सक्नेले काम गरौँ, नसक्नेलाई महानगरले व्यवस्थापन गर्छ : मेयर शाक्य

A+ A A-

काठमाडौं महानगरपालिकाले खुलामञ्चमा निःशुल्क खाना खुवाउने अभियानलाई तत्काल व्यवस्थित बनाउन आग्रह गरेको छ ।

कोरोना महामारीको जोखिम बढ्दै जाँदा स्वास्थ्य सुरक्षाका मापदण्डसमेत पूरा नगरी खुलामञ्चमा निःशुल्क खाना खुवाउने अभियान जारी रहेको भन्दै व्यवस्थित गर्न महानगरले आग्रह गरेको हो ।

मेयर विद्यासुन्दर शाक्यले बढी भीडभाड हुने र सार्वजनिक स्थलमा असुरक्षित ढंगले भइरहेको खाना खुवाउने कामलाई व्यवस्थित गर्न र विकल्प खोज्न आग्रह गरे । उनले सरकार जनताप्रति उत्तरदायी रहेको उल्लेख गर्दै स्वास्थ्य जोखिमको समेत ख्याल गरी खाना खुवाउन आग्रह गरे ।

श्रम गर्न सक्नेहरूले श्रम गरेर र नसक्नेहरूको व्यवस्थापन गर्न महानगरले सहयोग गर्ने मेयर शाक्यले बताए । महानगरपालिकाले सुरुदेखि नै काम गर्न सक्नेहरूलाई काम दिएको उल्लेख गर्दै उनले नसक्नेहरूको हकमा व्यवस्थापनका लागि महानगरपालिकाले सहयोग गर्ने बताए । उनले भने, ‘काम नगरी खाने प्रवृति भयो भने भोलि श्रम गरेर खानभन्दा पनि उनीहरूले गर्दैनन्, बानी बिग्रिन्छ । त्यसैले सक्नेले काम गर भन्ने महानगरको धारणा हो । नसक्नेलाई व्यवस्थापन गर्छौँ ।’

एकै ठाउँमा भीडभाड गरेर खाना खुवाउनुभन्दा जो जुन ठाउँमा छ त्यही ठाउँमा खुवाउने व्यवस्था गर्नुपर्नेमा मेयर शाक्यको जोड छ । महानगरपालिकाले व्यवस्थापनका लागि पार्टी प्यालेस भाडामा लिएर अभियन्तालाई दिनसक्ने उनले बताए ।

लकडाउन अविधिभर महानगरपालिकाले ३२ वटै वडामार्फत ‘भोकै कोही पर्दैन, भोकले कोही मर्दैन’ भन्ने नाराका साथ खाना नपाउने, बेरोजगार, अशक्त र असहायलाई राहत वितरण र खाना खुवाउने कार्य गरेको महानगरले जनाएको छ । लकडाउन अवधिमा १ लाख ५० हजार बढी परिवारलाई राहत वितरण र २ लाख ५० हजार बढीलाई खाना खुवाउने काम गरेको मेयर शाक्यले बताए ।

श्रम गर्न सक्नेहरूलाई वडा कार्यालयबाट सार्वजनिक पूर्वाधार विकास, सार्वजनिक पूर्वाधार मर्मत सम्भार, ढल निकाल तथा फुटपाथ व्यवस्थापन, सम्पदा संरक्षण जस्ता काममा लगाउने गरेको महानगरले जनाएको छ ।

प्रकाशित मिति: बुधबार, कात्तिक १९, २०७७ १४:५७