प्रचण्डले ओलीलाई भने, ‘तपाईको राजीनामा कसैले मागेको छैन’

A+ A A-

प्रधानमन्त्री एवं नेकपा अध्यक्ष केपी शर्मा ओलीले बुधबार प्रदेश १ का आफूनिकट नेताकार्यकर्तासंग भर्चुअल बैठकप्रति कार्यकारी अध्यक्ष पुष्पकमल दाहाल प्रचण्डले आपत्ति जनाएका छन् ।

ओलीसंग बिहिबार बालुवाटारमा भएको भेटमा उनले गुटगत भेलामा ‘जनताको बहुदलिय जनवादको पक्षमा माहोल बनाउन’ दिएको निर्देशनप्रति आपत्ति जनाएका हुन् । प्रचण्डको सचिवालयका अनुसार उनले ओलीलाई ‘हिजोको भेलामा जबजको पक्षमा माहोल बनाउन भन्नुभएछ । यो घोर आपत्तिजनक र पार्टी एकताबिरोधी छ’ भनेका छन् ।

प्रधानमन्त्री ओलीले राजीनामा दिन्न भनेर दिएको अभिव्यक्तिप्रति पनि प्रचण्डले असन्तुष्टि व्यक्त गरेका छन् । ‘तपाईको राजीनामा कसैले मागेको छैन । किन यस्तो भन्दै हिड्नुहुन्छ ?’ प्रचण्डले भनेका थिए ।

ओलीले आफूलाई घेराबन्दी गरिएकोभन्दै पार्टी एकता जोगाउन आफूलाई सहयोग गर्न आग्रह गरेको बालुवाटार स्रोतले बतायो ।

प्रचण्डको जोड पार्टी बैठक बसेर उत्पन्न समस्या समाधान गरौ भन्ने थियो । प्रधानमन्त्री ओलीले भने दुई अध्यक्षको सहमति बेगर बस्ने बैठकको औचित्य नभएको जवाफ फर्काएका थिए ।

ओली–प्रचण्ड भेट शनिवारको जस्तो तनाबपूर्ण नभए पनि त्यसले कुनै सकारात्मक नतिजा भने दिएन । दुबै नेताले आआफ्नो अडान नछाडेपछि ४५ मिनेट लामो छलफल विना निष्कर्ष टुंगिएको थियो ।

बालुवाटारबाट निस्केर प्रचण्ड सिधै सभामुख अग्निप्रसाद सापकोटालाई भेट्न उनको लैनचौरस्थित निबास पुगेका थिए ।

प्रकाशित मिति: बिहीबार, कात्तिक २०, २०७७ १६:५८