सल्लाहकारको गम्भीर त्रुटिको जवाफदेही को ?

A+ A A-

सही सल्लाह र सोही कार्यको लागि बाहिरी अध्ययनसमेत गरेर परामर्श दिनको लागि सल्लाहकारको आवश्‍यकता पर्ने गर्दछ । महिना-महिनामा तलबभत्ता बुझ्ने र सुविधा लिन मात्रै होइन । तर, सल्लाहकार नै गैरजिम्मेवार बन्दै गएर अख्तियारको दुरुपयोग गरे जवाफदेही को हुने ?

राष्ट्रपति, प्रधानमन्त्री वा अन्य उच्च तहका व्यक्तित्वको सचिवालयमा बस्ने अधिकारीले गर्ने क्रियाकलापले सो पदको गरिमालाई कति कायम गर्नुपर्छ भनेरसमेत हेर्नुपर्ने हुन्छ । तर यहाँ उच्च पदमा रहेका व्यक्तित्वका सचिवालयमा बस्ने तथा सरसल्लहाकार दिने जिम्मेवारी पाएका व्यक्तिहरूबाट त्यस्ता व्यक्तिहरूको आधिकारिक सामाजिक सञ्जालको दुरुपयोग पटकपटक हुने गरेको छ ।

मंगलबार यस्तै घटना दोहोरिएको छ । प्रधानमन्त्री केपी शर्मा ओलीको ट्वीटर हेण्डलबाट प्रेस सल्लाहकार सूर्य थापा र पत्रकार मात्रिका पौडेलको फोटोसहित पौडेललाई नयाँ यात्राको शुभकामना दिइएको छ । यो ट्वीट स्वयं प्रधानमन्त्री ओलीका प्रेस सल्लाहकार सूर्यले गरेको खुलेको छ । उनले भनेका छन्, 'झुक्केर यस्तो गल्ती भएको हो ।'

प्रधानमन्त्रीको सचिवालयमा बसेर कस्ता टिप्पणी र कस्तो व्यवहार गर्ने भन्ने कुरा पनि रहलान् तर झुक्किनु पनि एक पटक हुन्छ पटक होइन । प्रधानमन्त्री, राष्ट्रपति वा अन्य कुनै उच्च तहका व्यक्तिको सामाजिक सञ्जालको दुरुपयोग गर्नेले आफ्नै कमजोरी ढाक छोप गर्न ट्वीटर ह्याक भएकोसम्मका सूचना सम्प्रेषण गर्ने गरेका छन् ।

यसअघि गत पुस महिनामा प्रधानमन्त्री ओलीको ट्वीटर ह्यान्डलबाट भारतीय कांग्रेस आइकी नेतृ सोनिया गान्धीले नागरिकता कानुनविरुद्ध बोलेको भिडिओ रि-ट्वीट भएको गरिएको थियो । जसलाई भारतीय मिडियाले चासोपूर्वक उठाइरहँदा प्रधानमन्त्रीको सचिवालयले भने अन्यथा रि-ट्वीट भएको देखिन आएको छ, यस विषयमा छानबिन गरिनेछ भनेर पन्छिएको थियो । यसले सचिवालयबाट नभई बाहिरबाट दुरुपयोग भएको सन्देश दिन खोजे पनि कमजोरी सचिवालयकै थियो । यस्ता गम्भीर कमजोरी भइसकेपछि पनि प्रधानमन्त्रीको ट्वीटर हेण्डल प्रयोगमा हेलचक्य्राइँ गर्ने कार्य रोकिएको छैन ।

प्रधानमन्त्री कार्यालयमा मात्रै होइन राष्ट्रपति कार्यालयमा पनि कमजोरी गर्ने र ह्याक भएको भन्दै हेण्डल नै परिवर्तन भएको जानकारी गराउने काम गरिएको छ । राष्ट्रपतिको ट्वीटर हेण्डलबाट नेकपानिकट मानिने एक समाचार पोट्रलले लेखेको नेकपाको गुटगत समाचार रि-ट्वीट गरिएको थियो । पछि ट्विटर हेण्डल नै डिलिट गरियो । राष्ट्रपतिको सल्लाहकारको जिम्मेवारीमा बसेर सरकारको बचाउका समाचार रि-ट्वीट गर्ने कामहरू पनि गरिएका छन् ।

प्रविधि र कूटनीति दुवैमा चासो राख्ने पूर्वप्रधानमन्त्री बाबुराम भट्टराईले पनि ३ वर्षअघि भारत र वेष्टइन्डिज बीचको खेलमा गेलआट सक्किगो नी ! भन्ने ट्वीटको निकै आलोचना भएको थियो । खेलको मजाक गर्नु ठीक होला तर जिम्मेवारीका हिसाबले एक पक्षीय देखिनुले कूटनीतिमासमेत फरक पार्ने गर्छ ।

पदमा पुगेका मानिसले आफैँ दिने प्रतिक्रिया वा सचिवालयमार्फत सामाजिक सञ्जालमा गरिएको हेलचक्य्राइँको प्रभाव समाजमा पर्नेगर्छ । तर त्यसको जवाफदेहिता को बन्ने ? आफैँ गल्ती गर्ने र ह्याक भयो भनेर अफवाहसमेत फेलाउने गरिएको सन्दर्भमा कमजोरी ढाक्नेतर्फ नभई कमजोरी हुन नदिन ध्यान पुर्‍याउन आवश्‍यक होला !

प्रकाशित मिति: मंगलबार, कात्तिक २५, २०७७ २१:२५