पहिलो पटक स्थायी राजधानीमा प्रदेश स्थापना दिवस मनाउने लुम्बिनी प्रदेश सरकारको तयारी

पहिलो पटक स्थायी राजधानीमा प्रदेश स्थापना दिवस मनाउने लुम्बिनी प्रदेश सरकारको तयारी

A+ A A-

लुम्बिनी प्रदेश सरकारले प्रदेश स्थापनाको तेस्रो बर्ष यस पटक स्थायी राजधानी दाङ देउखुरीमा मनाउने भएको छ ।

स्थायी राजधानीको टुंगो २० असोज २०७७ मा लागेसंगै प्रदेश सरकारले स्थायी राजधानी देउखुरी केन्द्रित कार्यक्रम गर्न थालेको छ । प्रदेश पूर्वधार विकास प्राधिकरणको कार्यालय स्थापना गरिसकिएको देउखुरीमा मुख्यमन्त्रीकै प्रस्तावमा फागुन २ देखि ४ सम्म प्रदेश स्थापना दिवस मनाउन लागिएको हो ।

स्थापना दिवस व्यवस्थापन समितिका अध्यक्षसमेत रहेका आन्तारिक मामिला तथा कानूनमन्त्री कुल प्रसाद केसीको अध्यक्षतामा बसेको बैठकले फागुन २, ३ र ४ गते देउखुरीमा कार्यक्रम गर्ने निर्णय गरेको हो ।

मुख्यमन्त्री शंकर पोखरेलको प्रमुख आतिथ्यतामा सम्पन्न हुने स्थापना दिवसलाई भव्य बनाउन प्रदेशका १२ वटै जिल्लाहरुको सहभागिता हुने गरी तयारी गरिएको आन्तारिक मामिला तथा कानुनमन्त्री केसीले जानाकारी दिए ।

तीन दिनसम्म चल्ने कार्यक्रममा सरसफाईदेखि सम्मानसम्मका कार्यक्रमहरु हुने तय भएको छ । भौतिक पूर्वधार विकासमन्त्री बैजनाथ चौधरीले पहिलो पटक स्थायी राजधानी घोषणा गरिएको दाङ देउखुरीमा स्थापना दिवस मनाउन लागिएको भन्दै दिवस सफल पार्न आह्वान गरे ।

स्थापना दिवसको अवसरमा फागुन २ गते स्थानीय तहमा सरसफाईसंग सम्बन्धित कार्यक्रम, ३ गते विशेष समारोहका साथै विभिन्न व्यक्तिलाई पदक प्रदान एवं ४ गते प्रदेशका विभिन्न स्थानमा वातावरण संरक्षणमूलक कार्यक्रमको आयोजनासहित दीपावली गरिने कार्यक्रम तय गरिएको छ ।

प्रकाशित मिति: सोमबार, माघ २६, २०७७ ०९:४५