नेकपा प्रवक्ता भन्छन् : विभाजनबाट अहिलेको विवादको निकास खोज्दैनौँ

A+ A A-

नेकपाका बहुमत सचिवालय सदस्यहरूको धुम्बाराहीमा भएको छलफलले प्रधानमन्त्री केपी शर्मा ओलीको सहमति लिएर पर्सि बिहीबार सचिवालयको औपचारिक बैठक बोलाउने प्रस्ताव गरेकाे छ ।

धुम्बाराहीमा बैठक बस्नुअघि प्रचण्डले बालुवाटार पुगेर प्रधानमन्त्री ओलीलाई भेटेर पर्सी बैठक बोलाउन सहमति मागेका थिए । तर, ओलीले दुई अध्यक्षबीच सहमति नभई बैठक बस्नु उपयुक्त नहुने भन्ने जवाफ दिएको प्रचण्डले धुम्बाराहीमा ब्रिफिङ गरेका छन् । पार्टी प्रवक्ता नारायणकाजी श्रेष्ठले प्रधानमन्त्री ओली बुधबार उपत्यकाबाहिरको कार्यक्रममा सहभागी हुने भएकाले बिहीबारका लागि बैठक प्रस्ताव गरिएको जनाए ।

‘आज अनौपचारिक बैठक बस्यौँ,’ उनले भने, ‘अध्यक्ष ओलीलाई सहमतिमा बैठक बोलाउन शनिबार लिखित आग्रह गरेकाले हिजोसम्म बैठक बस्ला भन्ने अपेक्षा थियो । तर, सहमति दिनुभएको छैन । कार्यकारी अध्यक्षले भेटेरै गम्भीरता पूर्वक छलफल गर्नुभयो । बैठक बस्न ढिलो गर्न हुन्न भन्नुभएको छ ।’

ओलीको सहमतिमै बिहीबार बैठक बस्नेमा आशावादी रहेको श्रेष्ठले बताए । सहमतिमा नआए के गर्ने भन्ने पत्रकारहरूको प्रश्नमा उनले भने, ‘सहमतिका आधारमा बैठक बस्नेमा हामी आशावादी छौँ । बसेन भने के गर्ने अहिले सोच्न सक्दैनौँ ।’

पार्टी संकटको विशिष्ट परिस्थितीमा एकताप्रति गम्भीर भएरै सहमतिमा बस्न पर्यत्न गरिएको उल्लेख गर्दै उनले यसलाई कमजोरी नठान्न आग्रह गरे । सचिवालयको बैठकका लागि लिखित रूपमै एजेण्डाहरू अध्यक्ष ओलीलाई शनिबारै बुझाइसकिएको प्रवक्ता श्रेष्ठले बताए ।

स्थायी कमिटी बैठकका निर्णय कार्यान्वयन, पार्टीलाई विधि र सहमतिमा संचालन, कर्णाली प्रदेशमा उत्पन्न समस्या, पर्सा हत्याकाण्ड र प्रधानमन्त्री ओलीको भारतीय खुफिया एजेन्सी 'रअ'का प्रमुखसँग भएको भेटलाई प्रचण्ड नेपाल समूहले बैठकको एजेण्डाका रूपमा अघि सारेको छ ।

नेकपा विभाजन हुन लागेको हो भन्ने अर्को प्रश्नमा प्रवक्ता श्रेष्ठले भने, ‘विभाजनबाट अहिलेको विवादको निकास खोज्दैनौँ । धेरै मेहनत गरेर पार्टी एकता गरेका हौँ । विभाजनमा धकल्नु र पार्टीलाई असफल पार्नु देशी-विदेशी प्रतिक्रियावादीको सेवा गर्नु हुन्छ ।’

अपरान्ह ४ बजेलाई बोलाइएको बैठकमा प्रचण्डसहित सचिवालयका सदस्यहरू माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठ सहभागी थिए । प्रचण्डले बोलाएको बैठकमा गृहमन्त्री रामबहादुर थापासहित प्रधानमन्त्री ओलीनिकट नेताहरू भने सहभागि थिएनन् ।