सुदूरपश्चिम सरकारको निर्णयः सागका पदकधारीलाई बजेट रकमान्तरदेखि विषादीको नियमनसम्म

सुदूरपश्चिम सरकारको निर्णयः सागका पदकधारीलाई बजेट रकमान्तरदेखि विषादीको नियमनसम्म

A+ A A-

सुदूरपश्चिम प्रदेश सरकारले हालै सम्पन्न साग खेलकुदका पदकधारी खेलाडीको सम्मान गर्न पुरस्कारस्वरुप रकमान्तर गर्ने निर्णय गरेको छ । प्रदेश सरकारको मंगलबार बसेको मन्त्रिपरिषद् बैठकले त्यस्तो निर्णय गरेको हो ।

प्रदेश सरकारका प्रवक्ता एवंं आन्तरिक मामिला तथा कानुनमन्त्री प्रकाश शाहका अनुसार प्रदेश सरकारले सागमा पदक विजेता खेलाडीको सम्मानका लागि कार्यविधि बनाएर पुरस्कृत गर्ने निर्णय भएको छ । उनले भने, ‘प्रदेश सरकारले सागमा स्वर्ण पदक विजेता खेलाडीलाई जनही १ लाख, रजत पदक विजेतालाई ५० हजार र कास्य पदक विजेतालाई ३० हजार रुपैयाँ पुरस्कारस्वरुप दिने यसअघि नै उद्घोष गरिसकेको छ ।’

बैठकले दुईवटा कार्यविधि स्वीकृत गर्नुका साथै तीनवटा विधेयकलाई सैद्धान्तिक सहमति प्रदान र विभिन्न सातवटा निर्णयसमेत गरेको छ ।

मुख्य मन्त्री कार्यालयमा बसेको मन्त्रिपरिष्दको सो बैठकले प्रदेश उपभोक्ता समिति गठन, जीवनाशक विषादीको नियमन, अनुदान तथा सहायता रकम निकासालगायतका विधेयकलाई सैद्धान्तिक सहमति प्रदान गर्ने निर्णयसमेत गरेको प्रदेश सरकारका प्रवक्ता शाहले बताए ।

प्रदेशमा उपभोक्ता समिति गठनको प्रक्रिया, काम कारबाही, हेभी इक्विपमेन्टको प्रयोगलगायतका विषयमा विधेयकको प्रस्ताव आएकाले निर्णय भएको उनको भनाइ छ ।

त्यस्तै, बाल विकास र पर्यटन प्रवर्द्धनका लागि बाल उद्यान, सौर्य मण्डल नमुना निर्माणका लागि टीकापुर नगरपालिकालाई बजेट तथा योजना हस्तान्तरण गर्ने निर्णय पनि बैठकले गरेको छ । त्यस्तै सो बैठकले आन्तरिक मामिला तथा कानुन मन्त्रालयको कानुन तर्जुमा सुझाव समितिको म्याद थप्नेसमेत निर्णय भएको प्रवक्ता शाहले जानकारी दिए ।

प्रदेश सभाको हिउँदे अधिवेशनका बारेमा भने सरकारले अझै कुनै निर्णय गरिसकेको छैन । यद्यपि विधेयक पारितका हिसाबले महत्त्वपूर्ण मानिने हिँउदे अधिवेशनमा प्रदेश प्रहरी, निजामती सेवा ऐनलगायतका महत्त्वपूर्ण कानुनको तर्जुमा गर्ने तयारी सरकारले गरेको उनको भनाइ छ ।

प्रकाशित मिति: मंगलबार, पुस १, २०७६ १९:४५