माधव नेपालसहित ८ जनासँग स्पष्टीकरण सोध्ने एमालेको निर्णय

A+ A A-

नेकपा एमालले माधव कुमार नेपालसहित ८ जनासँग अन्तिमपटक स्पष्टीकरण सोध्ने भएको छ । सोमबार बसेको एमालेको महाधिवेशन आयोजक कमिटीको बैठकले माधव नेपालसहित ८ जना नेतासँग दुई दिनको समय दिएर स्पष्टीकरण सोध्ने निर्णय गरेको हो ।

'कर्णाली प्रदेशमा फ्लोर क्रस गरेर ह्वीपको उल्लंघ गर्ने चार जना प्रदेशसभा सदस्यसहित यसअघि स्पष्टीकरण सोधेरे चित्त बुझ्दो स्पष्टीकरण नदिएका र हाल निलम्बनमा परेका, कर्णाली प्रदेशमा त्यस्तो अवस्था आउनका लागि नेतृत्वदायी भूमिका निर्वाह गर्ने चार जना नेतालाई दुई दिनको समय राखेर स्पष्टीकरण सोध्ने निर्णय गरेको छ,' बैठकपछि पार्टी प्रवक्ता प्रदीप ज्ञवालीले बताए ।

उनका अनुसार पार्टीले यसअघि मागेको स्पष्टीकरणमा चित्तबुझ्दो जवाफ नदिने नेपालसहित भीम रावल, घनश्याम भुसाल र सुरेन्द्र पाण्डेका साथै कर्णालीमा फ्लोर क्रस गर्ने प्रदेशसभा सदस्यहरू प्रकाश ज्वाला, अमर थापा, कुर्मराज शाही र नन्दसिं बुढासँग स्पष्टीकरण सोध्ने निर्णय गरेको हो ।

साथै आजको बैठकमा अध्यक्ष केपी ओलीले राजनीतिक प्रतिवेदन पेस गरेका छन् । राजनीतिक प्रतिवेदनमा वर्तमान राजनीतिक परिस्थितिका साथै नेकपाको तीन वर्ष अवधिको समीक्षा गरिएको प्रवक्ता ज्ञवालीले बताए । 'पार्टी एकीकरण पहिलेदेखि नै भंग रहेको निष्कर्ष प्रतिवेदनले निकालेको छ । सरकारका तीन वर्षका कामको समीक्षा गरेको छ । धेरै प्रतिकूलताका बीच महत्वपूर्ण उपलब्धिहरू हासिल गरेको प्रतिवेदनको निष्कर्ष छ,' उनले भने ।

बैठकले आगमी कार्यभारका रूपमा तीनवटा कुरालाई ध्यान दिएको उनले बताए । पार्टी निर्माण, समृद्धिको अभियानलाई तीव्र बनाउन तीनै तहलाई सक्रिय बनाउने र कुनै पनि बेला निर्वाचन जानुपर्ने भएकाले त्यसका लागि तयार रहन नेता कार्यकर्तालाई निर्देशन दिने गरी तीनवटा विषयमा ध्यान केन्द्रित भएको उनको भनाइ छ । अध्यक्ष ओलीले पेस गरेको प्रतिवेदन सुझावसहित पारित भएको उनले बताए ।

त्यस्तै, बैठकले महासचिव ईश्वर पोखरेले प्रस्तुत गरेको संगठनात्मक प्रतिवदेनमा पनि छलपल गरेको छ । पोखरेलले प्रस्तुत गरेको प्रदितवेदनमा पार्टीलाई व्यवस्थित बनाउनका लागि ६ महिने कार्य योजना रहेको उनले बताए ।

जेठ मसान्तभित्र सबै प्रदेशदेखि पालिका तहसम्म पार्टीलाई पुनर्गठन गर्ने, असार मसान्तसम्म पार्टी सदस्यता नवीकरण गर्ने, भदौमा वडा, पालिका र जिल्ला अधिवेशन गर्ने, असोजमा प्रदेश अधवेशन र मंसिरमा पार्टी महधिवेशन गर्ने कार्यतालिका बनाएको प्रस्ताव पनि पारित गरेको उनले बताए ।

प्रकाशित मिति: सोमबार, वैशाख ६, २०७८ १८:२२