बृहत् नागरिक आन्दोलन भन्यो : नित्य खबरदारी गरिरहने छौँ

A+ A A-

बृहत् नागरिक आन्दोलनले राजनीतिलाई जनताको पकडमा ल्याउन नित्य खबरदारी गरिरहने जनाएको छ । प्रतिनिधिसभा पुनर्स्थापना गर्ने सर्वोच्च अदालतको फैसालापछि मंगलबार साँझ विज्ञप्ति जारी गर्दै नागरिक आन्दोलनले विभिन्न नागरिक तथा सामाजिक समूहहरूसँग संवाद गर्दै खबरदारी गरिरहने जनाएको हो ।

संसद् विघटन बदरले प्रधानमन्त्री केपी शर्मा ओलीको सर्वसत्तावादी यात्रामा रोक लगाएको उल्लेख गर्दै अब अग्रगामी राजनीति सुनिश्चित गर्न संविधानमा रहेका असन्तुष्टि सम्बोधन गर्नुपर्ने पनि सुझाएको छ ।

सामाजिक न्यायसहितको लोकतन्त्रलाई नागरिकले जीवन्त रूपमा महसूस गर्न सकिने अवस्था बनाउन र असन्तुष्ट समुदायले अपनत्व बोध गर्न सक्ने गरी संविधानलाई अध्यावधिक गर्न नागरिक आन्दोलन निरन्तर संघर्षरत् रहने पनि विज्ञप्तिमा जनाइएको छ ।

बृहत् नागरिक आन्दोलनको विज्ञप्ति :

बृहत् नागरिक आन्दोलन

२०७७ फागुन ११

२०७७ पुष ५ गतेको असंवैधानिक संसद् विघटनलाई सर्वोच्च अदालतले आज बदर गरी प्रधानमन्त्री केपी शर्मा ओलीको सर्वसत्तावादी यात्रामा रोक लगाएको छ । यस फैसलाले संवैधानिक प्रक्रिया सुचारु गर्न राजनीतिक दलहरूलाई वैधानिक बाटो दिएको छ ।

संसद विघटन त्यसअघिदेखि नै सुरु भएका असंवैधानिक अभ्यास र प्रतिगामी कदमहरुको प्रकट रुप मात्र थियो । विघटनसम्म पुग्नका लागि राजनीतिक प्रक्रियामा निहित जड कारणहरुको आत्मसमीक्षा गर्दै अब राजनीतिक दलहरूले अग्रगामी राजनीति सुनिश्चित गर्न संविधानमा पहिल्यैदेखि रहेका असन्तुष्टि सम्बोधन गर्नुपर्छ ।

हाम्रो संघीय लोकतान्त्रिक गणतन्त्रले नागरिक सर्वोच्चता कायम गर्न सकिरहेको थिएन । यसका लागि बृहत् नागरिक आन्दोलनले यही फागुन ७ गते जारी गरेको घोषणापत्र मार्फत राजनीतिक प्रक्रियामा जनताको स्वामित्व कायम गर्न दबाब जारी राख्ने संकल्प गरेको थियो । सामाजिक न्यायसहितको लोकतन्त्रलाई आमनागरिकले जीवन्त रुपमा महसूस गर्न सकिने अवस्था निर्माण गर्न तथा तमाम असन्तुष्ट समुदायहरूले अपनत्व बोध गर्न सक्ने गरी संविधानलाई अध्यावधिक गर्न बृहत् नागरिक आन्दोलन निरन्तर संघर्षरत् रहनेछ ।

बृहत् नागरिक आन्दोलनले राजनीतिलाई जनताको पकडमा ल्याउन विभिन्न नागरिक तथा सामाजिक समूहहरूसँग संवाद गर्दै नित्य खबरदारी गरिरहनेछ ।

बृहत् नागरिक आन्दोलनको तर्फबाट

प्रकाशित मिति: मंगलबार, फागुन ११, २०७७ २०:५४