चन्द समूहका छ विद्यार्थी धरौटीमा छुटे

A+ A A-

नेत्रविक्रम चन्द विप्लव समूहका छ जना विद्यार्थी धरौटी रकम बुझाएर छुटेका छन् । गत १० मंसिरमा कालापानी, लिपुलेक, लिम्पियाधुरालगायतको विषयलाई लिएर विरोध कार्यकम गर्न सदरमुकाम खलङ्गा पुगेका विद्यार्थीलाई प्रहरीले पक्राउ गरेको थियो ।

उनीहरूविरुद्ध सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुर, अभद्र व्यवहार गर्न नहुनेजस्ता आरोप लगाएर मुद्दा लगाइएको थियो ।

पक्राउ परेका डडेल्धुराको भागेश्वर गाउँपालिका–३ का २२ वर्षीय ललित सार्की, पर्शुराम नगरपालिका–५ का २३ वर्षीय गणेश बोहरा, बझाङको बुंगल गाउँपालिका–४ का २९ वर्षीय तिलक कुँवर, खप्तड छन्ना गाउँपालिका– ८ का २५ वर्षीय सुभास जोशी, दार्चुलाको मार्मा गाउँपालिका– ४ का १९ वर्षीय धनसिंह धामी र बाजुराको बूढीगंगा नगरपालिका–१० का २१ वर्षीय दीपक रावतलाई जनही ८ हजार रुपैयाँ धरौटी लिएर जिल्ला प्रशासन कार्यालयले छोडेको हो ।

विद्यार्थी भएका कारण थोरै रकम धरौटी लिएर छाडिएको सहायक प्रमुख जिल्ला अधिकारी टेकसिंह कुँवरले जानकारी दिए ।

सो समूहले आफ्ना विद्यार्थी पक्राउ गरेर आफन्तलाई सहज भेटघाट गर्न नदिएको धरपकड गरेको, झुटा मुद्दा लगाई हिरासतमा राखेको भन्दै राष्ट्रिय मानवअधिकार आयोग सुदूरपश्चिम प्रदेश कार्यालय धनगढीमा उजुरीसमेत दिएको थियो ।

आयोगले उजुरी परेकाबारे जिल्ला प्रशासन कार्यालयलाई गत मंसिर १३ गते जानकारी माग गरेको थियो भने जिल्ला प्रशासन कार्यालयले यही २ पुसमा आयोगलाई घटनाबारे लिखित जवाफ दिएको थियो ।

पक्राउ परेका विद्यार्थीले बसपार्क क्षेत्रमा प्रहरीसँग बादविवाद गरेको, हातपात गर्नुका साथै अभद्र व्यवहार गरेर भागेका कारण कानुनबमोजिम पक्राउ गरिएको जवाफ पठाएको जिल्ला प्रशासन कार्यालयले स्रोतले जनाएको छ । रासस

प्रकाशित मिति: शुक्रबार, पुस ४, २०७६ १२:५८