने हुन्छ । उनको पक्षमा स्पष्ट ३१ जना सांसद छन् ।

कांग्रेसका १५, माओवादीका १२, राष्ट्रिय जनमोर्चा र जनता समाजवादी पार्टीका दुई/दुई र एक स्वतन्त्र सांसद गरेर मुख्यमन्त्री पोखरेललाई ३१ सांसदको समर्थन छ ।

यदी कुनै कारण उनले विश्वासको मत लिन सकेनन् भने संविधानको धारा १६८ (७) अनुसार प्रदेश सभा विघटन हुनेछ ।

प्रकाशित मिति: बिहीबार, असार ३, २०७८ २०:१३