घरमा सुत्केरी श्रीमती, राहतका लागि श्रीमान् वडा कार्यालयमा धर्नामा

A+ A A-

पोखरा महानगरपालिका–९, बसपार्कसँगै जोडिएको छ कृष्ण टोल । अधिकांश सुकुम्बासी परिवार बस्ने सो टोलमा कोरोनाबाट प्रभावित दैनिक ज्यालादारीमा काम गर्ने मजदुर र विपन्नलाई राहतका लागि १९४ परिवारको नाम टोल विकास संस्थाले सङ्कलन गरेर वडामा पठायो तर राहत आयो ५४ परिवारलाई मात्र । केहीको नागरिकता नभएको तथा कोहीलाई कागजपत्र पूरा नभएको भन्दै वडाले नाम फिर्ता पठायो ।

दैनिक ज्यालादारीमा काम गरेर साँझ बिहानको छाक टार्ने सो बस्तीका अधिकांशले राहत पाउन नसकेपछि उनीहरूले पटक/पटक वडाको ध्यानाकर्षण गराए । वडाबाट राहत पाउने आश्वासन दिइए पनि महिना दिन बित्दासमेत राहत नआएपछि उनीहरूले आइतबार वडा कार्यालयमा धर्ना दिए ।

सोही धर्नामा थिए ३९ वर्षीय वीरबहादुर विश्वकर्मा । दैनिक ज्यालादारीबाट कमाएको पैसाले परिवार पाल्दै आएका विश्वकर्माको लकडाउनपछि आम्दानी छैन । ५ जनाको परिवारमा २ महिनाकी सुत्केरी श्रीमती घरमा छिन् । सुत्केरी अवस्थामा आमा र बच्चाका लागि पोषिलो खानेकुरा त परै जाओस्, साँझ बिहान २ छाक खाने अन्नसमेत छैन ।

लकडाउनको १ महिना छिमेकीसँग पैँचो मागेर भए पनि सुत्केरी श्रीमती र ३ बालबच्चाको पेट भरेका उनको घरमा अहिले पकाउने केही पनि छैन । घरमा चुलो बाल्ने उपाय नभएपछि शनिबार पौरखी समूहले व्यवस्था गरेको ५ प्याकेट खाना सबैले बाँडेर छाक टारे । साँझ माइली भाउजूले दिएको चामल र छिमेकी दिदी पर्नेले दिएको दालले शनिबार साँझ र आइतबार बिहानको चुलो बलेको तर अब कसरी परिवार पाल्ने भन्ने चिन्ताले अन्य टोलवासीसहित वडामा राहतका लागि धर्नामा आएको उनले बताए ।

‘घरमा सुत्केरी श्रीमती छन्, कति दिन अरुसँग चामल र दाल मागेर परिवार पाल्ने ? अहिले सबैको अवस्था मेरोजस्तै हो नि । सरकारले कि हामीलाई काम गर्न जान दिनुपर्‍यो, नत्र परिवार पाल्न राहत चाहियो,’ विश्वकर्माको भने । नागरिकता नभएकाले नै आफूलाई राहत पाउनबाट वञ्चित गरिएको हुन सक्ने उनको अनुमान छ । वर्षौंदेखि मुस्ताङबाट आएर यहीँ बसोबास गरेको बताउँदै उनले एक पटक बनाएको नागरिकता हराएपछि पुनः अर्को नबनाएको बताए ।

राहत माग्दै कृष्ण टोल, पार्वती टोल र शान्तिनगर टोलका २ सय हाराहारीका उनीहरूले वडा कार्यालयमा मध्याह्नदेखि धर्ना दिएका थिए । प्रभावित परिवारको भीडभाड बढेपछि सुरक्षाकर्मी परिचालन गरिएको थियो ।

सुरक्षाकर्मी र वडाका कर्मचारीको पहलमा उनीहरूको नाम सङ्कलन गरिएको थियो । टोल विकास संस्थाका उपाध्यक्षसमेत रहेका कान्छा लामाले टोल विकास संस्थाबाट १९४ कै नामावली वडामा पेस गरिएकाेमा चैत २७ गते ५४ परिवारलाई राहत वितरण गरिएकाेमा अन्य परिवारले राहत नपाएको बताए ।

वडाध्यक्ष र सचिवलाई ५ दिनअघि वडामा आएर राहतका लागि आग्रह गर्दा २ दिन पर्खिन भने पनि केही सहयोग नपाएपछि टोलवासी वडामा धर्नाका लागि आएको तर वडाध्यक्ष सम्पर्कमा नआएको उनले बताए । ‘वडाले पक्षपात गरेको छ , एउटै वडामा भए पनि कोहीलाई राति/राति घरमा राहत पुर्‍याउने, हामीले चाहिँ सरकारको राहत कस्तो हुन्छ, कहिल्यै देख्न पनि नपाउने,’ लामाले आक्रोश व्यक्त गरे ।

वडाध्यक्ष रामराज लामिछानेले राहतका लागि प्राप्त १ हजार ९ सय ४५ आवेदनमध्येबाट पहिलो चरणमा ६ सय ८८ परिवारलाई राहत वितरण गरिएको बताउँदै पाउनुपर्ने वास्तविक रूपमा प्रभावित कोही छुटेको भएमा दोस्रो चरणमा दिइने बताए ।

एउटै व्यक्तिले पटकपटक राहत लिने प्रवृत्ति रहेको भन्दै उनले दोस्रो चरणको राहत वितरण गर्नुअघि पहिलो चरणमा राहत पाएका सबैको नामावली मागिने र छुटेकालाई वितरण गरिने जानकारी दिए ।

‘राहत वितरणलाई प्रभावकारी बनाउन वडासदस्यको नेतृत्वमा सबै टोल विकास संस्थाका अध्यक्षसहितको वितरण समितिमार्फत राहत दिएका हौँ । छुटेकालाई केही दाता खोजेर पनि छुट्टै दिएका छौँ,’ वडाध्यक्ष लामिछानेले भने । रासस

प्रकाशित मिति: सोमबार, वैशाख १५, २०७७ ०९:५९