रौतहटमा घरघरमै सामान पुर्‍याउने व्यवस्था

A+ A A-

रौतहटको बजारक्षेत्रका घरघरमा दैनिक उपभोग्य सामग्री पुर्‍याउने व्यवस्था मिलाइएको छ । ‘लकडाउन’लाई प्रभावकारी बनाउन रौतहट प्रशासनले खाद्यान्न पसलसमेत बन्द गराएपछि गौरमा ‘होम डेलिभरी’ अर्थात् घरमै सामान पुर्‍याउने व्यवस्था मिलाइएको हो ।

जिल्ला सुरक्षा समिति रौतहटले सोमबारबाट ‘लकडाउन’ थप कडा पारिएको छ । उद्योग वाणिज्य संघ गौरको पहलमा सर्वसाधारणलाई ‘होम डेलिभरी’को व्यवस्था मिलाइएको संघका अध्यक्ष पण्डित जयसवालले जानकारी दिए । कोभिड–१९ को जोखिम कम गर्न ‘होम डेलिभरी’ सेवा सुरु गरेको उनले बताए ।

गौर नगरपालिका क्षेत्रभित्र खाद्यान्न पुर्‍याएबापत बिलअनुसार भुक्तानी गर्नसमेत उनले सर्वसाधारणसँग आग्रह गरे । खाद्यान्न आवश्यक पर्ने उपभोक्ताका लागि पसलको नाम र मोबाइल नम्बर सार्वजनिक गरिएको संघका अध्यक्ष्य जयसवालले बताए ।

कोभिड–१९ को जोखिम नियन्त्रणका लागि स्थानीय प्रशासनले १६ चैतदेखि अर्को आदेश नभएसम्मका लागि ‘सटडाउन’ गरेको छ । जसका कारण अन्य दिनजस्तै बिहान र बेलुका हुने मानिसको भीड बन्द भएको छ । खाद्यान्न पसल सञ्चालन गर्न दिँदा बजारमा स्थानीयको भिड बढ्न थालेपछि प्रशासनले ‘सटडाउन’ गरेको हो ।

अत्यावश्यक औषधि खरिदका लागि भने रोक नलगाएको प्रशासनले जनाएको छ । सदरमुकाम गौर र चन्द्रपुरमा अत्यावश्यक खाद्यान्न ‘लकडाउन’को समयमा व्यापारीले घरमा नै पुर्‍याउने व्यवस्था गरिएको छ । विनाकाम सडकमा हिँडिरहेकालाई सडकमै उठबस गराउने, पुसअप गराउने, घाममा उभ्याउनेजस्ता सजाय सुरक्षाकर्मीले दिन थालेका छन् ।

गौर तथा चन्द्रपुर बजारमा सामान घरघरमा पुर्‍याउनका लागि व्यापारीसँग समन्वय गरिएको छ । गौर बजार क्षेत्रमा १८ वटा किराना पसल र चन्द्रपुरमा ३५ वटा किराना पसललाई अनुमति दिने निर्णय भएको हो ।

इलाका प्रशासन कार्यालय चन्द्रनिगाहपुरमा उपसचिव चेतराज बरालको संयोजकत्वमा बसेको बैठकले चन्द्रपुर नगरपालिका क्षेत्रमा उक्त निर्णय गरेको हो ।

उद्योग वाणिज्य संघको समन्वयमा दैनिक उपभोग्य सामग्री घरमा पुर्‍याएर बिक्री गर्ने व्यवस्था मिलाउने निर्णय भएको छ । गौर तथा चन्द्रपुर क्षेत्रमा उपभोक्ताको सहजताका लागि स्थानीय प्रशासनले पायक पर्ने पसलको नाम र फोन नम्बरसमेत सार्वजनिक गरेको छ ।

कोरोनाको संक्रमण फैलिन नदिन गरिएको ‘लकडाउन’ कडाइ गर्नका लागि सुरक्षाकर्मीको व्यापक परिचालन र प्रचारप्रसारमा तीव्रता दिइएको छ ।

जिल्लाको गरुडा, चन्द्रपुर, गौरमा ‘लकडाउन’ उल्लंघन गर्ने १ सयभन्दा बढीका सवारीलाई प्रहरीले नियन्त्रणमा लिएको छ । यसरी नियन्त्रणमा लिइएका सवारी साधन ‘लकडाउन’ सकिएपछि मात्र फिर्ता गरिने प्रहरीले जनाएको छ ।

प्रकाशित मिति: मंगलबार, चैत १८, २०७६ ११:४४