चितवनमा बुबा बितेको भोलिपल्ट छोराको कोरोनाबाट मृत्यु

A+ A A-

चितवनको रत्ननगरमा बुवा बितेको भोलिपल्ट कोरोना संक्रमणबाट छोराको मृत्यु भएको छ । रत्ननगर नगरपालिका–३ शान्तिचोक घर भएका ७० वर्षीय बुबा र ३९ वर्षीय छोराको मृत्यु भएको हो ।

निमोनियाको लक्षण देखापरेपछि अस्पताल आएका छोराको पीसीआर परीक्षण गर्दा गत २१ वैशाखमा कोरोना संक्रमण पुष्टि भएको थियो । छाती दुख्ने, श्वासप्रश्वासमा समस्या देखापरेपछि २४ वैशाखमा चितवन मेडिकल कलेजमा भर्ना भएका थिए । उनको कोभिड सघन उपचार कक्षमा उपचारको क्रममा आज बिहान ३ बजे मृत्यु भएको अस्पतालले जानकारी दिएको छ ।

मृतक छोराका ७० वर्षीय बुवाको भने आइतबार बिहान पीसीआर परीक्षणका लागि अस्पताल पुगेपछि मृत्यु भएको थियो । गत शनिबारदेखि झाडापखालाले च्यापेपछि उनी आइतबार बिहान १० बजे नगरपालिकाको एम्बुलेन्समा परीक्षणका लागि गएका थिए ।

‘आइतबार बिहानै उहाँले शनिबारदेखि झाडापखाला लागेको छ भनेकाले हामीले नगरको एम्बुलेन्समा पीसीआरका लागि अस्पताल पुर्‍याएका थियौँ । अस्पताल गएको आधा घण्टामै पीसीआर गर्न नपाई बितेको खबर आयो,’ रत्ननगर नगरपालिका –३ का वडाअध्यक्ष गुप्तानाथ भट्टाराईले भने ।

मृतक छोराले गैँडाकोटस्थित कोकाकोला पेय पर्दाथको एक डिलरमा ‘सेल्स मेन’ को रूपमा काम गर्दथे । परिवारमा उनका एक छोरा र एक छोरी, श्रीमती र आमा छन् । परिवारका अन्य चार सदस्यको पीसीआरको परीक्षणका लागि स्वाब दिइएको र रिपोर्ट आउन बाँकी रहेको रत्ननगर नगरपालिका- ३ का वडासदस्य किशोरबाबु पुरीले जानकारी दिए । मृतक दुवै बाबुछोराको शव व्यवस्थापन सुरक्षाकर्मीको निर्देशनअनुसार गरिएको उनले बताए ।