संसद्‌लाई बन्धक बनाउँदै अध्यादेशबाट देश नचलाऊ : कांग्रेस

A+ A A-

प्रमुख प्रतिपक्षी दल नेपाली कांग्रेसले संसद्‌लाई बन्धक बनाएर अध्यादेशबाट देश नचलाउन सरकारलाई चेतावनी दिएको छ । शुक्रबार बसेको पार्टी संसदीय दलले संसद्‌लाई बन्धक बनाएर अध्यादेशबाट देश नचलाउन सरकारलाई भनेको हो ।

कांग्रेसले संवैधानिक परिषद्सम्बन्धी अध्यादेश तत्काल फिर्ता गर्दै अधिवेशन तुरुन्तै बोलाउन सरकासँग माग गर्ने निर्णय गरेको कांग्रेसका प्रमुख सचेतक बालकृष्ण खाँडले बताए । ‘आजको बैठकले संविधानको मर्मविपरीत जारी भएको अध्यादेश फिर्ता लिँदै र तत्काल संसद् अधिवेशन बोलाउन सरकारसँग माग गर्ने निर्णय गरेको छ,’ खाँडले शिलापत्रसँग भने ।

कांग्रेसले उखु किसानको भुक्तानीसमेत तत्काल दिलाउन सरकारसँग माग गरेको छ । किसानको आन्दोलनप्रति कांग्रेसले ऐक्यबद्धता जनाउँदै आगामी संसद बैठकमा त्यसबारे सशक्त रूपमा आवाज उठाउने र सडकमा समेत किसानलाई साथ दिने निर्णय भएको खाँडले बताए ।

बैठकमा संसदीय दलका नेता शेरबहादुर देउवाले सरकारले लोकतान्त्रिक मूल्य मान्यताविरुद्ध काम गर्न थालेकाले आगामी संसद् बैठकमा सशक्त रूपमा प्रस्तुत हुनुपर्ने र त्यो बैठक निर्णायक हुने बताएको खाँडले बताए ।

‘सरकार लोकतान्त्रिक मूल्य मान्यतालाई कुल्चिएर सर्वसत्तावादी बनेको छ आगामी संसद बैठकमा सरकारविरुद्ध सशक्त रुपमा आवाज उठाउनुपर्छ ती बैठक निर्णायक हुनेछन्,’ दलका नेता देउवाको भनाई उद्धृत् गर्दै खाँडले भने ।