मकवानपुरका संक्रमितका २ छोरी र श्रीमतीको पीसीआर नेगेटिभ

A+ A A-

मकवानपुरको उत्तरी क्षेत्र थाहा नगरपालिकास्थित टिस्टुङका कोरोना संक्रमित २८ वर्षीय युवकका २ छोरी र श्रीमतीको पीसीआर रिपोर्ट नेगेटिभ आएको छ ।

६ जेठमा काठमाडौंमा भएको परीक्षणमा थाहा नगरपालिका–११, टिस्टुङ देउराली घर भएका सवारी चालक पेसामा संलग्न युवकलाई कोरोना संक्रमणको पुष्टि भएको थियो । युवकमा कोरोना संक्रमण देखिएपछि उनका २ छोरी र श्रीमतीलाई नगरपालिकाले पीसीआर परीक्षणका लागि हेटौंडा पठाएको थियो ।

हेटौंडास्थित किटजन्य रोग अनुसन्धान तथा तालिम केन्द्रमा रहेको कोरोना परीक्षण प्रयोगशालामा संक्रमित परिवारका सदस्यहरूको पीसीआरबाट स्वाब परीक्षण गर्दा रिपोर्ट नगेटिभ आएको सामाजिक विकास मन्त्रालयले जानकारी दिएको छ । संक्रमित युवा काठमाडौंमै रहेका छन् ।

उनी वैशाख २७ गते थाहा नगरपालिकाको टिस्टुङबाट काठमाडौं गएका थिए । तरकारी गाडीमा काठमाडौं गएका उनी वाफलस्थित डेरामा बस्दै आएका थिए । थाहा नगरपालिकाले लकडाउनमा उनी कहाँ–कहाँ गएका थिए र उनको सम्पर्कमा आएका व्यक्तिहरूको कन्ट्याक्ट ट्रेसिङबाट खोजी गरिरहेको छ ।

मकवानपुरमा २८ वर्षीय युवकसहित हालसम्म २ जनामा कोरोना संक्रमण देखिएको छ । दुवै जना थाहा नगरपालिकाका हुन् । यसअघि थाहाकै ७ वर्षीय बालकमा पनि कोरोना पोजेटिभ देखिएको थियो । सतुङ्गलस्थित डेरामा बस्ने उनी थाहास्थित घरबाट तरकारी गाडीमा चढेर काठमाडौं गएका थिए । हाल उनी सशस्त्र प्रहरीको आइसोलेसनमा छन् ।