कोरोनाबाट थिलिँदै युवा, आईसीयूमा भर्ना हुनेको संख्या बढ्दो

A+ A A-

शुक्रराज ट्रपिकल तथा सरुवा रोग अस्पताल टेकुमा भर्ना भएका कोभिडका बिरामीमध्ये ५० प्रतिशत ५० वर्षमुनिका छन् । पहिलो छालमा ज्येष्ठ नागरिक र दीर्घरोगीले भरिएको अस्पताल दोस्रो छालमा आइपुग्दा युवा संक्रमितले भरिन थालेको छ । आईसीयूमा भर्ना भएका ४६ जनामध्ये आधा युवा छन् ।

‘कोरोना भाइरसको पहिलो छालमा ज्येष्ठ नागरिक र दीर्घरोगी जोखिममा थिए तर दोस्रो छालमा युवापुस्तामा पनि सिकिस्त निमोनिया भेटिएका छन्’, अस्पतालका प्रमुख कन्सल्टेन्ट डा. अनुप बाँस्तोला भन्छन्, ‘अघिल्लो तीन महिनाको तुलनामा संख्यात्मक हिसाबले पनि दोब्बर हो ।’

टेकु अस्पतालको कोरोना ग्राफ । डा. अनुप बाँस्तोलाको फेसबुकबाट ।

स्वास्थ्य तथा जनसंख्या मन्त्रालयको तथ्यांकअनुसार पनि युवा संक्रमितको संख्या बढिरहेको छ । २ वैशाखमा ५ सय ३४ जना संक्रमित भएकोमा २० देखि २९ वर्षका १ सय ७ जना र ३० देखि ३९ वर्ष उमेर समूहका १ सय १४ जना युवा संक्रमित भएका छन् ।

१ वैशाखमा ६ सय तीन जना संक्रमित हुँदा २ं० देखि २९ वर्ष उमेर समूहका १ सय ३८ र ३० देखि ३९ वर्ष उमेरका १ सय ४३ जना संक्रमित भएका छन् । त्यस्तै, ३१ चैतमा ५ सय १७ जना संक्रमित भएकोमा २० देखि २९ वर्ष उमेर समूहका १ सय १० जना र ३० देखि ३९ वर्ष उमेरका १ सय १९ जना संक्रमित युवा छन् ।

विद्यालयहरूमा पस्यो कोरोना, अभिभावकले बालबालिकालाई पठाउन छोडे

कारण के हो ?

टेकु अस्पतालका रिसर्च युनिटका प्रमुख डा. शेरबहादुर पुन युवा एक्टिभ हुने, जहाँ पनि पुग्ने र मलाई केही हुँदैन भन्ने सोचका कारण संक्रमण बढेको बताउँछन् । ‘पहिलो लहरमा पनि युवा संक्रमित भएका थिए । तर, भर्ना हुने दर कम थियो । अहिलेको लहरमा भर्ना हुने गति बढ्नु चासो र चिन्ताको विषय हो’, उनी भन्छन्, ‘अहिलेको भाइरसले युवालाई चपेटामा पारेको प्रारम्भिक संकेत हो ।’

इपिडिमियोलोजी तथा सरुवा रोग नियन्त्रण महाशाखाका निर्देशक डा. कृष्ण पौडेल जनसंख्याको हिसाबले पनि युवामा संक्रमण देखिएको हुन सक्ने बताउँछन् । ‘सबै क्षेत्र खुला छ । घरबाहिर र काममा जाने ४० वर्षभित्रका धेरै हुन्छन् । जनसंख्याको पनि धेरै यो उमेर समूहमा छन्’, उनी भन्छन् ।

पछिल्ला दिनमा नेपालमा यूके भरियन्ट र डब्बल म्युटेन्ट भएको भाइरस फैलिइरहेको छ । यो तीव्र गतिमा फैलिने र दुःख दिने खालको भएकाले युवालाई पनि असर गरेको विज्ञहरू बताउँछन् ।

‘नयाँ भेरियन्टको संक्रमण युवामा देखिएको छ । जटिल बिरामी भएकाले आईसीयू चाहिने भएको छ’, डा. निर्देशक पौडेल भन्छन्, ‘कोही विदेशबाट आएका, कोही यहीँका छन् । डब्बल म्युटेन्ट भेटिएकाको ट्राभल हिस्ट्री भेटिएको छैन । यूके भेरियन्टमा मिक्स छ । ट्रेस गरेर हेर्दै छौँ ।’

१५ प्रतिशत बालबालिका संक्रमित

जोगिन के गर्ने ?

खतराको घण्टी बजिसकेकाले हेलचेक्र्याइँ नगर्न डा. अनुप अनुरोध गर्छन् । ‘कोरोना भाइरसको पहिलो चपेटाबाट बाहिर निस्कनै लाग्दा दोस्रो छालको संघारमा आइपुगेका छौँ । जनघनत्व बढी भएका स्थानमा दोस्रो छाल टार्नै नसक्ने गरी फैलिन सक्ने खतराको घण्टी बजिसकेको छ । सुरक्षा मापदण्डको पालनामा हेलचेक्र्याइँ फिटिक्कै गर्नु हुँदैन’, उनको सुझाव छ ।

अझै व्यवस्थित र योजनावद्ध तरिकाले तयारी गर्नुपर्नेमा उनको जोड छ । ‘भीडभाड रोकौँ । बच्चाहरूलाई घरमै सुरक्षित राखौँ र स्वास्थ्यको मापदण्ड पूर्ण पालना गरौँ’, उनी भन्छन् ।

अब युवालाई पनि खोपको व्यवस्था गर्ने योजना सरकारको रहेको निर्देशक पौडेल बताउँछन् । ‘अर्को चरणमा युवालाई पनि खोप लगाउनुपर्छ । खोपभन्दा पहिले जनस्वास्थ्यको मापदण्डलाई कडाइका साथ पालना गर्नुपर्छ’, उनी भन्छन् ।

याे पनि‍‍‍‍‍‍‍‍‍‍‍‍

नेपालमा देखियो यूके भेरियन्ट, कति घातक ?

नयाँ अवतारमा कोरोना, ‘अब हामीले पनि बानी बदल्नुपर्छ’

के हो कोरोना ‘डब्बल म्युटेन्ट’ ? नेपालमा पनि नयाँ भाइरस घुमिरहेको हो ?

के हो कोरोना जिन सिक्वेन्सिङ ? किन गरिन्छ ?

प्रकाशित मिति: शुक्रबार, वैशाख ३, २०७८ १५:०९